كورەيا پرەزيدەنتىنىڭ وزبەكستانعا ساپارى: تاراپتار 17 قۇجاتقا قول قويدى
تاشكەنت. KAZINFORM - وڭتۇستىك كورەيا پرەزيدەنتى يۋن سوك يەلدىڭ وزبەكستانعا جاساعان مەملەكەتتىك ساپارى اياسىندا 17 قۇجاتقا قول قويىلدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
يۋن سوك يەلدى وزبەكستانعا ساپارى «كوكساراي» رەزيدەنسياسىنداعى رەسمي كۇتىپ الۋ سالتاناتىنان باستالدى.
وزبەكستان پرەزيدەنتى شاۆكات ميرزيەۆ مارتەبەلى مەيماندى جىلى قارسى الدى. مەملەكەتتىك ءانۇراندار شىرقالدى، ارتىنشا ەكى ەل باسشىلارى رەسمي دەلەگاتسيا مۇشەلەرىمەن امانداستى.
سۋرەتكە ءتۇسۋ راسىمىنەن سوڭ مەملەكەت باسشىلارى شاعىن قۇرامدا كەلىسسوز وتكىزدى.
ونىڭ بارىسىندا ساياسي، ساۋدا-ەكونوميكالىق، تەحنولوگيالىق جانە باسقا دا ماڭىزدى سالالار بويىنشا ءوزارا ءىس-قيمىلدى ودان ءارى كەڭەيتۋ ماسەلەلەرى قارالدى.
وزبەكستان باسشىسىنىڭ باسپا ءسوز قىزمەتىنەن ءمالىم ەتكەندەي، رەسمي سەۋل تاشكەنتتىڭ جەتەكشى ساۋدا جانە ينۆەستيتسيالىق سەرىكتەستەرىنىڭ قاتارىنا كىرەدى. بىلتىر ءوزارا تاۋار اينالىمى 2,5 ميلليارد دوللارعا جەتىپ، كورەي ينۆەستيتسياسىنىڭ كولەمى 7,5 ميلليارد دوللاردان اسىپ ءتۇستى.
سونداي-اق، كەزدەسۋ اياسىندا تاراپتار ەكى ەلدىڭ الەۋەتىن نەعۇرلىم ءتيىمدى پايدالانۋ، ءىرى تەحنولوگيالىق جوبالاردى ىلگەرىلەتۋ جانە سەرىكتەستىكتىڭ جاڭا مودەلىن قالىپتاستىرۋعا ۋاعدالاستى.
بۇعان قوسا يۋن سوك يەل مەن شاۆكات ميرزيەۆ قاۋىپسىزدىك پەن قورعانىس سالاسىندا، ونىڭ ىشىندە كيبەرقىلمىس، تەرروريزم جانە ەكسترەميزممەن كۇرەس سالاسىندا تىعىز بايلانىس ورناتۋعا ەرەكشە نازار اۋداردى.
بۇل كەزدەسۋدەن سوڭ تاراپتار كەڭەيتىلگەن قۇرامدا كەلىسسوز جۇرگىزدى. وندا وزبەك-كورەي قاتىناستارىن ودان ءارى دامىتۋ جانە تەرەڭدەتۋ ماسەلەلەرى جان-جاقتى تالقىلاندى.
«وزبەكستانعا جاساعان مەملەكەتتىك ساپارىڭىزدى ءبىزدىڭ ەلمەن جانە وڭىرمەن كوپ جوسپارلى ىنتىماقتاستىقتى دامىتۋعا زور كوڭىل ءبولۋدىڭ تاعى ءبىر جارقىن دالەلى دەپ سانايمىز»، - دەدى شاۆكات ميرزيەۆ.
بۇگىنگى تاڭدا كورەيانىڭ قاتىسۋمەن وزبەكستاندا ەنەرگەتيكا، حيميا، اۆتوموبيل، ەلەكتروتەحنيكا، توقىما جانە باسقا دا سالالاردا 726 بىرلەسكەن كاسىپورىن ىسكە قوسىلعان.
كەلىسسوز بارىسىندا تاراپتار الداعى 3 جىلعا ارنالعان وزبەك-كورەي ارنايى ستراتەگيالىق سەرىكتەستىگىنىڭ جوعارى تەحنولوگيالارعا نەگىزدەلگەن جاڭا باعىتىن دامىتۋدىڭ ماڭىزدىلىعىن اتاپ ءوتتى.
شاۆكات ميرزيەۆ پەن يۋن سوك يەل اراسىندا وتكەن كەزدەسۋ قورىتىندىسى بويىنشا پرەزيدەنتتەر بىرلەسكەن مالىمدەمەگە جانە ەكىجاقتى 17 قۇجاتقا قول قويدى.
اۆتور
ءاليحان اسقار
