كونستيتۋتسيا بويىنشا ءار ادامنىڭ بوستاندىعى مەن قۇقىعى قالاي قورعالادى؟
استانا. KAZINFORM - قازاقستان كونستيتۋتسياسىندا ءار ادامنىڭ جەكە باس بوستاندىعى مەن جەكە باسىنا قول سۇعىلماۋ قۇقىعىنا كەپىلدىك بەرىلگەن. بۇل تالاپتار ازاماتتاردى زاڭسىز ۇستاۋدان قورعاۋعا، ولاردىڭ قۇقىقتارىن ساقتاۋعا جانە زاڭ ۇستەمدىگىن قامتاماسىز ەتۋگە باعىتتالعان.
كونستيتۋتسيانىڭ 18-بابىنا سايكەس، ادامدى سوت شەشىمىنسىز زاڭدا بەلگىلەنگەن مەرزىمنەن ارتىق ۇستاۋعا بولمايدى. ال كۇزەتپەن ۇستاۋعا تەك سوت شەشىمىمەن رۇقسات ەتىلەدى. سونىمەن قاتار ازاماتتىڭ مۇنداي شەشىمگە شاعىم جاساۋعا قۇقىعى بار.
ۇستالعان ادامعا قانداي قۇقىقتار ءتۇسىندىرىلۋى كەرەك؟
زاڭ تالاپتارىنا سايكەس، ادام ۇستالعان ساتتە وعان بوستاندىعىن شەكتەۋدىڭ نەگىزدەرى مەن ءوز قۇقىقتارى ءتۇسىندىرىلۋى ءتيىس. بۇل ازاماتتىڭ ءوز جاعدايىنان حاباردار بولۋىنا جانە زاڭدا كوزدەلگەن مۇمكىندىكتەرىن پايدالانۋىنا جول اشادى.
ماسەلەن، ادامدى ۇستاۋ كەزىندە وعان نەلىكتەن بوستاندىعى شەكتەلگەنى ءتۇسىندىرىلىپ، قۇقىقتارىن قورعاۋ ءتارتىبى تۋرالى اقپارات بەرىلۋى كەرەك. بۇل تالاپ قۇقىق قورعاۋ ورگاندارىنىڭ ارەكەتتەرى زاڭ اياسىندا جۇزەگە اسىرىلۋىنا ىقپال ەتەدى.
ادۆوكات كومەگىن پايدالانۋ قۇقىعى
كونستيتۋتسيانىڭ 18-بابىندا ۇستالعان ادامنىڭ، كۇدىكتىنىڭ جانە ايىپتالۋشىنىڭ ادۆوكات كومەگىنە جۇگىنۋ قۇقىعى دا بەكىتىلگەن. اتاپ ايتقاندا، ادام ۇستالعان، كۇدىكتى دەپ تانىلعان نەمەسە وعان ايىپ تاعىلعان ساتتەن باستاپ قورعاۋشىنىڭ كومەگىن پايدالانا الادى.
ادۆوكات ازاماتتىڭ زاڭدى مۇددەلەرىن قورعاۋعا، پروتسەستىك قۇقىقتارىن تۇسىندىرۋگە جانە ءتيىستى راسىمدەردىڭ زاڭ تالاپتارىنا ساي جۇرگىزىلۋىنە كومەكتەسەدى.
جەكە باس بوستاندىعى - نەگىزگى كونستيتۋتسيالىق قۇقىق
ادامنىڭ بوستاندىعى مەن جەكە باسىنا قول سۇعىلماۋى - قۇقىقتىق مەملەكەتتىڭ ماڭىزدى قاعيدالارىنىڭ ءبىرى. بۇل قۇقىقتى قورعاۋ ازاماتتاردىڭ زاڭ الدىنداعى قاۋىپسىزدىگىن قامتاماسىز ەتىپ، مەملەكەتتىك ورگانداردىڭ قىزمەتىنە قويىلاتىن زاڭ تالاپتارىن ايقىندايدى.
وسىلايشا، كونستيتۋتسيانىڭ 18-بابى ءار ادامنىڭ بوستاندىعىن قورعاۋعا، زاڭسىز ۇستاۋدىڭ الدىن الۋعا جانە ازاماتتاردىڭ ءوز قۇقىقتارىن زاڭ اياسىندا قورعاۋىنا نەگىز بولادى.
