كورەيا قازاق سپورتشىلارىن قالاي قارسى الدى - ەكسكليۋزيۆ سۇحبات
استانا. KAZINFORM - ەرتەڭ، ياعني 19-قاڭتار كۇنى وڭتۇستىك كورەيانىڭ كانۆون قالاسىندا IV قىسقى جاس وسپىرىمدەر وليمپياداسىنىڭ الاۋى تۇتانادى. وسىعان وراي KAZINFORM ءتىلشىسى كانۆونعا سپورتشىلاردى باستاپ الىپ كەتكەن تۋريزم جانە سپورت ءمينيسترىنىڭ كەڭەسشىسى دياس احمەتشارىپكە ارنايى قوڭىرۋ شالىپ، اق وليمپيادا الدىنداعى دايىندىقتارى بارىسىندا سۇحبات الدى.
- وڭتۇستىك كورەيا سپورتشىلارىمىزدى قالاي قارسى الدى؟
- ۇلتتىق قۇراما استانادان الماتىعا، سوسىن الماتىدان سەۋىلگە امان-ەسەن ۇشىپ جەتتى. اۋەجايدان تۇسە سالىسىمەن ءبىزدى ەرىكتىلەر وتە جوعارى دەڭگەيدە كۇتىپ الدى. وليمپيادا ويىندارىنىڭ بويتۇمارلارى مەن نىشاندارى بەينەسىندە كيىنىپ العان ەرىكتىلەر وتە جاقسى قارسى الدى. سونداي-اق، قازاقستاننان الدىن الا كەلگەن شتاب وكىلدەرى بارلىعىمىزدى تۇگەندەپ، شاعىن كولىكتەرگە وتىرعىزىپ كانۆونعا الىپ باردى. سەۋىل مەن كانۆون اراسى 270 شاقىرىم ەكەن. جول بويىنداعى قىزمەت سەرۆيستەرىنە قاتتى تاڭعالدىق. كەلىپ جاتقان وليمپياداشىلارعا وتە جوعارى دەڭگەيدە ساپالى قىزمەت كورسەتەدى ەكەن. كانۆونعا جەتكەن بويدا بىردەن اككرەديتاتسيا ورتالىعىنا باردىق. سول جەردەن سپورتشىلار وزدەرىنىڭ، باسقا دەلاگاتسيا مۇشەلەرى وزدەرىنىڭ اككرەديتاتسيالارىن الىپ، قوناق ۇيلەرگە جايعاستىق. بارلىعىن وتە ىڭعايلى ورنالاستىرىپ قويىپتى.
- بارا قالعاندا وليمپياداشىلارىمىزدى تاڭعالدىرارلىق توسىن سىيلار بولدى ما؟
- سپورتشىلارىمىز وتە جوعارى كوڭىل كۇيدە بولدى. بارا سالىپ ەرىكتىلەر ءبىزدىڭ سپورتشىلارىمىزدى قۇشاقتاپ، بىرگە سۋرەتكە ءتۇسىپ، ءبىر-بىرىمەن جىلدام شۇيىركەلەسىپ جاتتى. مەنىڭ ءبىر تاڭعالعانىم ءبىزدىڭ ۇلتتىق قۇراما مۇشەلەرى اعىلشىن ءتىلىن وتە جاقسى بىلەدى ەكەن. قازىرگى جاس بۋىننىڭ ارتىقشىلىعى شەت تىلدەرىن وتە جاقسى مەڭگەرگەن. بارلىعى مەكتەپ وقۋشىلارى بولعان سوڭ اعىلشىن ءتىلىن جاقسى مەڭگەرگەن ەكەن. ءوز باسىم جاستارىمىزعا قاتتى ءتانتى بولدىم.
