كورشىسىنىڭ اۋلاسىنان 3 قوي ۇرلاعان اتىراۋلىق 5 جىلعا سوتتالدى
اتىراۋ. KAZINFORM - اتىراۋ وبلىسىنىڭ تۇرعىنى كورشىسىنىڭ اۋلاسىنان 3 قويدى ۇرلاپ كەتكەن. سوت ۇكىمىمەن كۇدىكتى 5 جىلعا باس بوستاندىعىنان ايىرىلدى.
جىلىوي اۋداندىق سوتىندا مال ۇرلاعان كۇدىكتىگە قاتىستى قىلمىستىق ءىس قارالدى. سوتتالۋشىعا ق ر قىلمىستىق كودەكسىنىڭ 188-1-بابىنىڭ 3-بولىگىنىڭ 2-تارماعىمەن ايىپ تاعىلعان.
«اۋداندىق سوتتىڭ تالقىلاۋى كەزىندە قۇلسارى قالاسىنىڭ تۇرعىنى ك.-نىڭ 2023 -جىلعى 7-جەلتوقساندا كورشىسىنىڭ قورشالعان مال قوراسىنىڭ اۋلاسىنا كىرىپ، 3 قويدى ۇرلاعانى انىقتالدى. ول ۇرلانعان مالدى ساتىپ، تۇسكەن اقشانى سپيرتتىك ىشىمدىك ساتىپ الۋعا جۇمساعان. سوت جازا تاعايىنداۋ بارىسىندا ك.-نىڭ بۇرىن جىلىوي اۋداندىق سوتىنىڭ 2020 -جىلعى 2-ناۋرىزداعى ۇكىمىمەن ق ر قىلمىستىق كودەكسىنىڭ 106-بابىنىڭ 1-بولىگىمەن (دەنساۋلىققا قاساقانا اۋىر زيان كەلتىرۋ) اۋىر قىلمىس جاساعانى ءۇشىن سوتتالعانىن ەسكەردى. قىلمىس جاسالعان كەزدە كەلتىرىلگەن ماتەريالدىق زالال وتەلمەگەن»، - دەپ حابارلادى سوتتىڭ باسپا ءسوز قىزمەتى.
جىلىوي اۋداندىق سوتى ك.-نى كىنالى دەپ تانىپ، 5 جىل مەرزىمگە باس بوستاندىعىنان ايىرۋ جازاسىن تاعايىندادى.
سوت ۇكىمى زاڭدى كۇشىنە ەنگەن جوق.
ەسكە سالا كەتەلىك، بۇدان بۇرىن اتىراۋلىق جۋرناليست ۆيكتور سۋتياگيننىڭ كولىگىن ورتەگەن جىگىت 5 جىلعا سوتتالعانىن حابارلاعان بولاتىنبىز.
اۆتور
جولداسبەك شوپەعۇل
