كوسمەتولوگ: ەمدەلۋگە ءارتۇرلى كرەم الاتىن ادامداردىڭ كوبى - ماركەتينگ قۇربانى

استانا. قازاقپارات - بەتتەگى پيگمەنتتى داقتاردىڭ ادام اعزاسىنا قاۋىپتى ەكەنىن بىلەسىز بە؟ وسى رەتتە الماتىداعى Baq.kz ءتىلشىسى كوسمەتولوگ جاننا ابسەيەۆامەن پيگمەنتتى داقتاردان ارىلۋ جولدارى جايلى سۇحباتتاسقان ەدى.

كەيبىر ادامدا مەڭدەر وتە كوپ، باسقالارىندا از بولادى. كەيبىرەۋلەردىڭ تەرىسى سەكپىلگە بەيىم، باسقالارى بەيىم ەمەس. اڭگىمە بەتتەگى داقتاردان قۇتىلۋ جولدارى، ولاردىڭ ادام اعزاسىنا اسەرى تۋرالى ءوربىدى.

- بەتتەگى قارا داقتاردى ءۇي جاعدايىندا كەتىرىپ جاتادى. بۇل قانشالىقتى دۇرىس؟ بەت تەرىسىنە زاقىم كەلمەيدى مە؟

البەتتە، داعى بار ادام ءارتۇرلى پروتسەدۋرالاردى الىپ جاتادى. ماركەتينگتىڭ قۇربانى بولعان جاندار ءار الۋان كرەمدەردى جاعادى. ءۇي جاعدايىندا پايدالاناتىن كرەمدەر مەن سارىسۋ، بەت جۋعىش زاتتار پيگمەنتتى داقتاردى اعارتۋعا باعىتتالادى. بىلمەستىكپەن قولدانعان زاتتار تەرىس اسەر ەتەدى. ەڭ بىرىنشىدەن، تەرىنىڭ كەۋىپ كەتۋى پايدا بولادى. دۇرىس قىشقىلدى پايدالانباعان كەزدە، بەتىمىزدەگى قارا داقتار اعارىپ جاتقانداي بولادى. ودان كەيىن ول قارا داقتىڭ كولەمى ۇلعايىپ كەتۋى مۇمكىن. سوندىقتان ءۇي جاعدايىندا پايدالانسا دا، دارىگەر كوسمەتولوگتىڭ كەڭەسىن پايدالاناعان دۇرىس.

- پيگمەنتتى داقتار نە سەبەپتەن پايدا بولادى؟

داقتاردىڭ شىعۋ سەبەپتەرى ەكى ءتۇرلى بولادى. ءبىرىنشىسى - تۋا پايدا بولعان. ەكىنشىسى - جۇرە پايدا بولعان. تۋا پايدا بولعان داقتارعا ءبىز سەكپىلدى، مەڭدەردى جاتقىزامىز. وسى رەتتە ايتا كەتەرلىگى، جۇرە پايدا بولعان داقتار ايەل ادامعا جۇكتىلىك كەزىندە شىعادى. نەمەسە كوسمەتولوگيالىق پروتسەدۋرالاردان كەيىن، ءۇي جاعدايىندا پايدالانعان كرەمدەردىڭ سالدارىنان دا پايدا بولادى. سوندىقتان ءاربىر ادام ءوزىنىڭ بەتىندەگى، دەنەسىندەگى داقتاردىڭ قانداي پيگمەنت ەكەنىن انىقتاپ، ودان كەيىن ەم- دوم جاساعانى دۇرىس.

- پيگمەنتتى داقتاردىڭ قانداي تۇرلەرى بار؟ ونىڭ ىشىندە ەڭ ءقاۋىپتىسى نەمەسە ەمدەۋدى قاجەت ەتەتىن تۇرىنە توقتالا كەتسەڭىز.

