ەكى ەلدىڭ سەرىكتەستىگى ب ۇ ۇ، ش ى ۇ، ا ءو ءى س ش ك اياسىندا تابىستى دامىپ كەلە جاتىر - پرەزيدەنت

استانا. KAZINFORM - قازاقستان مەن قىتايدىڭ جاھاندىق قاۋىپسىزدىك پەن بەيبىتشىلىكتى نىعايتۋ جونىندەگى ۇستانىمدارى ورتاق. بۇل تۋرالى قىتاي حالىق رەسپۋبليكاسىنىڭ ءتوراعاسى شي جينپيڭمەن كەلىسسوزدەردەن كەيىنگى باسپا سوزگە ارنالعان مالىمدەمە بارىسىندا مەملەكەت باسشىسى قاسىم-جومارت توقايەۆ ايتتى.

«ءتوراعا شي جينپيڭ مىرزامەن ايماقتىق جانە جاھاندىق كۇن تارتىبىندەگى وزەكتى ماسەلەلەر جونىندە پىكىر الماستىق. بۇل باعىتتاعى ۇستانىمدارىمىزدىڭ ۇقساس ەكەنىنە نازار اۋداردىق. ءبىز كوپجاقتى ديپلوماتيانى ودان ارى نىعاتۋ قاجەتتىگىن اتاپ وتتىك. ەكى ەلدىڭ سەرىكتەستىگى ب ۇ ۇ، ش ى ۇ، ا ءو ءى س ش ك اياسىندا تابىستى دامىپ كەلە جاتىر. سونىمەن قاتار ءبىز ورتالىق ازيا+قىتاي ديالوگىن ودان ارى دامىتۋعا كەلىستىك. الەمدەگى داۋ-دامايدى بەيبىت جولمەن شەشۋ، گەوساياسي جاعدايدى تۇراقتاندىرۋ، سونداي-اق جاھاندىق قاۋىپسىزدىك پەن بەيبىتشىلىكتى نىعايتۋ جونىندەگى ۇستانىمدارىمىز ورتاق»، - دەدى پرەزيدەنت.

مەملەكەت باسشىسى بۇگىنگى كەلىسسوز ناتيجەلەرىن جوعارى باعالادى.

«قازاقستان مەن قىتاي اراسىنداعى قارىم-قاتىناستىڭ دەڭگەيى قاشاندا جوعارى. وسىلايشا، ءبىز ەكى ەلدىڭ اراسىنداعى ىنتىماقتاستىقتىڭ جاڭا كەزەڭىنە قادام باستىق. «التىن 30 جىلدىق» اياسىندا بيىك ماقسات- مىندەتتەردى تابىستى جۇزەگە اسىرامىز دەپ ۇمىتتەنەمىن. جاسالعان ءاربىر كەلىسىم ەكى ەلدىڭ تۇراقتى ءارى قاۋىپسىز دامۋىن قامتاماسىز ەتۋگە، حالىقتارىمىزدىڭ ءال-اۋقاتىن جاقسارتۋعا ارنالعان. قازاقتا «بايلىقتان ارتىق دوستىق بار. دوستىقتان ارتىق بايلىق جوق» دەگەن ءتامسىل بار. قىتايدا دا ءدال ناقىل ءسوز بار. ەكى ەلدىڭ تاريحي دوستىعى، تاتۋ كورشىلىككە نەگىزدەلگەن ىنتىماقتاستىعى جارقىن بولاشاق جولىنداعى قادامدارى باياندى بولسىن»، - دەدى قاسىم-جومارت توقايەۆ.