ۇكىمەت 1,3 تريلليون تەڭگەدەن استام سوماعا 110 سالىقتىق جەڭىلدىكتى الىپ تاستاماق
استانا. KAZINFORM - ۇكىمەت 1,3 تريلليون تەڭگەدەن استام سوماعا 110 سالىقتىق جەڭىلدىكتى الىپ تاستاماق.
بۇل تۋرالى بۇگىن ماجىلىستە جاڭا سالىق كودەكسىنىڭ جوباسىن تانىستىرعان ۇلتتىق ەكونوميكا ۆيتسە-ءمينيسترى ازامات ءامرين ايتتى.
«كەلەسى مىندەت - سالىق جەڭىلدىكتەرىن رەتكە كەلتىرۋ جانە ولاردىڭ كولەمىن كەم دەگەندە 20 پايىزعا قىسقارتۋ. 2022-جىلعى سالىق دەكلاراتسيالارىنىڭ دەرەكتەرى بويىنشا ولاردىڭ سوماسى 744 نورما بويىنشا 9,5 تريلليون تەڭگە بولدى. ءبىز ساراپتاما جۇرگىزدىك. ونىڭ ىشىندە 459 نورما 3,3 تريلليون تەڭگە سوماعا جەڭىلدىكتەر رەتىندە انىقتالدى. وسى 459 نورمادان 1300 ميلليارد تەڭگەدەن استام سوماعا 110 سالىق جەڭىلدىكتەرىن الىپ تاستاۋ ۇسىنىلادى. بۇدان باسقا، 400 ميلليارد تەڭگەدەن استام سوماعا 29 سالىق جەڭىلدىكتەرى بويىنشا قولدانىلۋ مەرزىمى شەكتەلەتىن بولادى»، - دەدى ۆيتسە-مينيستر.
ونىڭ دەرەگىنشە، وتكەن جىلدارى سالىق ەسەپتىلىگىنىڭ نىساندارى بارىنشا جەڭىلدەتىلدى. بۇل ەسەپ جۇرگىزۋگە قيىندىق تۋدىردى. ەندى جەڭىلدىك مىندەتتى تۇردە سالىق ەسەپتىلىگى نىساندارىندا كورسەتىلەدى. بۇدان باسقا، ءتيىستى سالالىق مەملەكەتتىك ورگاندارعا تيىمدىلىك كورسەتكىشتەرىنىڭ مونيتورينگى بويىنشا مىندەتتەمەلەردى بەكىتۋ ۇسىنىلادى.
«سونداي-اق، جۇيەلى شارالار رەتىندە سالىقتىق جەڭىلدىكتەر ۇعىمىن ناقتى رەگلامەنتتەۋ، ولاردى بەرۋ ءتارتىبى، مونيتورينگ، تالداۋ، ولاردى الىپ تاستاۋ ءتارتىبى ۇسىنىلادى. مۇنىڭ ءبارى زاڭعا تاۋەلدى اكتىلەرمەن رەتتەلەتىن بولادى»، - دەدى ازامات ءامرين.
