كەيبىر قۇرىلىس ماتەريالدارى بويىنشا تولىق يمپورتقا تاۋەلدىمىز - مينيستر

استانا. KAZINFORM - پرەمەر-ءمينيستردىڭ ورىنباسارى-ۇلتتىق ەكونوميكا ءمينيسترى نۇرلان بايبازاروۆ قۇرىلىس سالاسىندا ەلىمىزدە شىعارىلعان ماتەريالداردى پايدالانۋدىڭ ۇلەسىن ارتتىرۋعا ءمان بەرىلەتىنىن ايتتى.

«جايلى مەكتەپتەر قۇرىلىسىنا وتاندىق ماتەريالداردى قولدانۋ ماسەلەسىن جۋىردا ۇكىمەت وتىرىسىندا ارنايى قاراستىردىق. جوبا وپەراتورى «Samruk-Kazyna Construction» كومپانياسىنا قازاقستاندىق قۇرىلىس ماتەريالدارىمەن قامتۋدى ۇلعايتۋ جونىندە ناقتى تاپسىرمالار بەرىلدى. بۇل ماسەلە باقىلاۋدا، اتقارىلعان جۇمىستار بويىنشا ەسەپ بەرۋ كۇنىن، ۇكىمەتتىڭ تاعى ءبىر كەڭەس وتكىزۋدى بەلگىلەدىك. مەنىڭ ويىمشا، جازعا جاقىن، بۇل جۇمىستىڭ ناتيجەسىن ەگجەي-تەگجەيلى قاراستىرامىز جانە باعاسىن بەرەمىز»، - دەدى نۇرلان بايبازاروۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا.

ءمينيستردىڭ ايتۋىنشا، قۇرىلىس سالاسىندا وتاندىق ماتەريالداردى قولدانۋ تالابى ەنگىزىلەدى. ول ءۇشىن ۇكىمەتتە ءتيىستى زاڭنامالىق شارالاردى قابىلداۋ قارالىپ جاتىر.

«قۇرىلىس سالاسىندا كەيبىر ماتەريالدار بويىنشا بىزدە تولىق يمپورتقا تاۋەلدىلىك بار. ازىرگە يمپورتقا تاۋەلدىلىك بويىنشا ءبىز ەشتەڭە ىستەي المايمىز. ءبىراق، بۇل باعىتتاعى ينۆەستيتسيالىق جوبالارعا نازار اۋدارامىز»، - دەيدى ول.