ادام تەرىسىندەگى قارا داقتاردىڭ ەڭ كوپ تارالعان تۇرلەرى - سەكپىلدەر، حلوازما، مەڭدەر، جاس ۇلعايۋ پيگمەنتاتسياسى. پيگمەنتتەر جاي نەمەسە گيپەرپيگمەنتاتسيا دەپ بولىنەدى. ءارقايسىسىنا توقتالا كەتسەك، جاي دەگەنىمىز - بەتتە پيگمەنتتىڭ بولماۋى. ياعني، ونى اقتاڭداق دەپ اتايدى. ءبىزدىڭ تەرىمىزدەگى مەلاتونين پيگمەنتىنىڭ جەرگىلىكتى جەردە ۇيىقتاپ قالۋى. ەكىنشى گيپەرپيگمەنتاتسيا - ول قارا داقتىڭ پايدا بولۋى. ال ەڭ قاۋىپتىسى - ءوزىمنىڭ تاجىريبەمدە كەزدەسكەن de پيگمەنتاتسياسىنىڭ بولماۋى. ياعني پيگمەنتتىڭ جەرگىلىكتى نەلوماتسيكل كلەتكالارىنىڭ ۇيىقتاپ قالۋى. سەبەبى بۇل جاعدايلاردا الوپەتسيا، ۆيتيليگو دەگەن اۋرۋلار بولادى. باسقا دا ميكرو، ماكرو ەلەمەنتتەرىنىڭ جەتىسپەۋشىلىگى سالدارىنان كوپ بالانىڭ تەرىسىندە اقتاڭداق بولادى. بۇلاردىڭ دەنەدە بولۋىنان ازداعان قاۋىپ بار دەپ ايتار ەدىم. سەبەبى جەرگىلىكتى جەردە پيگمەنتتىڭ ۇيىقتاپ قالۋى ادام اعزاسىنا زيان بولىپ كەلەدى. de پيگمەنتاتسياسىن ەمدەيتىن ارنايى دەرماتولوگ ماماندارى بولادى. ارنايى ساۋلەلەر ارقىلى، ىشكە ءدارى قابىلداۋ ارقىلى ەمدەيدى. سونداي- اق بۇل ادامدارعا كۇن ساۋلەسى وتە ءقاۋىپتى سانالادى.

- داقتاردان قالاي ارىلۋعا بولادى؟ كوسمەتولوگ رەتىندە كەڭەستەرىڭىز بولسا.

پيگمەنتتى ەمدەپ جۇرگەن ادام كۇيزەلىسكە تۇسپەۋى قاجەت. ويتكەنى گيپەرپيگمەنتاتسيانى شاقىراتىن سەبەپتەر - ادامنىڭ ۋايىمعا بەرىلۋى. ايقىن سترەسس بولعان كەزدە، اعزادا گورموندىق وزگەرىستەر بولادى. مەلاتونين گورمونى دۇرىس بولىنبەسە، دۇرىس ۇيىقتاپ، ۋاقىتىلى تۇرماسا، پيگمەنتتەن ارىلۋ وتە قيىن بولادى. سەبەبى بۇنداي جاعدايدا جالپى اعزامىز زارداپ شەگەدى. مەلاناتسيتتەردىڭ دۇرىس بولىنبەۋى كوبىنەسە سترەسس شاقىرادى. سول سەبەپتەن سترەسس كەزىندە پيگمەنتاتسيانى كەتىرۋ وتە قيىن بولادى.

- دۇرىس تاماقتانباۋ بەت تەرىسىنە اسەر ەتەدى مە؟

البەتتە، بەت تەرىسىنە كەلگەندە، دۇرىس تاماقتانۋ وتە ماڭىزدى. ءبىز سۋدىڭ قۇرامىن دۇرىس ىشپەسەك تە، اعزاداعى تەرى زارداپ شەگەدى. تەرى ينديكاتور سەكىلدى، تەرىنىڭ شارشاۋى، ۇيقىنىڭ دۇرىس بولماۋى - بارلىعى اسەر ەتەدى. سوندىقتان پيگمەنتاتسياسى بار ادامدار بولسا، اسقازان-ىشەك جولدارىنىڭ، باۋىردىڭ قىزمەتىنە اسا ءمان بەرۋى قاجەت.