كىمدەرگە ورازا ۇستاماۋعا رۇقسات ەتىلگەن

الماتى. KAZINFORM - ناۋرىزدىڭ 11-كۇنى مۇسىلمان قاۋىمى اسىعا كۇتەتىن قاسيەتتى رامازان ايى باستالادى.

وڭىرلىك كوممۋنيكاتسيالار قىزمەتىندە وتكەن باسپا ءسوز ءماسليحاتى بارىسىندا قازاقستان مۇسىلماندارى ءدىني باسقارماسىنىڭ نايب ءمۇفتيى كەنجالى قوڭىراتباي ۇلى كىمدەرگە ورازا ۇستاماۋعا رۇقسات ەتىلگەنىن ايتتى.

سپيكەر مۇسىلماندار ءۇشىن قاسيەتتى رامازان ايىندا ورازا ۇستاۋدان ساياحاتشىلار، پسيحيكالىق اۋىتقۋشىلىعى بار ناۋقاستار، قارتتار، اۋرۋدان زارداپ شەگەتىن ادامدار، جۇكتىلىك جانە لاكتاتسيا كەزەڭىندەگى ايەلدەر بوساتىلاتىنىن اتاپ ءوتتى.

«ادامدار ەگدە جاستاعى نەمەسە اۋىر اۋرۋعا بايلانىستى ورازا ۇستاۋدان بوساتىلادى. بۇل جاعدايدا تولەم تۇرىندە وتەۋ قاراستىرىلعان - ءپىديا، ونىڭ مولشەرى بيىل 3400 تەڭگە. وسى مولشەردە ءپىدياعا اقى تولەۋ مۇمكىندىگى بولماعان جاعدايدا، قايىرىمدىلىق كولەمىمەن دە بەرۋگە بولادى»، - دەپ ءتۇسىندىردى نايب ءمۇفتي.

ەستەرىڭىزگە سالا كەتەيىك، قازاقستان مۇسىلماندارى ءدىني باسقارماسى 2024 -جىلدى «يسلام جانە ءداستۇر قۇندىلىقتارى» دەپ جاريالادى. تيىسىنشە، جۇما ۋاعىزدارى جانە تۇنگى دۇعالاردا ايتىلاتىن ۋاعىزداردىڭ تاقىرىبى ءداستۇرلى قۇندىلىقتاردى ناسيحاتتاۋعا باعىتتالعان.