- سپورتشىلارىمىزعا وليمپيادانىڭ اۋراسى قالاي اسەر ەتىپ جاتىر؟
- حالىقارالىق وليمپيادالىق كوميتەتىنىڭ جاستار اراسىنداعى ويىنداردى ۇيىمداستىرۋداعى باستى ماقساتى - دۇنيەجۇزىندەگى بالالاردىڭ باسىن قوسىپ، بالالاردى ءبىر-بىرىمەن جاقىنداستىرۋ، ءبىر-بىرىمەن تانىستىرۋ. وسى سپورت ارقىلى تاتۋلىقتى، بەرەكەنى سەزىندىرۋ. «سپورت دوستىقتىڭ ەلشىسى» دەيدى عوي، وليمپيادالىق قوزعالىس وسى قاعيدانى ۇستانا وتىرىپ، جارىستى جوعارى دەڭگەيدە وتكىزۋدى كوزدەپ وتىر. وليمپيادالىق قالاشىقتا، قوناق ءۇيدىڭ ماڭىندا ۇلكەن-ۇلكەن ويىن الاڭدارىن اشىپ قويعان. بالالار جاتتىعۋدان تىس، بوس ۋاقىتتارىندا ءبىر-بىرىمەن تانىسىپ، نەشە ءتۇرلى ويىندار ويناپ جاتىر.
- سپورتشىلارىمىز تولىعىمەن بارىپ بولدى ما؟
- سپورتشىلارىمىزدىڭ 90 پايىزى كەلىپ بولدى. تەك شاڭعىشىلارىمىز عانا كەلگەن جوق. ولار اقمولا وبلىسى، چۋشە قالاسىندا سوڭعى وقۋ-جاتتىعۋ جيىندارىن وتكىزىپ جاتىر. بۇيىرسا 24-قاڭتار كۇنى ۇشىپ شىعىپ، 25-قاڭتاردا كورەياعا كەلەتىن بولادى.
- وليمپياداشىلارىمىز قازىر قوناقۇيلەرگە تولىعىمەن جايعاسىپ بولعان بولار. جاتىن ورىندار كوڭىلدەرىڭىزدەن شىعىپ جاتىر ما؟
- ءيا، ءبىز كەشە جۋرناليستەر بار، بارلىعىمىز بىرىگىپ، ارنايى وليمپيادالىق قالاشىققا بارىپ، سپورتشىلارىمىزدىڭ تۇرىپ جاتقان قوناقۇيلەرىمەن تانىسىپ، سۇحباتتاسىپ، تىلدەسىپ قايتتىق. قوناقۇيدىڭ ەرەكشەلىكتەرىنە قاراي ەكى، ءۇش، ءتورت ورىندىق بولمەلەر بار ەكەن. ەڭ باستىسى قوناقۇيلەر جىلى، تازا ەكەن. توسەك ورىندارى دا جۇمساق، مامىق جاستىق، جۋىناتىن بولمەلەرى دە وتە ىڭعايلى. نە كەرەك، بارلىعى ويلاستىرىلعان ەكەن.
- تاماق جاعى قالاي؟ اس مازىرىنە ۇيرەنىسىپ جاتىر ما؟
- تاماق جاعىنا كەلسەك، تاماقتىڭ سان ءتۇرى بار ەكەن. حالال تاماقتارى دا جەتەرلىك. بۇل جەردە تەك ازيا ەلدەرى عانا ەمەس، الەمنىڭ 70 مەملەكەتىنەن سپورتشىلار كەلىپ جاتقاندىقتان ءار قۇرلىقتىڭ، ءار ەلدىڭ ستيلىندە جاسالعان تاماقتار جيىنتىعى بار. كىم نەنى ءىشىپ-جەگىسى كەلەدى، ءبارى دايىن. ءاربىر قوناقۇيمەن تاماقتانۋ ورىندارىنىڭ ىرگەسىندە مەديتسينالىق ورتالىقتار ورنالاسىپتى. ءدامحانالار دا مەدپۋنكتتەر دە 24 ساعات بويى قىزمەت كورسەتىپ تۇر.
