كونور ماكگرەگور سپورتتان 18 ايعا شەتتەتىلدى
استانا. قازاقپارات - UFC ءدىڭ بۇرىنعى ەكى دۇركىن چەمپيونى كونور ماكگرەگور دوپينگكە قارسى ساياساتتى بۇزعانى ءۇشىن سپورتتان شەتتەتىلگەنى انىقتالدى. بۇل تۋرالى ا ق ش- تىڭ دوپينگكە قارسى اگەنتتىگىنىڭ (USADA) باسپا ءسوز قىزمەتى حابارلادى.
UFC سايتىندا جاريالانعان اقپاراتقا سايكەس، ماكگرەگور 2024 -جىلى 12 اي ىشىندە ءۇش بيولوگيالىق ۇلگى الۋ ارەكەتىن وتكىزىپ العان، بۇل بۇزۋشىلىق بولىپ سانالادى.
UFC سپورتشىلارى ولارمەن بايلانىسۋعا جانە الدىن الا ەسكەرتۋسىز بيولوگيالىق ۇلگىلەردى جىبەرۋگە بولاتىنداي ءارقاشان ناقتى ورنالاسقان جەر تۋرالى اقپاراتتى ۇسىنۋى قاجەت.
يرلانديالىق سپورتشى 2024 -جىلدىڭ 13-ماۋسىمىندا، 19-قىركۇيەكتە جانە 20-قىركۇيەكتە بيولوگيالىق ۇلگىلەرىن تاپسىرمادى.
الايدا بۇرىنعى چەمپيون جاۋاپكەرشىلىكتى مويىنداپ، تەرگەۋمەن تولىق ىنتىماقتاستىق ورناتتى. سوندىقتان ستاندارتتى ەكى جىلدىق ديسكۆاليفيكاتسيا 18 ايعا دەيىن قىسقارتىلدى.
ونى ديسكۆاليفيكاتسيالاۋ مەرزىمى 2024 -جىلدىڭ 20 -قىركۇيەگىندە (ورنالاسقان جەرى تۋرالى اقپارات ۇسىنۋ ءتارتىبىن ءۇشىنشى رەت بۇزعان كۇنى) باستالىپ، 2026 -جىلدىڭ 20- ناۋرىزىندا اياقتالادى.
ەسكە سالا كەتسەك، كونور ماكگرەگور يرلاندياداعى پرەزيدەنتتىك سايلاۋدان ءوز كانديداتۋراسىن الىپ تاستايتىنىن مالىمدەدى.
