ۇكىمەت باسشىسى CITIC Construction كومپانياسىنىڭ ءبىرىنشى ۆيتسە-پرەزيدەنتى ياڭ جيەن شاڭمەن كەزدەستى
ق ر پرەمەر-ءمينيسترى ءاليحان سمايىلوۆتىڭ CITIC Construction كومپانياسىنىڭ ءبىرىنشى ۆيتسە-پرەزيدەنتى ياڭ جيەن شاڭمەن كەزدەسۋى بارىسىندا «تالدىقورعان - وسكەمەن» جانە «قاراعاندى - بالقاش» رەسپۋبليكالىق اۆتوجولدارىن كۇردەلى جوندەۋ ماسەلەلەرى تالقىلاندى.
بۇل تۋرالى Kazinform ۇكىمەتتىڭ باسپا ءسوز قىزمەتىنە سىلتەمە جاساپ حابارلايدى.
ۇكىمەت باسشىسى اتالعان ءىرى جوبالاردىڭ ۋاقتىلى اياقتالۋىن جانە ساپالى ورىندالۋىن قامتاماسىز ەتۋ قاجەتتىگىن اتاپ ءوتتى.
«كەلەسى ماۋسىمداعى جۇمىستار ءۇشىن جول-قۇرىلىس ماتەريالدارىن، ونىڭ ىشىندە قيىرشىق تاس پەن بيتۋمدى الدىن الا دايىنداۋ قاجەت. قوسالقى مەردىگەرلىك ۇيىمدار دا وسىنداي جۇمىس جۇرگىزۋى ءتيىس»، - دەدى ءاليحان سمايىلوۆ.
سونىمەن قاتار پرەمەر-مينيستر جۇرگىزۋشىلەردىڭ قاۋىپسىزدىگىن قامتاماسىز ەتۋ ءۇشىن جولداردى قىستا كۇتىپ ۇستاۋ جۇمىستارىن باقىلاۋعا الۋ قاجەتتىگىنە دە توقتالدى.
كەزدەسۋ بارىسىندا CITIC Construction كومپانياسىنىڭ قازاقستان اۋماعىنداعى باسقا دا اۆتوجول جوبالارىنا قاتىسۋ مۇمكىندىكتەرى، سونداي-اق كومپانيانىڭ ونەركاسىپ جانە اۋىل شارۋاشىلىعى سالالارىنداعى ينۆەستيتسيالىق جوبالاردى ىسكە قوسۋ باستامالارى تالقىلاندى.
ورتالىق مەملەكەتتىك ورگاندار تاراپىنان ءتيىستى جوبالاردى پىسىقتاۋدا قاجەتتى قولداۋ كورسەتىلەتىنى اتاپ ءوتىلدى.
