ەكى ستۋدەنت سۋعا كەتتى: اقتوبەدەگى مەديتسينالىق ۋنيۆەرسيتەتتە قارالى كۇن جاريالاندى
اقتوبە. KAZINFORM - اقتوبەدە كەشە ەكى ادام سۋعا كەتتى. ەكەۋى دە مەديتسينالىق ۋنيۆەرسيتەتتىڭ ءتورتىنشى كۋرس ستۋدەنتتەرى. بۇگىن وقۋ ورنىندا ەكى ستۋدەنتتىك پورترەتى قويىلىپ، ءۇش كۇنگە قارالى كۇن جاريالاندى.
م. وسپانوۆ اتىنداعى باتىس قازاقستان مەديتسينا ۋنيۆەرسيتەتى جالپى مەديتسينا فاكۋلتەتىنىڭ 4-كۋرس ستۋدەنتتەرى ەلناز جولان مەن رافحات قايىرجانوۆ قارعالى وزەنىنەن شىعا الماي قالدى. ءبىرىنىڭ دەنەسىن سۇڭگۋىرلەر سول ساتتە تاۋىپ السا، ەكىنشىسىنىڭ دەنەسىن بۇگىن تاڭعى 03:20 دا تاپتى. ەكىنشىسىن ءوز تۋىستارى ىزدەپ، جاعاعا دەنەسىن شىعارعان.
- «كراسنايا پوليانا» باۋ-باقشا ۇجىمىندا ەكى ادامنىڭ سۋعا كەتكەنى بويىنشا اقپارات ءتۇستى. ساعات 13:58 دە ءبىرىنشى ادامنىڭ دەنەسىن جەدەل قۇتقارۋ جاساعىنىڭ قۇتقارۋشىلارى سۋدان شىعاردى. ەكىنشى ادامدى ەرىكتىلەر سۋدان (تۋىستارى) تۇنگى ساعات 03:20 دا تاپتى. قايتىس بولعان ەكى ادامدا 2003 -جىلى تۋعان، - دەپ حابارلادى وبلىستىق ت ج د باسپا ءسوز قىزمەتى.
كەيىن ەكى جىگىتتىڭ دە ستۋدەنت ەكەنى انىقتالدى. بۇگىن م. وسپانوۆ اتىنداعى باتىس قازاقستان مەديتسينا ۋنيۆەرسيتەتى باس عيماراتقا ەكى ستۋدەنتتىڭ فوتوسىن قويىپ، ءۇش كۇندى قارالى دەپ جاريالادى.
- ەلناز قاسىمحان ۇلى ىرعىز اۋدانىنىڭ، رافحات مۇقات ۇلى باتىس قازاقستان وبلىسىنىڭ تۋماسى. ەكەۋى دە وقۋ ۇلگەرىمدەرى جاقسى، قوعامدىق شارالارعا اتسالىسىپ جۇرگەن بەلسەندى دە ونەرلى ستۋدەنتتەر ەدى. وتە وكىنىشتى جاعداي. ەلناز بەن رافحاتتىڭ كەنەتتەن قازا بولۋىنا بايلانىستى اتا- اناسى، باۋىرلارى مەن اعايىن- تۋمالارىنىڭ جانە دوستارىنىڭ قايعىلارىنا ورتاقتاسىپ، كوڭىل ايتامىز. قايعىلى جاعدايعا بايلانىستى ۋنيۆەرسيتەتتە ءۇش كۇن قارالى دەپ جاريالاندى، - دەپ حابارلادى جوعارى وقۋ ورنىنىڭ باسپا ءسوز قىزمەتى.
