ۇكىمەت باسشىسى قىتاي شەكاراسىنداعى كولىك-لوگيستيكا سالاسى احۋالىمەن تانىستى
استانا. KAZINFORM - پرەمەر-مينيستر ولجاس بەكتەنوۆ جەتىسۋ وبلىسىنا جۇمىس ساپارى بارىسىندا ءوڭىر ەكونوميكاسىنىڭ 7 پايىزىن قۇرايتىن كولىك-لوگيستيكا سالاسىنىڭ دامۋىمەن تانىستى. ءبىرىنشى جارتى جىلدىق قورىتىندىسى بويىنشا وبلىستا اۆتوكولىكپەن جۇك تاسىمالداۋدىڭ جىل باسىنداعى 55,7 پايىزدان 6 ايدا 101,1 پايىزعا دەيىن ءوسۋ ءۇردىسى بايقالادى. بۇل تۋرالى ق ر ۇكىمەتىنىڭ باسپا ءسوز قىزمەتى ءمالىم ەتتى.
Nur Zholy Customs Service حالىقارالىق كولىك-لوگيستيكا ورتالىعىنىڭ اۋماعىندا ۇكىمەت باسشىسى Cross-Docking تەحنولوگياسىن قولدانۋ ارقىلى كولىك قۇرالدارىن ەسەپكە الۋدىڭ اۆتوماتتاندىرىلعان جۇيەسىمەن تانىستى.
«ورتالىقتىڭ جۇمىسى ءترانزيتتى جەڭىلدەتۋ ءارى جەدەلدەتۋ ءۇشىن جاڭا تەحنولوگيالاردى ەنگىزۋ ارقىلى جۇك اينالىمىن ارتتىرۋعا باعىتتالعان. بۇل نىسان ەكونوميكانى مونوپوليادان ارىلتۋ اياسىندا مەملەكەتكە قايتارىلدى. بيىلعى قاڭتار ايىندا ورتالىق اۋماعىندا Dostyk Customs Service ۋاقىتشا ساقتاۋ قويماسى اشىلدى، ول «الاكول» اۆتوكولىك وتكىزۋ بەكەتىندە جۇكتەردى ءتيىمدى ءارى جىلدام كەدەندىك وڭدەۋگە جانە وتكىزۋ قابىلەتىن ارتتىرۋعا ىقپال ەتەدى. بۇگىنگى تاڭدا ورتالىقتىڭ وتكىزۋ قابىلەتى تاۋلىگىنە 150-200 اۆتوكولىكتى، قويمانىڭ ورتاشا تاۋلىكتىك جۇك اينالىمى 200-250 توننانى قۇرايدى. جۇك اينالىمىنىڭ الەۋەتى - جىلىنا 1,2 ميلليون توننا تاۋار»، - دەلىنگەن حابارلامادا.
سونداي-اق دوستىق كەنتىندە ءتۇرلى تاباندى تەمىر جولدارمەن جابدىقتالعان Dostyk TransTerminal كوپفۋنكتسيونالدى جۇكتەردى اۋىستىرىپ تيەۋ تەرمينالى تەكسەرىلدى.
«ۇكىمەت باسشىسىنا 2021 -جىلدىڭ 7 ايىندا 66,2 مىڭ ج ف ب كونتەينەرى (جيىرما فۋتتىق بالاماسى) تيەلسە، بيىل وسى كەزەڭدە 101 مىڭ كونتەينەر قايتا تيەلىپ، 35 پايىزعا وسكەنى باياندالدى. جالپى، بيىلعى بولجام 180 مىڭ ج ف ب كونتەينەرىن قۇرايدى. Dostyk TransTerminal كوپفۋنكتسيونالدى جۇكتەردى اۋىستىرىپ تيەۋ تەرمينالىنىڭ قوسىمشا الاڭىن جانە 50 جۇمىس ورنىن قۇرا وتىرىپ، 3,2 ملرد تەڭگەگە قۋاتتىلىعى جىلىنا 160 مىڭ ج ف ب كونتەينەرىن قۇرايتىن مامانداندىرىلعان تەحنيكا سالۋ جوباسىن ىسكە اسىرۋ جوسپارلانعان»، - دەپ حابارلادى ۇكىمەتتىڭ باسپا ءسوز قىزمەتىنەن.
