كورىكتى التاي تۋرالى سەريال تۇسىرىلگەن جەر تۋريزمنەن ون كۇندە 25 ميلليارد تەڭگە تابىس تاپتى

استانا. KAZINFORM - قىتاي قازاقتارىنىڭ تۇرمىس-تىرشىلىگى جايلى «مەنىڭ التايىم» شاعىن تەلەحيكاياسى تۇسىرىلگەن اسەم تابيعات جەرگىلىكتى تۋريزم سالاسىنىڭ دامۋىنا جاڭا سەرپىن بەرگەن.

Altxw.com سايتىنىڭ حابارلاۋىنشا، «مەنىڭ التايىم» سەريالى تۇسىرىلگەن بۋىرشىن جانە قابا اۋداندارىنا تۋريستەر كوپتەپ كەلە باستاعان.

ستاتيستيكاعا سەنسەك، 7-17-مامىر ارالىعىندا بۋىرشىن اۋدانى 445,5 مىڭ ساياحاتشى قابىلداپ (%68,04+)، تۋريزم سالاسىنداعى تابىسى 402 ميلليون (24,666 ميلليارد تەڭگە) يۋان بولدى (%64,15+).

ال قابا اۋدانىندا ەكى ايعا (مامىر جانە ماۋسىم) قوناق ۇيلەردە بوس ورىن جوق.

ايتا كەتەرلىگى، 2020-جىلى «كوك توعايداعى شوپان ءانى» اتتى ءان قىتايدا تانىمال بولىپ، التايدىڭ كوكتوعاي اۋدانىنا قىتايلىق تۋريستەر كوپتەپ اعىلعان بولاتىن.

ەسكە سالايىق، «مەنىڭ التايىم» اتتى 8 بولىمنەن تۇراتىن تەلەحيكايا 7-مامىر كۇنى قىتاي ورتالىق تەلەۆيزياسى CCTV-1 تەلەارناسىندا كوگىلدىر ەكرانعا شىعىپ، العاشقى كۇنى-اق قارالىمى ءبىرىنشى ورىنعا شىققان.

سونداي-اق، قىتايدىڭ ونلاين ۆيدەو پلاتفورماسىندا تەلەحيكايانى لعاشقى ەكى كۇندە 10 ميلليوننان اسا ادام تاماشالاعان.

«مەنىڭ التايىم» تەلەحيكاياسى جازۋشى لي جيۋۋاننىڭ شىعارمالار جەلىسى بويىنشا تۇسىرىلگەن.

باستى رولدەردە قىتايلىق تانىمال اكتەر ما يلي جانە چجوۋ يران، شىڭجاڭدىق قانداستارىمىز الما مەن قايرات وينايدى.

اۆتور مۇحتار قاليموللا ۇلى