- اۋا رايى قالاي ەكەن؟
- قازىر اۋا رايى استانامىز سياقتى شاقىلداپ تۇرعان جوق. 5- گرادۋس كولەمىندە بولىپ تۇر. دەسە دە، ىلعال وتە كۇشتى ەكەن. قانشا دەگەنمەن، تەڭىزدىڭ جاعاسى عوي. بالالارىمىزعا جىلى، قالىڭ كيىنۋدى تاپسىردىق. ءبىزدىڭ ۇلتتىق قۇراماعا ارنايى تىگىلگەن فورمالار وتە جىلى، ىڭعايلى. سوندىقتان، ءبىزدىڭ سپورتشىلارىمىزعا سۋىق ءتيىپ قالادى دەپ اسا ءبىر قاۋىپتەنىپ وتىرعان جوقپىز.
- فورما تۋرالى ايتىپ قالدىڭىز عوي. ءبىزدىڭ سپورتشىلارىمىزدىڭ فورماسى وزگە ەلدىڭ سپورتشىلارىمەن سالىستىرعاندا قالاي كورىنىپ جاتىر؟
- ءبىزدىڭ قۇرامانىڭ فورماسى وتە ادەمى بولىپتى. ءتۇسى دە، فورماسى دا كەرەمەت. وزگە ەلدەن كەلگەن سپورتشىلار دا، ەرىكتىلەر دە ءبىزدىڭ سپورتشىلاردى ورتاعا الىپ سۋرەتكە ءجيى تۇسۋدە. ءبىزدىڭ بالالار اعىلشىنشا تاقيامىزدى تانىستىرىپ، كەز كەلگەن قىز-جىگىتتەرمەن ءتىل تابىسىپ كەتىپ جاتىر.
- جالپى، سپورتشىلارىمىز كورەياعا وليمپياداعا قاتىسۋ ءۇشىن بارعاندارىن قالاي سەزىنىپ جاتىر؟
- جارىسقا كەلگەنىمەن، كەلمەي جاتىپ، اكە- شەشەمدى ساعىنىپ كەتتىم دەگەن سپورتشىلارىمىز دا جوق ەمەس. ءبىزدىڭ قۇرامانىڭ كاپيتانى ەراسىل شىڭعىسحاننىڭ ءوزى ءۇيىمدى، اتا-انامدى ساعىندىم دەپ جاتىر. بالالاردىڭ قاسىنا بارىپ، اقىل كەڭەسىمىزدى ايتىپ، تۋىستارىنا ۆيدەو قوڭىراۋ جالعاپ، سويلەستىرىپ جاتىرمىز.
- جالپى ويىنعا دايىنسىزدار عوي. جۇلدەگە تالاسا الامىز با؟
- جارىسقا ساقاداي سايمىز. دەسە دە، جۇلدە الۋ وڭاي ەمەس. ءبىز حوككەيدەن، شاڭعى سپورتىنان باق سىنايتىن امەريكالىقتاردى، نورۆەگيالىقتاردى، نەمىس كوماندالارىن، اۋستريالىقتاردى، ەۋروپادان كەلگەن تاعى دا ءبىرقانشا كوماندالاردى كورىپ قالدىق. تۇگەلدەي ەڭگەزەردەي-ەڭگەزەردەي ازامات سياقتى كورىندى بىزگە. ال ءبىزدىڭ بالالار ولاردىڭ قاسىندا ءالى بالا سياقتى. مەكتەپ وقۋشىلارى دەگەنگە سەنگىڭ كەلمەيدى. ءبىراق ءبىزدىڭ سپورتشىلاردىڭ اراسىندادا جاقسى سپورتشىلارىمىز بار. بارلىعىن جارىس كورسەتەدى. قازاقتا «باق شابا ما، باپ شاباما» دەگەن بار. ءۇمىتىمىز زور. ەلىمىزگە مەدالمەن قايتساق دەگەن نيەتتەمىز.
- اڭگىمەڭىزگە راحمەت! جەڭىسپەن ورالۋلارىڭىزعا بىزدە تىلەكتەسپىز.
اۆتور كۇنسۇلتان وتارباي