سونداي-اق پرەمەر-مينيستر «الاكول» كەدەن بەكەتىنىڭ قىزمەتىمەن، جۇك كولىك قۇرالدارىن تاسىمالداۋدىڭ قولدانىستاعى سحەماسىمەن جانە وتكىزۋ بەكەتىن جاڭعىرتۋ بارىسىمەن تانىستى. جاڭعىرتۋ شەڭبەرىندە جەكە تۇلعالاردى، جۇكتى، تاۋارلار مەن كولىك قۇرالدارىن باقىلاۋ، سونداي-اق بايلانىس، دەرەكتەر بەرۋ جانە الماسۋ تەحنولوگيالارى ەنگىزىلەتىن بولادى. جالپى، وتكىزۋ قابىلەتى تاۋلىگىنە 200-250 جۇك كولىگىنەن 1000-عا دەيىن ۇلعايتىلادى. نىسان بيىل قىركۇيەك ايىنىڭ سوڭىندا پايدالانۋعا بەرىلەدى دەپ جوسپارلانىپ وتىر.
ۇكىمەت باسشىسى كولىك-لوگيستيكا الەۋەتىن ودان ءارى دامىتۋدى جانە ءوسىپ كەلە جاتقان جۇك اعىنىن قاناعاتتاندىرۋ ءۇشىن ينفراقۇرىلىم قۋاتىن ارتتىرۋدى باقىلاۋدا ۇستاۋدى تاپسىردى. وتكەن جىلى قىتاي مەن قازاقستان اراسىنداعى ەكىجاقتى تاۋار اينالىمى 30 پايىزعا ارتىپ، $31,5 ميللياردقا جەتتى. كەدەندىك راسىمدەردى جەڭىلدەتۋ قازاقستاننىڭ وڭىردەگى نەگىزگى ترانزيتتىك كولىك ءدالىزى رەتىندەگى پوزيتسياسىن ودان ءارى نىعايتۋعا سەرپىن بەرەدى. تيىمدىلىگى دالەلدەنگەن Cross-Docking سياقتى زاماناۋي تسيفرلىق شەشىمدەردى باسقا وڭىرلەردە دە ىسكە قوسۋ كەرەك ەكەنى اتاپ ءوتىلدى.
«مەملەكەت باسشىسى اتاپ وتكەندەي، ورنىقتى ەكونوميكالىق ءوسىمدى قامتاماسىز ەتۋ ءۇشىن باسەكەلەستىك ارتىقشىلىقتارىمىزدى پايدالانۋ ماڭىزدى. بىزدە قازاقستاندى ەۋرازيانىڭ نەگىزگى ترانزيتتىك حابتارىنىڭ بىرىنە اينالدىرۋعا بارلىق جاعداي جاسالعان. ءبىز قازاقستاننىڭ تەڭىزگە شىعا المايتىنىن ءجيى ايتامىز، الايدا قىتاي ءبىز ءۇشىن مۇحيت ىسپەتتەس. وسى باعىتتا كۇش-جىگەرىمىزدى بىرىكتىرىپ، تۇتاس ترانزيتتىك قوزعالىستى قامتاماسىز ەتۋىمىز كەرەك. ءبىز ترانزيتتىك ءدالىزدى وتە بەلسەندى دامىتىپ جاتىرمىز: ازەربايجان، گرۋزياداعى ارىپتەستەرىمىزبەن كەلىسىمدەر بار. ءارى قاراي دا جۇمىس ىستەيمىز. «دوستىق – مويىنتى» تەمىرجول قاتىناسىن كەڭەيتۋ دامۋعا جاڭا سەرپىن بەرەدى. ءبىز بيزنەستىڭ كەڭەيتۋگە دايىن ەكەنىن كورىپ وتىرمىز، ءالى دە قاراجات سالۋعا نيەت ەتۋشىلەر بار. مۇنىڭ ءبارى ترانزيتتىك جۇك كولەمىن بىرنەشە ەسە ارتتىرۋعا مۇمكىندىك بەرەدى»، - دەپ اتاپ ءوتتى ولجاس بەكتەنوۆ.
تەگتەر:
اۆتور
باقىتگۇل اباي قىزى
