كوروناۆيرۋستان ساقتانۋ ءۇشىن قانداي تالاپتاردى ورىنداعان ءجون

قىزىلوردا. KAZINFORM - ەل تۇرعىندارى اراسىندا كوروناۆيرۋس ينفەكسياسى ءالى دە بوي كورسەتىپ وتىر. الەمدى جايلاعان پاندەميانى كوپشىلىك ۇمىتا قويعان جوق. ودان ساقتانۋ جولى قانداي؟ وسى ورايدا قىزىلوردا وبلىسى سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى ءاليا ءابدىقايىموۆانى اڭگىمەگە تارتقان ەدىك.

- كەزىندە كوروناۆيرۋس ينفەكسياسى ەلدى دۇربەلەڭگە سالدى. قاتەرلى دەرتتىڭ بۇگىندە بەتى قايتقانمەن، حالىق اراسىندا بوي كورسەتىپ جاتقانى بەلگىلى. ودان ساقتانۋ جولى قانداي؟

- پاندەميا كەزىندە ول جايىندا حالىققا كەڭىنەن ماعلۇمات بەرىلدى. ول جونىندە كوپشىلىك حاباردار دەگەن ويدامىن. وزدەرىڭىز بىلەتىندەي، اتالعان اۋرۋ ۆيرۋس تۋدىرادى. ناۋقاس ادام جوتەلگەندە، تۇشكىرگەندە، سويلەگەندە اۋا تامشىلارى ارقىلى سىرتقى ورتاعا ءبولىنىپ شىعادى.

ۆيرۋسقا شالدىققان ادامداردىڭ باسىم بولىگىندە اۋرۋدىڭ جەڭىل نەمەسە ورتاشا كلينيكالىق بەلگىسى بولۋى مۇمكىن. ولار ارنايى ەمدى قاجەت ەتپەستەن اۋرۋدان ايىعىپ جاتادى.

دەگەنمەن كەيبىر ادامداردا بۇل اۋرۋ اۋىر اعىمدا، اسقىنۋىمەن وتەتىنىن ەسكەرسەك، مەديتسينالىق ارالاسۋدى قاجەت ەتەدى. قاۋىپ توبىنا ەگدە جاستاعى ادامدار جانە قوسىمشا اۋرۋى بار، ياعني جۇرەك- قان تامىرى، سوزىلمالى رەسپيراتورلى، ونكولوگيالىق جانە قانت ديابەتى بار ناۋقاستار جاتقىزىلادى.

- ۆيرۋستى تاراتپاي، جۇقتىرۋ قاۋپىن تومەندەتۋ ءۇشىن قانداي تالاپتارعا نازار اۋدارۋىمىز كەرەك؟

- ەڭ جاقسى ءتاسىلى - ادامدارعا اۋرۋ تۋرالى جانە ونىڭ قوزدىرعىشىنىڭ تارالۋ مەحانيزمى تۋرالى حاباردار ەتۋ. ءوزىڭىزدى جانە باسقا ادامداردى ينفەكسيادان قورعاۋ ءۇشىن مىناداي تالاپتارعا نازار اۋدارۋىڭىزدى سۇرايمىز. قول جۋۋ گيگيەناسىن ساقتاۋ، ءجيى سابىنداپ جۋىپ، زالالسىزداندىرۋ انتيسەپتيكتەر قولدانۋ قاجەت. تۇشكىرۋ، جوتەلۋ گيگيەناسىن ساقتاۋ، ادامدار كوپ جينالاتىن ورىندارعا بارۋدى مەيلىنشە شەكتەپ، الەۋمەتتىك اراقاشىقتىق ساقتاعان ءجون.

سونداي-اق، ناشار جەلدەتىلەتىن ورىنداردا بەتپەردەلەر پايدالانۋ، ينفەكسياعا قارسى ۆاكسينالاۋدان ۋاقىتىلى ءوتۋ، دارىگەرلەرلەردىڭ نۇسقاۋلارىن ورىنداۋ، ۆيرۋس جۇقتىرعان ادامدارعا كۇتىم جاساعاندا سانيتاريالىق- ەپيدەميولوگيالىق شارالاردى ورىنداۋ ارتىق ەمەس.

- قىزىلوردا وبلىسىندا كوروناۆيرۋس ينفەكسياسىنىڭ تارالۋ جاعدايى قالاي بولدى؟

- قىزىلوردا وبلىسى بويىنشا كوروناۆيرۋس ينفەكسياسى بويىنشا ەپيدەميولوگيالىق احۋال تۇراقتى. سالىستىرمالى تۇردە ايتساق، ول كەيىنگى كەزەڭدە 2022 -جىلدان 55 ەسەگە تومەندەگەن.

بىلتىر وبلىس بويىنشا كوروناۆيرۋس ينفەكسياسىن جۇقتىرۋدىڭ 118 دەرەگى انىقتالدى.

ونىڭ ىشىندە 14 جاسقا دەيىنگى بالالار ۇلەسى - 47 دەرەك. باسىم بولىگى اۋرۋ سيمپتومىمەن انىقتالدى. جىل باسىنان بەرى اۋرۋعا شالدىعۋدىڭ 4 جاعدايى تىركەلدى.

 

اۆتور

ءادىلجان ۇمبەت