كيبەرقىلمىستىڭ الدىن الۋ: زاڭسىز SIM بوكستار انىقتالىپ جاتىر
استانا. KAZINFORM - ىشكى ىستەر مينيسترلىگى 2024 - جىلى قۇرىلعان كيبەرقىلمىسقا قارسى ءىس- قيمىل دەپارتامەنتىنىڭ جۇمىسىنا قاتىستى تۇسىنىك بەردى.

- ىشكى ىستەر مينيسترلىگى ينتەرنەت الاياقتىقتى اشۋ جانە وعان قارسى كۇرەستى ءتيىمدى جۇرگىزۋ ماقساتىندا حالىقارالىق دەڭگەيدە ۇيىمداسقان قىلمىسقا قارسى كۇرەستى ۇيلەستىرۋ بيۋروسىمەن (ب ك ب و پ) تىعىز ىنتىماقتاستىقتا جۇمىس ىستەپ كەلەدى. بۇل ءوزارا ارەكەتتەستىك الاياقتىق سحەمالارىن ۋاقىتىلى انىقتاپ، ولاردىڭ جولىن كەسۋگە، سونداي-اق ترانسشەكارالىق قىلمىستىق توپتاردى جويۋعا مۇمكىندىك بەرەدى، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.
وسى باعىتتاعى جۇمىستى ودان ءارى جەتىلدىرۋ ماقساتىندا بىلتىر كيبەرقىلمىسقا قارسى ءىس- قيمىل دەپارتامەنتى قۇرىلدى.
- بولىمشەنىڭ مىندەتتەرى - كيبەرقىلمىستاردىڭ الدىن الۋ، جولىن كەسۋ جانە اشۋ بويىنشا بىرلەسكەن ۆەدومستۆوارالىق جۇمىس، قارجى ۇيىمدارىمەن، بايلانىس وپەراتورلارىمەن جانە IT كومپانيالارمەن ءوزارا ءىس- قيمىل جاساۋ. دەپارتامەنتتىڭ جەدەل قىزمەتى ناتيجەسىندە ۋكراينادا قازاقستاندىقتار مەن چەحيا ازاماتتارىنا قاتىستى قىلمىس جاساعان 5 الاياقتىق بايلانىس ورتالىعى جويىلدى (30 دان استام قاتىسۋشى ۇستالدى). سونداي- اق، الماتىدا باسقا ەلدەردىڭ (ا ق ش، قىتاي، مالايزيا، يران) ازاماتتارى قۇربان بولعان تاعى 4 ورتالىق انىقتالىپ، جويىلدى. ناتيجەسىندە، 47 شەتەلدىك (قىتاي، مالايزيا، وزبەكستان، تاجىكستان) جانە 5 قازاقستان ازاماتى ۇستالدى، - دەيدى ۆەدومستۆودان.
تەحنيكالىق توسقاۋىل قويۋ ناتيجەسىندە اۋىسپالى نومىرلەر ارقىلى جاسالعان 64 ميلليون تەلەفون قوڭىراۋى بۇعاتتالدى. الاياقتار كەيىنگى كەزدە SIM بوكستار (تىركەلمەگەن SIM كارتالاردى بىرىكتىرۋ قۇرىلعىسى - ينتەرنەت ارقىلى قوڭىراۋلار) ارقىلى تەلەفون شالۋدىڭ باسقا ءادىسىن قولدانا باستاعان. كيبەرقىلمىسقا قارسى ءىس- قيمىل دەپارتامەنتىنىڭ بايلانىس وپەراتورلارىمەن ءوزارا ءىس- قيمىلى اياسىندا ەلىمىزدىڭ 5 قالاسىندا وسىنداي 23 قۇرىلعى جانە 6 مىڭنان استام تىركەلمەگەن تەلەفون كارتا (استانا، الماتى، قاراعاندى، اتىراۋ جانە سەمەي قالالارى) انىقتالىپ، تاركىلەندى.
