كىلت جاسايتىن كىسى
استانا.قازاقپارات - كىلت جاساتۋىم كەرەك بولدى، مەنىكى ءبىر قيسىنسىز كىلت ەكەن، تابانىمدى ابدەن توزدىردىم.
جۇرتتىڭ نۇسقاۋىمەن ءبىر ورىن عانا قالدى، بولسا ەندى تەك سول جاقتا ىستەي الادى ەكەن. تاپتىق، باردىق. وتىزدان اسقان ازامات تۇردى. كورسەتسەم، قولىنان كەلەتىن بولىپ، قۋانىپ كەتتىم.
دىرىلداپ اينالىپ جاتقان كۇردەلى قۇرال: ءبىرى تەگىستەيدى، ءبىرى كەسەدى، ەندى ءبىرى تەمىردى تەسەدى ەكەن. قۇلاقتىڭ پەردەسىن جارىپ جىبەرەردەي داۋىسى جايىنا قالدى، اپپاراتتاردى كوز ىلەسپەس جىلدامدىقپەن قولداناتىنىنا قاراپ قالىپپىن. شۋىلىن باسەڭدەتىپ تەگىستەۋگە كوشكەندە:
- تەحنيكالىق ماماندىقتا وقىعان شىعارسىز، ءيا؟ - دەپ سۇرادىم. ول:
- جوق، مەن مەكتەپتەن كەيىن وقىماعام، - دەپ قويىپ قالدى.
- ءماسساعان، وندا مىناداي شەبەرلىكتى قايدان مەڭگەرىپ العانسىز؟
- وسىنداي ءبىر جەرگە كومەكشى بولىپ كىرىپ، سودان ۇيرەنىپ الدىم. كەيىن وزىمدىكىن اشتىم.
- سىزگە قيىن بولمادى ما؟ مىنا اپپاراتتار تۇك تۇسىنىكسىز عوي؟
- ادام ۇيرەنەم دەسە، ءبارىن ىستەي الادى. وتباسىن اسىراۋ كەرەك.
- بارەكەلدى! ال، ەندى ايتىڭىزشى، بىلگىم كەلىپ تۇر، وسىدان تاپقانىڭىز وتباسىڭىزدى اسىراۋعا جەتە مە؟
- قۇدايعا شۇكىر، بالالارىمدى اسىراپ، الدىن مەكتەپتە وقىتىپ وتىرمىن، - دەدى، دايىن بولعان كىلتتەردى قولىما ۇستاتىپ. ءماز بوپ قالدىم. قالدىق اقشانى قايتارىپ تۇرىپ:
- كوپ ادام كەلەدى- كەتەدى، ال ءسىز جاۋاپ الماي قويمايدى ەكەنسىز. مەن دە ايتتىم عوي، ءسىز كىم بوپ ىستەيسىز؟ - دەدى. ايتتىم. جانىعىپ الدىنداعى قاعازدارىن اقتارا باستادى دا:
- سولاي ما، ەندەشە مىنا قاعازدارداعى جازۋلارىمدى كورىپ بەرىڭىزشى، - دەدى. كەلۋشىلەرىنە ەسكەرتۋ، جەڭىلدىكتەر تۋرالى مالىمەت قاعازدارى ەكەن. اسىقپاي قاراپ بەردىم. ءبىراق بىردە-ءبىر قاتە تاپپادىم. ەندى ول ءماز بوپ قالدى.
ناناسىز با، ءبىزدىڭ نارىقتىق قوعامدا دا قاراپايىم كۇيمەن-اق كۇن كورۋگە بولادى. ءتىپتى وسى جانتالاسى جۇتىپ جىبەرەتىن الىپ قالالاردا دا. ادال نان تابۋ ءۇشىن كوپ نارسەنىڭ كەرەگى جوق، بار بولعانى - تالاپ پەن وتباسىنىڭ الدىنداعى جاۋاپكەرشىلىك جەتىپ جاتىر. بىلەسىز بە، ونىڭ بالەندەي اتاعى جوق، اعىلشىنشا بىلمەيدى، كەرەك دەسەڭىز ونىڭ ءبىر ماماندىقتى مەڭگەرگەنىن كورسەتەتىن قاعازى دا جوق. ءبىراق ول - ءوز ءىسىنىڭ شەبەرى. مەن باسقا ەمەس، ناق سونىڭ قولىنان شىققان كىلتپەن الگىندە عانا ۇيگە كىردىم. ءوز ءىسىنىڭ شەبەرى بولۋ ءۇشىن دە كوپ نارسەنىڭ قاجەتى جوق ەكەن. بار بولعانى - ءار ىسكە كىرىسكەن سايىن «ادال نان تاپسام» دەگەن ويدىڭ جاڭعىرىپ تۇرعانى جەتىپ جاتىر.
«ديپلومىم بويىنشا جۇمىس تاپپاي ءجۇرمىن» دەپ، اينالاسىنا ماسىل بولىپ وتىرعاندار قاراپايىم عانا كىلت جاساۋشىدان ۇلگى السا ەكەن دەيمىن عوي. ايتپاقشى، شىلاۋ مەن جالعاۋدى ايىرا الۋ ءۇشىن اتى دۇركىرەگەن ۇلتتىق، نە حالىقارالىق وقۋ ورنىن تاۋىسۋدىڭ دا قاجەتى شامالى ەكەنىن دالەلدەپ بەردى سول ادام.
... ءومىر - سونداي قاراپايىم، ونى كۇردەلەندىرىپ جىبەرەتىن ءوزىمىز عوي.
ايدانا شوتباي قىزى
egemen.kz
