«كوسموس-482» جەر وربيتاسىنان شىعىپ، ءۇندى مۇحيتىنا قۇلادى

استانا. KAZINFORM - «كوسموس-482» عارىش اپپاراتى جەر ماڭىنداعى كەڭىستىكتە 50 جىلدان استام ۋاقىت بولعان. وكىنىشكە قاراي ءۇندى مۇحيتىنا، دجاكارتانىڭ باتىسىنداعى ايماققا قۇلاپ، عارىش كەمەسىنىڭ ساپارى ءتامامدالدى، دەپ جازدى vz.ru.

1972-جىلى ۇشىرىلعان «كوسموس-482» اپپاراتى وربيتادان شىعىپ، ءۇندى مۇحيتىنا قۇلاعانى تۋرالى اقپارات «روسكوسموس» Telegram-ارناسىندا جاريالاندى.

سالا ماماندارىنىڭ مالىمەتىنشە، اپپارات ماسكەۋ ۋاقىتى بويىنشا تاڭعى 9:24 تە اتموسفەرانىڭ تىعىز قاباتتارىنا ەنىپ، ورتاڭعى اندامان ارالىنان 560 شاقىرىم باتىسقا قاراي ورنالاسقان نۇكتەدە جەرگە ءتۇستى. قۇلاۋ نۇكتەسى دجاكارتانىڭ باتىسىندا ورنالاسقان.

«كوسموس-482» - ءنىڭ وربيتادان شىعۋى جەر ماڭىنداعى كەڭىستىكتەگى قاۋىپتى جاعدايلار تۋرالى ەسكەرتۋ جۇيەسىنىڭ اۆتوماتتاندىرىلعان قۇرالدارىمەن باقىلانعان.

بۇل اپپارات ۆەنەرانى زەرتتەۋگە ارنالعان بولاتىن، الايدا ۇدەتكىش بلوگىنداعى اقاۋعا بايلانىستى جەر وربيتاسىنان شىعا الماي قالدى.

1972-جىلعى ءساتسىز ۇشىرىلىمنان كەيىن «كوسموس-482» جەردىڭ ەلليپستىك جوعارى وربيتاسىندا قالىپ قويدى. ونداعان جىل بويى ونىڭ تراەكتورياسى بىرتىندەپ تومەندەپ، اقىرىندا باقىلاۋسىز تۇردە وربيتادان شىعىپ، مۇحيتقا قۇلادى.

«ۆزگلياد» گازەتى جازعانداي، «روسكوسموس» باسپا ءسوز قىزمەتى بۇعان دەيىن «كوسموس-482» اپپاراتى 9-10-مامىردا جەر اتموسفەراسىنا ەنىپ، قۇلاۋى ەشقانداي قاۋىپ توندىرمەيتىنىن مالىمدەگەن بولاتىن.

بۇعان دەيىن امەريكالىق عارىش ساراپشىسى دجوناتان ماكداۋەل بۇل اپپاراتتىڭ 2019-جىلى جەرگە قۇلايتىنى جونىندەگى باتىس باسىلىمدارىنىڭ بولجامدارىن جوققا شىعارعان.

ايتا كەتەيىك، بۇعان دەيىن روسكوسموسقا جاڭا باسشىسى تاعايىندالعان بولاتىن.