كوزىڭىزدى تەكسەرەمىز دەپ «وتىرعىزىپ» كەتتى: كومپانيا زەينەتكەردىڭ اتىنان نەسيە راسىمدەگەن
وسكەمەن. KAZINFORM - مۇگەدەكتىگى بار بەردىبەك بىتىبايەۆقا الدەبىر كومپانيا ماسساج جاسايتىن كرەسلونى سىيعا تارتامىز دەپ، كەيىن نەسيەگە راسىمدەتكەن. الدانىپ قالعان ول نە تاۋاردى قايتارا الماي، نە اقشانى تولەي الماي دال. Kazinform ءتىلشىسى ماسەلەنىڭ مانىسىنە ءۇڭىلىپ كورگەن ەدى.
«كوزىڭىزدى تەكسەرىپ، كوزىلدىرىك بەرەمىز»
وسكەمەن قالاسىندا تۇراتىن بەردىبەك بىتىبايەۆ - اي سايىنعى زەينەتاقىسىنا كۇن كورىپ، قالت-قۇلت ەتىپ وتىرعان كوپ قازاقتىڭ ءبىرى. جاسى 65 تە. بالا كۇنىندە بيىكتەن قۇلاعان ونىڭ Ⅲ توپتاعى مۇگەدەكتىگى بار.
«اكەمنىڭ تەلەفونىنا حابارلاسقان بەيتانىس ادام ءوزىنىڭ ءبىر كومپانيادا جۇمىس ىستەيتىندىگىن ايتقان. الماتىدان وسكەمەنگە كەلەتىندىكتەرىن، كوزىن تەگىن تەكسەرىپ بەرەتىندىكتەرىن، ءتىپتى كوزىلدىرىك سىيلايتىندىقتارىن جەتكىزەدى. تەگىن دەگەن سوڭ ول قۋانىپ، كەلىسىلگەن ۋاقىتتا بارعان. قالاداعى مەيرامحانالاردىڭ بىرىندە ەكىنشى قاباتتاعى كەڭسەنى جالعا العان كومپانيا قىزمەتكەرلەرى اكەمدى قۇتتى قوناقتاي قارسى الىپتى. ءبىراق كوز جايىنا قالىپ، ماسساج جاسايتىن كرەسلونى كورسەتە باستاعان»، - دەيدى قىزى مادينا كارىموۆا.
ونىڭ ايتۋىنشا، كومپانيا ماماندارى اۋەلدە اكەسىنە ماسساجەردى، جاستىق پەن كورپەنى سىيعا تارتاتىندىقتارىن جەتكىزگەن. سالدەن سوڭ ول ءۇشىن كرەسلونى جەڭىلدىكپەن ساتىپ الۋ كەرەكتىگىن العا تارتقان.
«ەگەر قولدا اقشاڭىز بولماسا نەسيەگە راسىمدەپ بەرە الامىز. بانككە بارۋدىڭ قاجەتى جوق. تەك وسىندا قول قويساڭىز جەتكىلىكتى. اي سايىن 19 مىڭ تەڭگەگە جۋىق قانا تولەيسىز. ال كرەسلونىڭ ءسىزدىڭ دەنساۋلىعىڭىزعا بەرەرى مول. اقشادان دەنساۋلىق قىمبات قوي» دەپ اكەمنىڭ باسىن اينالدىرىپ، قول قويعىزىپ العان. اكەم قۇجات جاعىنان مۇلدە حابارى جوق، ءىشىن اشىپ وقىماعان. كوزى دە دۇرىس كورمەيدى. كوزىلدىرىك بەرەمىز دەگەننەن كەيىن بارىپ، نەسيە ارقالاپ كەلدى. «تەگىن ىرىمشىك تەك قاقپاندا» دەپ بەكەر ايتىلماعان عوي. ءبىراق قىزىقتىڭ كوكەسى بۇل عانا ەمەس ەكەن»، - دەيدى.
ارادا ءبىر ايعا جۋىق ۋاقىت وتكەندە كومپانيادان حابارلاسىپ، «نەسيەنى نەگە تولەمەي جاتىرسىز؟» دەگەن. بەردىبەك بىتىبايەۆ تولەگەنىن ايتقان. سول كەزدە كومپانيا قىزمەتكەرلەرى ونىڭ 63 مىڭ تەڭگە سوماسىندا ەكىنشى نەسيەنى تولەۋى تيىستىگىن جەتكىزىپتى.
«سويتسەك، الگىلەر ءبىر ەمەس ەكى نەسيە العىزىپ تاستاپتى. ناقتى سوماسىن ايتساق، ءبىرىنشىسى - 18850 تەڭگە، ەكىنشىسى - 63333 تەڭگە. اكەمە بۇل تۋرالى مۇلدە جاق اشپاي، الداپ قول قويعىزادى. مەن ولارعا «بۇلاي بولمايدى! تاۋارلارىڭىزدى قايتارىپ الىڭىزدار. اشىلماعان كۇيى تۇر» دەپ ەدىم، «جوق، تاۋاردى تەك 14 كۇن ىشىندە كەرى قايتارا الاسىزدار. ول مەرزىم ءوتىپ كەتكەن» دەپ جاۋاپ بەردى. ءاربىر قادامىن الدىن الا ويلاستىرىپ العان كومپانيا قايتارۋ مەرزىمى وتكەنىن توسىپ بارىپ اكەمە حابارلاستى. بۇل الاياقتىق ەمەي نەمەنە؟!» - دەيدى مادينا كارىموۆا.
