ۇكىمەت بايقوڭىر تۇبىندەگى اەرودرومدى قازاقستان مەنشىگىنە الۋدان باس تارتتى

استانا. KAZINFORM - سەنات دەپۋتاتتارى پرەمەر- ءمينيستردىڭ اتىنا ساۋال جولداپ، بايقوڭىر تۇبىندە 1980 - جىلى سالىنعان «يۋبيلەينىي» اەرودرومىن قازاقستاننىڭ كوممۋنالدىق مەنشىگىنە الىپ، نىساننىڭ بازاسىندا اۆيا وتىن قۇياتىن كەشەن قۇرۋدى ۇسىنعان بولاتىن. ولجاس بەكتەنوۆ وسى ساۋالعا جاۋاپ بەردى.

Байқоңырдағы
Фото: www.advantour.com

دەپۋتاتتار كەلتىرگەن مالىمەتكە سەنسەك، اەرودرومداعى ۇشۋ- قونۋ جولاعىنىڭ ۇزىندىعى - 4,5 شاقىرىم، ەنى - 84 مەتر، بەتون مونوليتتەن قۇيىلعان جابىننىڭ قالىڭدىعى - 32 سانتيمەتر.

- كەزىندە اەرودروم سالماعى 392 تونناعا دەيىن باراتىن ۇشاقتى قابىلداۋعا جارامدى بولدى. الايدا، 2020 - جىلى رەسەي فەدەراتسياسىنىڭ ەكسپەريمەنتتىك اۆياتسياسى اەرودرومداردىڭ مەملەكەتتىك تىزىلىمىنەن «يۋبيلەينىي» اەرودرومىن شىعارىپ، جۇمىسى توقتادى. وسىلايشا، قازىرگى ۋاقىتتا اەرودرومنىڭ مارتەبەسى مەن مەنشىك يەسى انىقتالماعان، - دەپ جازادى سەناتورلار.

پرەمەر- مينيستر اتالعان نىساننىڭ 1994 - جىلدىڭ جەلتوقسانىنان بەرى رەسەي فەدەراتسياسىنا جالعا بەرىلگەن «بايقوڭىر» كەشەنىنىڭ مۇلكى بولىپ ەسەپتەلەتىنىن ايتقان.

- ونىڭ تولىققاندى جۇمىس ىستەۋى ءۇشىن حالىقارالىق ازاماتتىق اۆياتسيا ۇيىمىنىڭ ستاندارتتارىنا ساي كەلەتىن مىناداي ەلەمەنتتەردىڭ بولۋى قاجەت: اۋەايلاق ينفراقۇرىلىمى، اەروۆوكزال كەشەنى، ۇشۋدى قامتاماسىز ەتۋ قۇرالدارى، اۆاريالىق- قۇتقارۋ قىزمەتى، اۆياتسيالىق قاۋىپسىزدىك قىزمەتى، جەرۇستى جانە اۋەايلاققا قىزمەت كورسەتۋ، ارنايى تەحنيكا پاركىنىڭ بولۋى. بۇل رەتتە ينفراقۇرىلىمنىڭ جاي- كۇيى قاناعاتتانارلىقسىز دەپ باعالانادى. ۇشۋ- قونۋ جولاعىنىڭ بەتون جابىنى جارىلىپ، قۇرىلىس جايلار توزعان، ارنايى تەحنيكالارى جوق. ال اۋەايلاقتىڭ ءوزى ۇشۋ قاۋىپسىزدىگىن قامتاماسىز ەتۋ ءۇشىن حالىقارالىق تالاپتارعا سايكەس كەلمەيدى. وسىعان بايلانىستى اۋەجايدىڭ قىزمەتىن قالپىنا كەلتىرۋ ءۇشىن ينفراقۇرىلىمدىق وبەكتىلەردى قالپىنا كەلتىرۋ، ارنايى تەحنيكا پاركىن 2 جاڭارتۋ جانە پەرسونالدى جيناۋ قاجەت بولادى، بۇل ءوز كەزەگىندە قوماقتى قارجى سالىمدارىن تالاپ ەتەدى، - دەپ جازىلعان جاۋاپتا.

ۇكىمەت باسشىسى بايقوڭىر قالاسىنا جاقىن جەردە وبلىستىق ماڭىزداعى قىزىلوردا اۋەجايى تۇرعاندىقتان يۋبيلەينىي اەرودرومىن قايتا جانداندىرۋ سونشالىقتى ءتيىمدى قادام بولمايتىنىن ايتادى. ولجاس بەكتەنوۆ ايلاقتى جانارماي قۇيۋ كەشەنى رەتىندە پايدالانۋدىڭ رەتى جوق دەپ سانايدى. ويتكەنى، اۆيا وتىننىڭ يمپورتى جىلدان جىلعا ارتىپ كەلەدى. جاۋاپتا كەلتىرىلگەن دەرەككە سۇيەنسەك، 2023 -جىلى ەلدەگى مۇناي وڭدەيتىن زاۋىتتار 637 مىڭ توننا اۆيا وتىن وندىرسە، تۇتىنۋ كولەمى 832 مىڭ توننا بولعان. ال بىلتىرعى 11 ايدا 522 مىڭ توننا ءوندىرىلىپ، 794 مىڭ توننا تۇتىنىلعان.

- وسىعان بايلانىستى جانە ەلىمىزدىڭ ءىرى اۋەجايلارىنداعى جانارماي قۇيۋ كەشەندەرىندە جاڭعىرتۋ جۇمىستارى جۇرگىزىلىپ جاتقانىن ەسكەرسەك، اۋەايلاقتى اۆيا وتىن قۇيۋعا ارنالعان زاماناۋي ستانتسيالارمەن جاراقتاندىرۋ ورىنسىز دەپ سانايمىز. اۋەايلاقتىڭ قاناعاتتانارلىقسىز جاي- كۇيىن جانە جولاۋشىلار اعىنىنىڭ از بولۋىن، بايقوڭىر قالاسىندا ەكسپورتتىق تاۋارلار ءوندىرىسىنىڭ بولماۋىن نازارعا الا وتىرىپ، قازىرگى ۋاقىتتا ونى مۋلتيمودالدى اۆياحاب رەتىندە پايدالانۋ ءتيىمسىز دەپ پايىمدايمىز، - دەپ جازادى پرەمەر- مينيستر.

ەسكە سالساق، بىلتىر جازعا قاراي رەسەي «بايقوڭىر» كەشەنىندەگى 234 نىساندى قازاقستانعا قايتارۋعا نيەتتى ەكەنى ءمالىم بولعان ەدى.

سوڭعى جاڭالىقتار