كىمدەر پويىز بيلەتتەرىن جارتى باعاعا ساتىپ الا الادى؟
استانا. KAZINFORM - قازاقستاندا ەرەكشە قاجەتتىلىگى بار ادامدار جانە ولارمەن بىرگە جۇرەتىندەر پويىز بيلەتتەرىن 50 پايىز جەڭىلدىكپەن ساتىپ الا الادى. بۇل تۋرالى كولىك مينيسترلىگىنىڭ باسپا ءسوز قىزمەتى مالىمدەدى.
مينيسترلىك جولاۋشىلاردى تەمىرجول كولىگىمەن تاسىمالداۋ ەرەجەلەرىنە ءبىرقاتار وزگەرىس ەنگىزۋدى ۇسىندى. جاڭارتىلعان نورمالار ەرەكشە قاجەتتىلىگى بار ازاماتتار مەن ولاردى الىپ جۇرەتىن تۇلعالارعا ارنالعان جەڭىلدىكتەردى كەڭەيتۋدى كوزدەيدى.
«I جانە II توپتاعى مۇگەدەكتىگى بار ازاماتتاردى، سونداي-اق، ەرەكشە قاجەتتىلىگى بار بالالاردى الىپ جۇرەتىن جانداردىڭ جول ءجۇرۋ قۇنىنا 50 پايىز جەڭىلدىك بەرۋ ۇسىنىلىپ وتىر (تەمىرجول بيلەتىنە – ە س ك.)»، - دەپ جازىلعان حابارلامادا.
سونىمەن قاتار، ەندى ەرەكشە قاجەتتىلىگى بار ازاماتتاردان پويىزعا ءمىنۋ كەزىندە مەديتسينالىق مەكەمەلەردەن الىناتىن انىقتامالار مەن قۇجاتتاردى كورسەتۋ تالاپ ەتىلمەيدى.
«ەندى قاجەت مالىمەت ارنايى دەرەكتەر بازاسى ارقىلى تەكسەرىلەدى. بۇل شارالار ەرەكشە قاجەتتىلىگى بار ازاماتتاردىڭ قۇقىعىن قورعاۋعا باعىتتالىپ وتىر»، - دەپ جازىلعان حابارلامادا.
قازىر بۇل وزگەرىستەر ماقۇلداۋ ساتىسىندا تۇر. ەرەجەلەردى 2025-جىلدىڭ ەكىنشى جارتىسىندا كۇشىنە ەنگىزۋ جوسپاردا بار.