- ماسەلەن، 2024 -جىلعى 19- قاراشادا الماتى قالاسىندا ەلىمىز اۋماعىندا ينتەرنەت- الاياقتىق جاساۋ ءۇشىن پايدالانىلعان SIM-box قۇرىلعىسى انىقتالدى. سونداي- اق قازاقستاندىق بايلانىس وپەراتورىنىڭ 300 SIM- كارتاسى تاركىلەندى. رۇقسات ەتىلمەگەن بايلانىستاردى ۇيىمداستىرعان ادام قاماۋعا الىندى. تەرگەۋ بارىسىندا ول مۇنداي «جۇمىستى» Telegram-داعى حابارلاندىرۋ ارقىلى تاپقانى انىقتالدى. 2024 -جىلدىڭ 30 - قاراشاسىندا ءبىر الماتىلىق ۇستالىپ، ودان 3 SIM- بوكس تاركىلەندى. ونىڭ «جۇمىس بەرۋشىسى» - قازاقستانعا وسىنداي «جۇمىستاردى» ۇيىمداستىرۋ ءۇشىن كەلگەن رەسەي ازاماتى ەكەن. بارلىق فاكتىلەر بويىنشا تەرگەۋ ءجۇرىپ جاتىر. الاياقتىققا قارسى كۇرەس الداعى ۋاقىتتا دا بەلسەندى جۇرگىزىلەدى، - دەپ اتالىپ وتكەن مينيسترلىك مالىمەتىندە.
الاياقتىقتىڭ قۇربانى بولماۋ ءۇشىن مىنا ۇسىنىستاردى ورىنداۋ قاجەت:
تاۋارلار مەن قىزمەتتەردى ساتىپ الۋ كەزىندە بەلگىسىز ءارى تەكسەرىلمەگەن سايتتارعا جانە باسقا دا دەربەس دەرەكتەرگە سەنبەۋ. تەكسەرۋسىز الدىن الا تولەم جاساماڭىز. تاۋاردى العاننان كەيىن تولەم تۋرالى كەلىسسوزدەر جۇرگىزۋگە تىرىسىڭىز؛
ەشكىمگە دەربەس دەرەكتەردى، قولدانىلۋ مەرزىمدەرىن، بانك كارتالارىنىڭ CVV- كودتارىن، اۋدارىمدار تۋرالى تۇبىرتەكتەردى، سونداي- اق س م س- كودتار مەن قۇپيا سوزدەردى بانك، پوليتسيا قىزمەتكەرلەرى جانە باسقا دا وكىلەتتى ادامدارعا بەرۋگە بولمايدى؛
بوگدە ادامداردىڭ ءوتىنىشى بويىنشا ءوز تەلەفونىنا قانداي دا ءبىر موبيلدى قوسىمشالاردى ورناتپاۋ كەرەك، بۇل قوسىمشالار الاياقتارعا ءسىزدىڭ موبيلدى قۇرىلعىڭىزعا كىرۋگە مۇمكىندىك بەرەدى؛
كۇماندى ينۆەستيتسيالىق جوبالارعا اقشا سالماڭىز. ينۆەستيتسيا سالماس بۇرىن، ءسىز اقشا سالۋدى جوسپارلاپ وتىرعان قور نارىعىن جانە بەلگىلى ءبىر جوبانىڭ زاڭدىلىعىن مۇقيات زەردەلەۋىڭىز كەرەك.
قوسىمشالاردى ورناتۋ ءۇشىن تەك App Store, Play Market جانە ت. ب. رەسمي جۇيەلەردى پايدالانىڭىز؛
بەلگىسىز كونتاكتىلەردەن سپام- حابارلامالاردا كورسەتىلگەن سىلتەمەلەر بويىنشا وتپەڭىز. كوبىنەسە الاياقتار تولەم ءۇشىن «فيشينگ» سىلتەمەسىنە ءوتۋدى ۇسىنادى؛
ابونەنتتىك ءنومىردىڭ قولدانىلۋ مەرزىمى اياقتالعانىن حابارلايتىن جانە قىزمەتتى ونلاين- رەجيمدە ۇزارتۋدى ۇسىناتىن ۇيالى كومپانيالار وكىلدەرىنىڭ تەلەفون قوڭىراۋلارىنا سەنبەۋ كەرەك. سونداي- اق، ولار سىزگە كەلىپ تۇسكەن س م س- كودتى اتاۋدى سۇرايدى، ونى كەيىننەن ولار قوسىمشالاردا اۆتوريزاتسيالاۋ ءۇشىن پايدالانادى؛
بانكينگ قىزمەتتەرىنە كىرۋ پارولدەرىن ۇنەمى وزگەرتىپ وتىرىڭىز، بانكتەر ۇسىناتىن 3D قورعاۋدى جانە باسقا قاۋىپسىزدىك شارالارىن قولدانىڭىز؛
شوتتارىڭىزداعى اقشانىڭ اۋدارىمىن ءجيى تەكسەرىڭىز.
ەسكە سالساق، بىلتىر ءى ءى م- دە كيبەرقىلمىسقا قارسى ءىس- قيمىل دەپارتامەنتى قۇرىلدى.
رۋسلان عابباسوۆ