كىشى جانە ۇلكەن الماتى وزەندەرىندە سۋ دەڭگەيى كوتەرىلەدى

الماتى. KAZINFORM - بۇگىن الماتى تاۋلارىندا سەل قاۋپى جوعارى. وسىعان بايلانىستى توتەنشە جاعدايلار دەپارتامەنتى تۇرعىندارعا تاۋعا شىقپاۋ كەرەكتىگىن ەسكەرتتى.

18-تامىز كۇنى جاڭبىر جاۋىپ، اۋا تەمپەراتۋراسىنىڭ كوتەرىلۋىنە بايلانىستى، كىشى جانە ۇلكەن الماتى وزەندەردە سۋ دەڭگەيىنىڭ كوتەرىلۋى كۇتىلۋدە. الماتى قالاسىندا جانە وعان ىرگەلەس تاۋلى ايماقتا سۋ تاسىقىنى بولۋى مۇمكىن.

«تاۋ وزەندەرى بويىنشا گيدرومەتەورولوگيالىق اقپاراتقا سايكەس، ىلە الاتاۋ تاۋلارىندا قاتتى جاۋىن-شاشىننىڭ بولجامىنا بايلانىستى وزەن، كولدەردە سۋ كوتەرىلۋى مۇمكىن»، - دەپ ەسكەرتتى دەپارتامەنت وكىلدەرى.

قازسەلدەنقورعاۋ بولىمشەلەرى سەل قاۋپى بار ۋچاسكەلەردە باقىلاۋدى كۇشەيتىلگەن رەجيمگە اۋىستىرىپ، اەروۆيزۋالدى جانە جەرگىلىكتى باقىلاۋ جۇرگىزىلۋدە، ينجەنەرلىك- تەحنيكالىق قىزمەتكەرلەردىڭ تاۋلىك بويى كەزەكشىلىگى ۇيىمداستىرىلدى.

سەل قاۋپى بار جەردە نە ىستەۋ كەرەك:

- تاۋداعى جاعداي تۋرالى بۇقارالىق اقپارات قۇرالدارىنىڭ حابارلارىن ۇنەمى قاداعالاپ وتىرۋ؛

- ەگەر قاۋىپ تونسە، نەمەسە كەنەتتەن سەل بولسا، رەلەفتىڭ ەڭ بيىك نۇكتەسىنە كوتەرىلىڭىز؛

- سەل قاۋپى بار كانالداردىڭ جانىندا، كوپىرلەردە (بوگەتتەردە) جانە ولاردىڭ استىندا شاتىر تىكپەۋ، ايالداماۋ.