كونگونىڭ ەكس-پرەزيدەنتى دجوزەف كابيلا سىرتتاي ءولىم جازاسىنا كەسىلدى
استانا. KAZINFORM - كونگو دەموكراتيالىق رەسپۋبليكاسىنىڭ (ك د ر) اسكەري سوتى ەكس-پرەزيدەنت دجوزەف كابيلانى سىرتتاي ءولىم جازاسىنا كەستى، دەپ حابارلايدى DW.
ك د ر استاناسى كينشاساداعى سوت وتىرىسىنا قاتىسپاعان جانە ادۆوكاتى بولماعان 54 جاستاعى كابيلا اسكەري قىلمىس، مەملەكەتكە وپاسىزدىق جانە ادامزاتقا قارسى قىلمىس جاساعانى ءۇشىن كىنالى دەپ تانىلدى. بۇل ءىس ونىڭ ك د ر ۇكىمەتى مەن تۋتسي ەتنيكالىق ازشىلىعىنىڭ مۇددەسىن قورعايتىن جانە كورشى رۋاندانىڭ اسكەريلەرى قولدايتىن 23-ناۋرىزداعى (M23) كوتەرىلىسشىلەر توبى اراسىنداعى قاقتىعىستاعى رولىنەن تۋىنداپ وتىر.
قاڭتار مەن اقپان ايلارى ارالىعىندا M23 كوتەرىلىسشىلەرى ەلدىڭ شىعىسىندا كەڭ اۋقىمدى شابۋىلدار جۇرگىزىپ، رۋاندامەن شەكاراداعى كەڭ اۋماقتاردى جەڭىلگەن كونگو ارمياسىنان قايتارىپ الدى. قازىرگى ك د ر پرەزيدەنتى فەليكس سيسەكەدي كابيلا بۇل توپتى ىنتالاندىردى دەپ مالىمدەدى.
كابيلا تاعىلعان ايىپتاردى جوققا شىعارادى.
ەكس-پرەزيدەنت تاعىلعان ايىپتاردى جوققا شىعارىپ، سيسەكەدي ۇكىمەتىن ديكتاتۋرا دەپ اتادى. 2001-2019 -جىلدار ارالىعىندا بيلىكتە بولعان دجوزەف كابيلانىڭ قايدا ەكەنى ازىرگە بەلگىسىز. ول 2023 -جىلى ەلدەن كەتىپ، ۋاقىتىنىڭ كوپ بولىگىن وڭتۇستىك افريكادا وتكىزگەن. وسى جىلدىڭ مامىر ايىندا ول كۇتپەگەن جەردەن سولتۇستىك كيۆۋ پروۆينسياسىنىڭ استاناسى جانە M23 تىرەگى گومادا قايتا پايدا بولدى.
سونداي-اق كابيلا مەملەكەت پەن سولتۇستىك جانە وڭتۇستىك كيۆۋدىڭ شىعىس پروۆينسيالارىنا شامامەن 33 ميلليارد دوللار (28 ميلليارد ەۋرو) وتەماقى تولەۋگە مىندەتتەلدى.
