كوڭىل كۇيى جاقسى ادامداردىڭ مىسىعى دا باقىتتى بولادى - زەرتتەۋ

وكسيتوتسين الەۋمەتتىك بايلانىس پەن جاقىندىقتى قالىپتاستىرۋعا قاتىسادى. ادام مەن جانۋار اراسىنداعى مەيىرىمدى قارىم- قاتىناس كەزىندە ونىڭ دەڭگەيى جوعارىلاۋى مۇمكىن. ال كورتيزول اعزانىڭ كۇيزەلىسكە جاۋابىن رەتتەۋگە كومەكتەسەدى.

iScience عىلىمي جۋرنالىندا جاريالانعان زەرتتەۋگە كيوتو ۋنيۆەرسيتەتىنىڭ عالىمدارى 19 مىسىق يەسى مەن ولاردىڭ 29 ءۇي جانۋارىن تارتقان. گورمونداردى سالىستىرۋ ءۇشىن ءزار ۇلگىلەرىن جيناۋ مۇمكىن بولعان 24 مىسىق پەن 17 يەسىنىڭ دەرەكتەرى پايدالانىلدى. ءار قاتىسۋشىدان الىنعان ءۇش ءزار ۇلگىسىنىڭ ورتاشا كورسەتكىشى ەسەپتەلدى. سونىمەن قاتار، يەلەر سوڭعى بىرنەشە اپتاداعى كوڭىل كۇيى تۋرالى ساۋالناما تولتىرعان. مىسىقتاردىڭ قارعىباۋىنا تاعىلعان شاعىن Bluetooth قۇرىلعىلارى ولاردىڭ ءۇي ىشىندە يەلەرىنە قانشالىقتى جاقىن جۇرگەنىن باعالاۋعا مۇمكىندىك بەرگەن.

زەرتتەۋدىڭ جەتەكشى اۆتورى، كيوتو ۋنيۆەرسيتەتىنىڭ عالىمى ساحو تاكاگيدىڭ پىكىرىنشە، بۇل بايلانىستىڭ ءبىر سەبەبى مىسىقتى سيپاۋ مەن ونىڭ يەسىنىڭ ەركەلەتۋىنە جاۋاپ بەرۋى بولۋى مۇمكىن. مۇنداي ارەكەت كەزىندە ەكى تاراپتا دا وكسيتوتسين دەڭگەيى جوعارىلاپ، ولاردىڭ اراسىنداعى جاقىندىقتى نىعايتۋى ىقتيمال.

عالىمداردىڭ ايتۋىنشا، مىسىقتار مەن ادامدار اراسىندا جاقىن بايلانىس قالىپتاساتىنى بەلگىلى بولعانىمەن، ونىڭ فيزيولوگيالىق نەگىزدەرى ءالى دە جەتكىلىكتى زەرتتەلمەگەن. زەرتتەۋشىلەردىڭ مالىمەتىنشە، بۇعان دەيىنگى جۇمىستاردا مىسىقتار مەن ولاردىڭ يەلەرىندەگى وكسيتوتسين دەڭگەيى قاتار ولشەنبەگەن.

دەگەنمەن، عالىمدار گورمون كورسەتكىشتەرى باقىتتى نەمەسە كۇيزەلىستى تىكەلەي ولشەمەيتىنىن ەسكەرتەدى. وكسيتوتسين بوسانۋ مەن ءسۇت بولىنۋىنە دە قاتىسادى، سوندىقتان ونىڭ جوعارى دەڭگەيى ءاردايىم بايلانىس كۇشتى ەكەنىن بىلدىرمەيدى. ال كورتيزول مولشەرى تاۋلىك بويى تابيعي تۇردە وزگەرىپ وتىرادى.

زەرتتەۋ مىسىق پەن يەسىنىڭ گورموندىق كورسەتكىشتەرى اراسىندا بايلانىس بار ەكەنىن كورسەتكەنىمەن، ونىڭ ناقتى سەبەپتەرىن انىقتاۋ ءۇشىن قوسىمشا زەرتتەۋلەر قاجەت.