ەكىباستۇزدا تويعا جينالعان قوناقتار تاماقتان جاپپاي ۋلانىپ قالدى

پاۆلودار. KAZINFORM - سوڭعى ەكى كۇندە ەكىباستۇز قالالىق اۋرۋحاناسىنا جالپى سانى 32 ادام قارالعان. ولاردىڭ بارلىعىندا تاماقتان ۋلانۋ جانە باكتەريالدى-ىشەك ينفەكسيالارى بەلگىلەرى بولعان.

بۇل تۋرالى پاۆلودار وبلىسى دەنساۋلىق ساقتاۋ باسقارماسىنىڭ باسپا ءسوز قىزمەتى حابارلادى.

«2024 -جىلعى 14-ساۋىردەن بەرى ەكىباستۇزداعى قالالىق اۋرۋحاناعا پاتسيەنتتەر تاماقتان ۋلانۋ جانە باكتەريالدى-ىشەك ينفەكسيالارى بەلگىلەرىمەن جاپپاي كەلە باستاعان. ولاردىڭ بويىندا قۇسۋ، السىزدىكتىڭ دەندەۋى، ءىش قۇرىلىسىنىڭ اۋىرۋى، دەنە قىزۋىنىڭ كوتەرىلۋى بەلگىلەرى بار. ەپيدەميولوگيالىق انامنەزدى جيىستىرا كەلگەندە ولاردىڭ بارلىعى 13-ءساۋىر كۇنى ەكىباستۇز قالاسىنداعى الدەبىر ءدامحانادا وتكەن شارادا قوناق بولعانى انىقتالدى. پاتسيەنتتەر قابىلداۋ بولىمىندە قارالۋدان وتكەن سوڭ بارلىعىنا شۇعىل تۇردە مەديتسينالىق كومەك كورسەتىلىپ (اسقازاندارى شايىلدى)، جۇقپالى اۋرۋلار بولىمشەسىنە جاتقىزىلدى. 14-ساۋىردەن بەرى اۋرۋحاناعا وسىنداي دياگنوزبەن جالپى سانى 32 ادام كەلگەن»، دەپ مالىمدەدى باسپا ءسوز قىزمەتىنەن.

بەلگىلى بولعانداي، ەمدەۋ ۇيىمىنا قارالعان 32 ادامنىڭ تورتەۋى اۋرۋحاناعا جاتۋدان ءوز ەركىمەن باس تارتقان. وزگەلەرى قازىرگى ۋاقىتتا ەم قابىلداپ جاتىر. ناۋقاستاردىڭ جاعدايى ورتاشا اۋىر دەلىنىپ وتىر.

t.me/ekibasvteme تەلەگرام ارناسىنىڭ حابارلاۋىنشا، 13-ءساۋىر كۇنى «Grand Hall» مەيرامحاناسىندا وتكەن قىز ۇزاتۋ تويىنا 200 دەن استام قوناق قاتىسقان. ولاردىڭ كوبى قاراعاندى، استانا، پاۆلودار جانە اقسۋ قالالارىنان كەلگەن.

اۆتور
مۇرات اياعان