ول پوليتسياعا ارىز تۇسىرگەندەرىن دە جەتكىزدى. ءبىراق ءتارتىپ ساقشىلارى ءىس قوزعاۋدان باس تارتقان.
«ءسىز ساتىپ الۋ جانە ساتۋ كەلىسىمشارتىن جاساسىپ، قول قويعانسىز. قۇجاتتا نەسيە تۋرالى كورسەتىلگەن»، - دەلىنگەن قالالىق پ ب ەرتىس پوليتسيا بولىمشەسى باستىعىنىڭ مىندەتىن اتقارۋشى ا. جۇمەكەنوۆتىڭ قولى قويىلعان جاۋاپ حاتتا.
بەردىبەك بىتىبايەۆ بىزگە «ءوزىنىڭ قول قويعانى ءۇشىن وكىنىشتىڭ كۇيىگى كوكىرەگىن شوقتاي قاريتىنىن، بارلىعى قىزىنىڭ ايتقانىنداي بولعانىن» راستاۋدان باسقا تۇك ايتا المادى. قازىردە اي سايىن الاتىن زەينەتاقىسى - 92 مىڭ تەڭگە. 18850 گە 63333 دى قوسساڭىز 82183 شىعادى.
«نەسيە تولەسەم ازىق-تۇلىككە، ءدارى-دارمەككە، كوممۋنالدىق قىزمەت پەن باسقا دا شىعىندارعا قالعان اقشانى قالاي جەتكىزەمىن؟» - دەيدى كوڭىلىن مۇڭ تورلاعان زەينەتكەر.
سوتقا شاعىمدانۋعا قۇقىلى
قۇجاتتارمەن مۇقيات تانىسىپ شىقتىق. كومپانيا اتاۋى - «Vip Events» ج ش س. ورنالاسقان مەكەنجايى - الماتى قالاسى. باسقا قالالاردا بولىمشەلەرى جوق. ماسساج جاسايتىن كرەسلونى بەردىبەك بىتىبايەۆقا 1210000 تەڭگەگە ساتىپتى. قۇجاتتاردىڭ ىشىندە بايلانىس تەلەفونى دا كورسەتىلگەن. سوعان حابارلاسىپ كوردىك. الايدا بىرنەشە كۇن بويى قوڭىراۋ مۇلدە بارمادى. مادينا بەردىبەك قىزىنان كومپانيامەن قالاي بايلانىسىپ جۇرگەنىن سۇراعانىمىزدا:
«ولارعا ءوزىڭ حابارلاسا المايسىڭ. قوڭىراۋ بارمايدى. تەك وزدەرى حابارلاسقان كەزدە عانا سويلەسەمىز»، - دەپ جاۋاپ بەردى.
سودان سوڭ اگەنتتىكتىڭ الماتىداعى تىلشىلەرى كومپانيانىڭ كەڭسەسىنە بارىپ كوردى. كەڭسە راسىمەن بار ەكەن. سەيفۋللين كوشەسىندە ورىن تەپكەن ساۋدا ۇيىندەگى كەڭسەدە بىرنەشە ادام وتىرادى. الايدا ولار بۇل سۇراقتارعا مۇلدە جاۋاپ بەرە المايتىندىقتارىن جەتكىزىپ، «وسىندا حابارلاسىڭىز» دەپ ۇيالى تەلەفون ءنومىرىن بەرەدى. الا سالا قوڭىراۋ شالدىم. ءبىراق تەلەفوندى كوتەرگەن ەر ادام «ونداي كومپانيانى مۇلدە بىلمەيتىنىن، مەن ءنومىردى شاتاستىرىپ العانىمدى» ايتتى.
وسى رەتتە، زاڭگەرمەن دە بايلانىسىپ، ءمان-جايدى بايانداپ كورگەن ەدىك.
«زەينەتكەرلەرگە قىسىم كورسەتىپ، الداپ نەمەسە جالعان اقپارات ايتىپ قول قويدىرىپ العان ادام زاڭ الدىندا جاۋاپ بەرەدى. سەبەبى، بۇل الاياقتىق بولىپ سانالادى. ول ءۇشىن جابىرلەنۋشى ادامدار تۇرعىلىقتى مەكەنجايلارى بويىنشا سوتقا بارىپ، ارىز جازۋى ءتيىس. سوتپەن كىناسى دالەلدەنسە، بەردىبەك بىتىبايەۆتىڭ اتىنا نەسيە العان كومپانيا وعان ءمورالدىق شىعىن رەتىندە سومانى تولىقتاي تولەپ بەرۋگە مىندەتتى»، - دەپ ءتۇسىندىردى زاڭگەر ديانا شاكيموۆا.
بەردىبەك بىتىبايەۆ ءدال وسىلاي ىستەيىن دەپ وتىر. نەسيەنى تولەمەي، كومپانيا اتىنا سوتقا شاعىم تۇسىرمەك. وقيعانىڭ ارى قاراي قالاي ءوربيتىنى ءبىزدىڭ نازارىمىزدا بولادى.
اۆتور
تالعاتجان مۇحامەتبەك ۇلى
