كورەيادا تاعى ءبىر ۇشاق اۋەجايدان ۇشا المادى

استانا. قازاقپارات - وڭتۇستىك كورەيالىق Jeju Air اۋە كومپانياسىنىڭ ۇشاعى ىشكى رەيس ورىنداۋ كەزىندە شاسسيدەگى اقاۋعا بايلانىستى ۇشىپ شىققان اۋەجايىنا قايتا ورالدى. مۇنداي جاعداي بۇعان دەيىن مۋاندا اپاتقا ۇشىراعان ۇشاقتا بولعان ەدى، - دەپ حابارلايدى Massaget.kz ءتىلشىسى.

كيمپحو - چەدجۋ باعىتى بويىنشا رەيس ورىنداعان Boeing B737-800 ۇشاعى اۋەگە كوتەرىلگەننەن كەيىن كوپ ۇزاماي شاسسيدەگى اقاۋدى انىقتادى. وسىعان بايلانىستى ۇشاق ۇشىپ شىققان اۋەجايىنا قايتا قوندى.

ۇشاق بورتىندا 161 جولاۋشى بولعان. اۋە كومپانياسىنىڭ مالىمەتىنشە، رەيس باسقا ۇشاقپەن ورىندالادى.

وڭتۇستىك كورەياداعى ۇشاق اپاتى تۋرالى نە بەلگىلى؟
29-جەلتوقساندا وڭتۇستىك كورەياداعى ۇشاق اپاتى تاڭعى ساعات 9:07-دە (استانا ۋاقىتى بويىنشا 5:07-دە) بولدى. بورتتا 175 جولاۋشى مەن التى ەكيپاج مۇشەسى بولدى، ولار بانگكوكتان ورالعان.

اپات سالدارىنان ۇشاق ايتارلىقتاي زاقىمداندى، ءورت شىقتى. كەيىن توتەنشە جاعدايلار قىزمەتى ءورتتى ءسوندىرىپ، ىزدەۋ- قۇتقارۋ جۇمىستارى جۇرگىزىلىپ جاتقانىن حابارلادى.

جولاۋشىلار اراسىندا وڭتۇستىك كورەيانىڭ 173 ازاماتى جانە تايلاندتىڭ 2 ازاماتى بولعانى انىقتالدى. الدىن الا اقپاراتقا سايكەس لاينەر قونۋ كەزىندە قۇستارمەن سوقتىعىسقان. سونداي-اق قۇتقارىلعان ەكى ادامنان باسقالارى قازا تاپقان بولۋى مۇمكىن.