ەكى جىلدا ەلىمىزدە قانت قىزىلشاسى القابى كەڭەيەدى
استانا. KAZINFORM - اۋىل شارۋاشىلىعى مينيسترلىگى قانت قىزىلشاسى القابى الداعى جىلدارى 40 مىڭ گەكتارعا جۋىقتايتىنىن ءمالىم ەتتى.
«بىلتىر قانت ءوندىرۋ كولەمى 221,1 مىڭ توننانى قۇرادى، بۇل 2022-جىلعى ۇقساس كەزەڭنىڭ كورسەتكىشىنەن %28 تومەن (2022- جىل - 282,8 مىڭ توننا) ۇكىمەت ەلىمىزدە قانت سالاسىن دامىتۋدىڭ 2022-2026-جىلدارعا ارنالعان كەشەندى جوسپارىن بەكىتتى. بۇل قۇجات اياسىندا قىزىلشاعا ارنالعان ەگىس القاپتارىن 38 مىڭ گەكتارعا دەيىن، وتاندىق شيكىزاتتان قانت ءوندىرۋ كولەمىن جىل سايىن 250 مىڭ تونناعا دەيىن جەتكىزۋ، يمپورت ۇلەسىن 58 پايىزدان 17 پايىزعا دەيىن تومەندەتۋ، وتاندىق شيكىزاتتى قايتا وڭدەۋ ەسەبىنەن قامتاماسىز ەتۋدى 7 پايىزدان 43 پايىزعا دەيىن ارتتىرۋ ەسكەرىلگەن»، - دەلىنگەن اۋىل شارۋاشىلىعى مينيسترلىگىنىڭ Kazinform اگەنتتىگىنە بەرگەن جاۋابىندا.
كەشەندى جوسپار بويىنشا قانت قىزىلشاسىن ءوسىرۋدى ىنتالاندىرۋ ءۇشىن قىزىلشانى وڭدەۋگە تاپسىرۋ كەزىندە سۋبسيديالار ءنورماتيۆى 15 مىڭ تەڭگەدەن 25 مىڭ تەڭگەگە دەيىن ۇلعايتىلدى. بۇل رەتتە، قايتا وڭدەۋگە تاپسىرىلعان قىزىلشاعا بەرىلەتىن سۋبسيديالار كولەمى بىلتىرعى 3,6 ميلليارد تەڭگەدەن بيىلعى 7,9 ميلليارد تەڭگەگە دەيىن ءوستى.
«سونداي-اق، قانت قىزىلشاسىن وسىرۋگە ارنالعان اۋىل شارۋاشىلىعى تەحنيكاسىنا ينۆەستيتسيالىق سۋبسيديالاردىڭ ۇلەسى 25 پايىزدان 50 پايىزعا دەيىن ءوستى. قىزىلشا وسىرۋشىلەر كوكتەمگى ەگىس جۇمىستارىنا جەڭىلدىكتى نەسيەلەر، جەڭىلدەتىلگەن ديزەل وتىنى، تۇقىمعا، تىڭايتقىشتار، وسىمدىكتەردى قورعاۋ قۇرالدارىنا سۋبسيديالار الادى. جىل سوڭىنا دەيىن وتاندىق شيكىزاتتان شامامەن 50 مىڭ توننا قانت ءوندىرۋ جوسپارلانعان»، - دەپ اتالىپ وتكەن ۆەدومستۆو اقپاراتىندا.
