كورەي كومپانياسى تۇركىستان مەن اتىراۋ وبلىستارىندا گاز ەلەكتر ستانساسىن سالماقشى

استانا. KAZINFORM - مەملەكەت باسشىسى قاسىم-جومارت توقايەۆ قازاقستان- كورەي بيزنەس فورۋمىندا ەكىجاقتى بايلانىس ەنەرگەتيكا سالاسىنداعى تەحنولوگيالار كووپەراتسياسىنا ۇلاسقانىن قولدايتىنىن ءمالىم ەتتى.

«جاھاندا ەنەرگەتيكا كوزدەرىنىڭ اۋىسىپ جاتقانىنا بايلانىستى جاسىل ەنەرگەتيكا سالاسىندا ارىپتەستىك اياسىن كەڭەيتۋ بارعان سايىن وزەكتى بولىپ كەلەدى. بۇگىندە قازاقستاننىڭ بالامالى ەنەرگەتيكا سالاسىنداعى ايتارلىقتاي الەۋەتى كوپتەگەن جاھاندىق ويىنشىلاردىڭ نازارىن اۋدارىپ وتىر. وڭتۇستىككورەيالىق كومپانيالارمەن وسى باعىتتاعى ىقپالداستىق تاجىريبە الماسۋدان ناقتى جوبالاردى ىسكە اسىرۋعا، تەحنولوگيالار ترانسفەرتىنە دەيىن جوسپارلى تۇردە كەڭەيتىلەتىنىنە ۇمىتتەنەمىز»، - دەدى پرەزيدەنت.

قاسىم-جومارت توقايەۆتىڭ ايتۋىنشا، قازاقستان ەنەرگيانىڭ ءداستۇرلى كوزدەرىن دامىتۋعا دا مۇددەلى.

«سوندىقتان Doosan Enerbility كومپانياسىنىڭ تۇركىستان جانە اتىراۋ وبلىستارىندا گاز ەلەكتر ستانساسىن سالۋ جوسپارىن قولدايمىز»، - دەدى مەملەكەت باسشىسى.