ۇكىمەت باسشىسى ولجاس بەكتەنوۆ وزبەكستانعا جۇمىس ساپارىمەن باردى

تاشكەنت. KAZINFORM - پرەمەر-مينيستر ولجاس بەكتەنوۆ وزبەكستانعا جۇمىس ساپارىمەن بارىپ، ءبىرقاتار ماڭىزدى كەزدەسۋلەر وتكىزدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

ساپار اياسىندا ۇكىمەت باسشىسىن وزبەكستان پرەزيدەنتى شاۆكات ميرزيەيەۆ قابىلدادى. كەزدەسۋ بارىسىندا ەكى ەلدىڭ قارىم-قاتىناسى سەنىم مەن ءوزارا تۇسىنىستىككە نەگىزدەلگەن ستراتەگيالىق ارىپتەستىكتىڭ جارقىن ۇلگىسى ەكەنى اتاپ ءوتىلدى.

بىلتىر قازاقستان مەن وزبەكستان اراسىنداعى تاۋار اينالىمى 4,5 ميلليارد دوللارعا تەڭەلدى. الداعى ۋاقىتتا ساۋدا-ساتتىق كولەمىن ودان ءارى ارتتىرۋ، ەكونوميكالىق بايلانىستاردى نىعايتا ءتۇسۋ ماڭىزدى.

بۇل توڭىرەكتەگى ماسەلەلەردى پىسىقتاۋ ماقساتىندا ۇكىمەت باسشىسى ولجاس بەكتەنوۆ پەن وزبەكستاننىڭ پرەمەر-ءمينيسترى ابدۋللا اريپوۆتىڭ توراعالىعىمەن ۇكىمەتتىك دەڭگەيدەگى كەلىسسوز ءوتتى. ونىڭ بارىسىندا ساۋدا-ەكونوميكالىق، ينۆەستيتسيالىق، سۋ-ەنەرگەتيكالىق، كولىك-لوگيستيكالىق جانە مادەني ىنتىماقتاستىقتى كەڭەيتۋ بويىنشا قولعا الىنىپ جاتقان شارالار جايى تالقىلاندى.

«ەكى ەل پرەزيدەنتتەرى قازاقستان مەن وزبەكستان اراسىنداعى ىنتىماقتاستىقتى ساپالى دەڭگەيگە شىعارۋ مىندەتىن جۇكتەدى. ءبىز تاۋار اينالىمىن ارتتىرۋ ءۇشىن مول مۇمكىندىك بار ەكەنىن كورىپ وتىرمىز. سونىمەن قاتار، ەكىجاقتى جانە كوپجاقتى فورماتتاعى ءوزارا ءىس-قيمىلداردىڭ ارقاسىندا جوعارى ناتيجەگە قول جەتكىزۋ ءۇشىن قاجەتتى كۇش-جىگەرىمىزدى جۇمساۋعا ءازىرمىز»، - دەپ اتاپ ءوتتى ولجاس بەكتەنوۆ.

ءوز كەزەگىندە وزبەكستاننىڭ پرەمەر-ءمينيسترى ابدۋللا اريپوۆ اتاپ وتكەندەي، ەكى ەلدىڭ سەنىمدى دوستىق ۇستانىمىنا ۇيىعان قارىم-قاتىناسى ستراتەگيالىق ارىپتەستىك پەن وداقتاستىقتىڭ ودان ءارى نىعايا تۇسۋىنە وڭ ىقپال ەتەدى.

«ءبىزدىڭ ەلدەرىمىزدىڭ كوشباسشىلارى ەكى ەل اراسىنداعى كوپجوسپارلى قاتىناستاردى ودان ءارى كەڭەيتۋ بويىنشا ناقتى مىندەتتەر قويدى. ولاردى ورىنداۋ ءۇشىن بارلىق قاجەتتى شارالاردى قابىلداۋعا دايىنبىز»، - دەپ توقتالدى ابدۋللا اريپوۆ.

كەلىسسوزدەر بارىسىندا ۇكىمەت باسشىسى ءوڭىردىڭ كولىك-ترانزيتتىك الەۋەتتىن ودان ءارى ارتتىرۋ قاجەتتىگىن اتاپ ءوتتى. بۇدان بولەك، ولجاس بەكتەنوۆ قازاقستان وزبەكستان نارعىنا 500 ميلليون دوللارعا باعالاناتىن 255 تاۋار ءتۇرىن ەكسپورتتاۋعا دايىن ەكەنىن ايتتى.

سونداي-اق، جۇمىس ساپارى اياسىندا پرەمەر-مينيستر ولجاس بەكتەنوۆ تاشكەنتتەگى ونەركاسىپتىك، تۇرمىستىق تەحنيكا، قۇرىلىس ماتەريالدارى، جوعارى تەحنولوگيالىق ليفتىلەر مەن ەسكالاتورلار جاساپ شىعاراتىن Texnopark- ءتىڭ جۇمىسىمەن تانىستى. 100 گەكتاردان استام اۋماققا ورنالاسقان ونەركاسىپتىك كەشەندە بۇگىندە 17 جوبا ىسكە اسىپ جاتىر. وسى رەتتە ۇكىمەت باسشىسىنا ءار سەحتەگى جۇمىس بارىسى تانىستىرىلىپ، ءونىمدى شىعارۋ تاسىلدەرى تۋرالى اقپارات ۇسىنىلدى.

ايتا كەتەيىك، قازىرگى تاڭدا ونەركاسىپتىك كووپەراتسيا اياسىندا 13,3 مىڭنان استام جۇمىس ورنىن قۇرۋعا مۇمكىندىك بەرەتىن 60 جوبا ىسكە اسىرىلىپ جاتىر. ولاردىڭ جالپى سوماسى 2,6 ميلليارد دوللارعا تەڭ. بۇعان قوسا، پەرسپەكتيۆالى دەپ باعالانعان تاعى 43 جوبا بار.

ەكىجاقتى ساۋدا الەۋەتىن ودان ءارى ارتتىرۋ ىسىندە «ورتالىق ازيا» حالىقارالىق ونەركاسىپتىك كووپەراتسيا ورتالىعىنىڭ دا ماڭىزى وراسان. توقتالا كەتسەك، قازاق-وزبەك شەكاراسىندا ورنالاساتىن بۇل كەشەننىڭ قۇرىلىسى بيىل باستالادى. قازاقستاننىڭ تۇركىستان جانە وزبەكستاننىڭ سىرداريا وبلىستارىندا سالىناتىن ونەركاسىپتىك كەشەن 100 گەكتارعا جۋىق اۋماقتى قامتيدى. ءبىزدىڭ ەل تاراپىنان 50 گەكتار جەر ءبولىنىپ، قۇرىلىستى جۇرگىزەتىن ينۆەستور تابىلعان. جوبا بويىنشا، وندا جابىق كەشەن سالىنىپ، ءوندىرىس جانە كوتەرمە ساۋداعا لايىقتى جاعداي جاسالماق.