ەكى كۇن پاتەردە ۇرىپ-سوققان: بوپسالاۋشىلاردان قاشقان جىگىت 5-قاباتتان سەكىرىپ، اۋىر جاراقات الدى

استانا. KAZINFORM - ىشكى ىستەر مينيسترلىگى بوپسالاۋشىلار توبىن انىقتاۋعا جانە ولاردىڭ جولىن كەسۋگە ەرەكشە نازار اۋدارادى. جىل باسىنان بەرى ءى ءى م ۇيىمداسقان قىلمىسقا قارسى كۇرەس بولىنىستەرى 130 دان استام وسىنداي فاكتىنى انىقتاپ، جولىن كەستى. ونىڭ ىشىندە قىلمىستىق توپتار جاساعان فاكتىلەر دە بار، دەپ حابارلايدى Polisia.kz.

8-اقپاندا اۋىر قىلمىس جاسادى دەپ كۇدىككە ىلىنگەن قىزىلوردا وبلىسىنىڭ التى تۇرعىنى استانا - پاۆلودار اۆتوجولىندا ۇستالدى.

مىسالى، ولار ەكى تانىسىن كۇشتەپ كولىككە وتىرعىزىپ، پاتەرگە الىپ كەلىپ، ۇرىپ-سوعىپ، قارۋ-جاراقپەن قورقىتىپ، ەكى كۇن بويى ۇستاپ، 300 مىڭ تەڭگە مەن ۇيالى تەلەفوندارىن تارتىپ العان.

سونىمەن قاتار تاعى ءبىر ميلليون تەڭگە تالاپ ەتكەن. جابىرلەنۋشىلەردىڭ ءبىرى قاشپاق بولىپ، بەسىنشى قاباتتان سەكىرىپ كەتىپ، كوپ جاراقات الدى.

كۇدىكتىلەر ەكىنشى جابىرلەنۋشىنى كولىككە وتىرعىزىپ الىپ، ءىزىن سۋىتپاق بولعان كەزدە ۇستالدى. بۇل فاكتى بويىنشا قىلمىستىق كودەكستىڭ بىرنەشە بابىمەن قىلمىستىق ءىس تەرگەلىپ جاتىر.

ورالدا پوليتسيا قىزمەتكەرلەرى كوللەدج ستۋدەنتتەرىنەن قۇرالعان قىلمىستىق توپتى ۇستادى.

ولار بوپسالاۋ، توناۋ جانە الاياقتىقپەن اينالىسقان. اتالعان فاكتى بويىنشا سەگىز قىلمىستىق ءىس تەرگەلۋدە جانە كۇدىكتىلەردىڭ باسقا قىلمىستارعا قاتىسى بار-جوعىن انىقتاۋ بويىنشا شارالار قابىلدانۋدا.

اقمولا وبلىسىندا ەكى جاستار توبى اراسىنداعى قاقتىعىسقا توسقاۋىل قويىلدى.

وقيعا ورنىندا تراۆماتيكالىق جانە سۋىق قارۋ، دۋبينكالار، سونداي-اق سوققى جاساۋعا ارنالعان باسقا دا مەتال جانە اعاش زاتتار تابىلىپ، تاركىلەندى.

قازىرگى تاڭدا ءبىر توپ ادام جاساعان بۇزاقىلىق فاكتىسى بويىنشا ءىس قوزعالدى.

- بارلىق فاكتى بويىنشا كۇدىكتىلەر ۇستالدى. تەرگەۋ مۇددەسىندە وزگە اقپارات جاريالانبايدى. قۇرمەتتى ازاماتتار، ەگەر سىزدەر قىلمىستىق توپتار تاراپىنان قول سۇعۋشىلىققا تاپ بولساڭىزدار، دەرەۋ پوليتسياعا حابارلاسىڭىزدار. ءبىز ءسىزدىڭ اقپاراتىڭىزدىڭ قۇپيالىلىعىنا كەپىلدىك بەرەمىز جانە ءسىزدى قورعاپ، قاۋىپسىزدىگىڭىزدى قامتاماسىز ەتۋگە بار كۇش-جىگەرىمىزدى سالامىز، - دەدى دەپارتامەنت باستىعى - ءى ءى م رەسمي وكىلى شىڭعىس الەكەشەۆ.