ەكىباستۇزدا ەر ادام تەرەزەدەن قۇلاپ كەتە جازداعان بالانى قۇتقارىپ قالدى
استانا. قازاقپارات – ەكىباستۇز قالاسىندا 59 جاستاعى پاۆلودارلىق ەر ادام ەكىنشى قاباتتاعى اشىق تەرەزە الدىندا وتىرعان بالانى قۇلاپ كەتۋدەن قۇتقارىپ قالدى. بۇل وقيعا الەۋمەتتىك جەلىدە كەڭ تارالعان ۆيدەو ارقىلى بەلگىلى بولدى، دەپ حابارلايدى turkystan.kz.
وقيعا دەمالىس كۇندەرى بولعان. ەر ادام ۇلىنا قوناققا كەلگەن. نەمەرەسىمەن بىرگە بالالار الاڭىندا جۇرگەن كەزىندە ول ەكىنشى قاباتتاعى اشىق تەرەزە الدىندا وتىرعان بالانى بايقاپ قالادى. بالا تەرەزەدەن ويىنشىقتارىن لاقتىرىپ ويناپ وتىرعان.
«العاشىندا وعان «ۇيگە كىر» دەپ ايتتىم، ءبىراق تىڭدامادى. كەز كەلگەن ساتتە قۇلاپ كەتۋى مۇمكىن ەكەنىن ءتۇسىنىپ، دەرەۋ جۇگىرىپ باردىم»، - دەيدى توقان بايدىلدين.
ەر ادام ءبىرىنشى قاباتتاعى تەمىر تور ارقىلى جوعارى ورمەلەپ، ەكىنشى قاباتتىڭ بالكونىنا شىققان. سودان كەيىن تەرەزەگە جاقىنداپ، بالانىڭ اتا-اناسىن شاقىرعان. ۆيدەودا ونىڭ تار عانا بالكون جيەگىندە تۇرىپ، ايقايلاپ جاتقان ءساتى انىق كورىنەدى.
كەيىن بەلگىلى بولعانداي، بالا سول ساتتە اناسىمەن بىرگە ۇيدە بولعان. اناسى ءبىر ساتكە الاڭداپ قالعان. ەر ادامنىڭ ايتۋىنشا، اناسى بالانى قۇشاعىنا الىپ، تەرەزەنى بىردەن جاۋىپ تاستاعان. وسىدان كەيىن ول ەسىكتى قاعىپ، پاتەرگە كىرىپ، قاۋىپسىز تۇردە تومەن تۇسكەن.
«مەن ءۇشىن ەڭ باستىسى - ۇلگەرۋ بولدى. ءار سەكۋند ماڭىزدى ەدى. ءوزىم دە اتا بولعان سوڭ، ونى ءوز نەمەرەمدەي ۋايىمدادىم. ءوز باسىمنىڭ قاۋپى تۋرالى ويلاۋعا ۋاقىت بولمادى»، - دەيدى ول.
