ۇكىمەت ا ق ش- تىڭ سانكتسيالىق تىزىمىنە ەنگەن كومپانيانى زەرتتەپ جاتىر
استانا. KAZINFORM - قازاقستان ۇكىمەتى رەسەيگە جوعارى تەحنولوگيالىق جابدىقتى جەتكىزۋگە قاتىسقانى ءۇشىن ا ق ش- تىڭ سانكتسيالىق تىزىمىنە ەنگەن «ك ب ر- تەحنولوگي» كومپانياسى جايىندا حاباردار ەمەستىگىن جاريالادى.

«مەملەكەتتىك كىرىستەر كوميتەتى مەن ونەركاسىپ مينيسترلىگىنىڭ مالىمەتىنشە، بۇل كومپانيا ەكسپورت-يمپورت ليتسەنزياسىن الۋعا ءوتىنىش بەرمەگەن. بىزدە كومپانيانىڭ پروفيلىن جاسايتىن باسىم ونىمدەردىڭ ءتىزىمى بار. بۇعان دەيىن اتالعان كومپانيا قازاقستانعا وسى ساناتتاعى تاۋارلاردى يمپورتتاماعان نەمەسە ەكسپورتتاماعاندىقتان، وعان قاتىستى ءتيىستى پروفيل جاسالماعان. سوندىقتان قازىر ءبىز ونى انىقتاپ جاتىرمىز»، - دەدى ۆيتسە-پرەمەر سەرىك جۇمانعارين سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، قازىر بۇل ماسەلە پىسىقتالىپ جاتىر.
«ءتيىستى تىزىمگە ەنگەن تاۋارلاردى قاتاڭ قاداعالايمىز. ءبىز سانكسيانى قولدامايمىز، ءبىراق ونى ورىنداۋعا ءماجبۇرمىز. وسى تۇرعىدا ەكسپورتتىق- يمپورتتىق باقىلاۋعا جاتاتىن ءتىزىمدى كەڭەيتتىك. كومپانيا كەڭەيتىلگەن تىزىمنەن تاۋار جەتكىزگەن جوق. سوندىقتان ولار نەنى جەتكىزگەنىن، زاڭ بۇزۋ دەرەگى قالاي تىركەلگەنىن انىقتاپ جاتىرمىز. كەلەسى اپتادا ەۋروپا وداعىنىڭ ارنايى وكىلى و’سالليۆان مىرزا كەلەدى. ونىمەن سەيسەنبى كۇنى كەزدەسىپ، وسى ماسەلەلەردى تالقىلايمىز»، - دەدى سەرىك جۇمانعارين.
ەسكە سالا كەتەيىك، جاقىندا ا ق ش قارجى مينيسترلىگى رەسەيگە قارسى سانكسيالاردىڭ جاڭا پاكەتىن ەنگىزەتىنىن جاريالادى.
بۇل تىزىمگە ماسكەۋ بيرجاسى مەن ونىڭ ەنشىلەس كومپانيالارى ەنگەن.