ەكونوميكامىزدى دامىتۋعا ارنالعان ءبىرقاتار ماڭىزدى زاڭدار قارالادى - سەنات ءتوراعاسى
استانا. KAZINFORM - سەنات ءتوراعاسى ماۋلەن اشىمبايەۆ مەملەكەت باسشىسىنىڭ «Ana tili» گازەتىنە بەرگەن سۇحباتىنا قاتىستى پىكىر ايتتى.
- تاياۋدا «انا ءتىلى» گازەتىندە پرەزيدەنتىمىز قاسىم - جومارت كەمەل ۇلى توقايەۆتىڭ كولەمدى سۇحباتى جاريالاندى. وزدەرىڭىز وڭىرلەردە ازاماتتارمەن كەزدەسۋلەر وتكىزىپ، سۇحباتتىڭ نەگىزگى ويلارىن حالىققا جەتكىزۋگە ۇلەس قوستىڭىزدار. مەملەكەت باسشىسى سۇحباتتا 2024 - جىلى ءار سالا بويىنشا اتقارىلعان جۇمىستاردى قورىتىندىلاپ، الداعى باسىم باعىتتاردى بەلگىلەپ بەردى. سونداي- اق، بىلتىر پارلامەنت قابىلداعان زاڭداردىڭ ماڭىزدىلىعى دا ەرەكشە اتالىپ ءوتتى.
جالپى، پرەزيدەنتىمىزدىڭ بارلىق باستامالارى مەن رەفورمالارىنىڭ ستراتەگيالىق ماقساتى - ەگەمەندىگىمىزدى جانە ەكونوميكامىزدى ودان ءارى نىعايتۋ. وسىعان بايلانىستى ەلىمىزدىڭ الەۋمەتتىك- ەكونوميكالىق دامۋىنا قاتىستى ماڭىزدى ساۋالدارعا جاۋاپ بەرىلىپ، مەملەكەتتىك ساياساتتىڭ نەگىزگى باعىتتارى ايقىندالدى، - دەدى م. اشىمبايەۆ سەناتتىڭ جالپى وتىرىسىندا.
سەنات ءتوراعاسى اتالعان سۇحباتتا سىرتقى ساياسات پەن حالىقارالىق ىنتىماقتاستىق ماسەلەلەرى دە نازاردان تىس قالماعانىن اتاپ ءوتتى.
- سونىمەن قاتار، پرەزيدەنتىمىز قوعامدا قىزۋ تالقىلانعان وزەكتى ماسەلەلەردىڭ ءتۇيىنىن تارقاتىپ، ولار بويىنشا ءوز ۇستانىمىن ءبىلدىردى. مۇنداي اشىقتىق پەن ديالوگ جانە ازاماتتاردىڭ تالاپ- تىلەكتەرىنە جەدەل نازار اۋدارۋ - «زاڭ مەن ءتارتىپ» قاعيداتتارىنا تابان تىرەگەن ادىلەتتى قازاقستاننىڭ جارقىن كورىنىسى ەكەنى ءسوزسىز. وسى رەتتە، پرەزيدەنتىمىزدىڭ باستاماسىمەن قولعا الىنعان رەفورمالاردى زاڭنامالىق تۇرعىدان قامتاماسىز ەتۋ اسا ماڭىزدى ەكەنىن تاعى ءبىر اتاپ وتكەن ءجون.
الداعى ۋاقىتتا ەكونوميكامىزدى دامىتۋعا جانە حالىقتىڭ ءال- اۋقاتىن ارتتىرۋعا ارنالعان ءبىرقاتار ماڭىزدى زاڭدار قارالادى. ولاردى ساپالى پىسىقتاپ، ۋاقتىلى قابىلداۋىمىز قاجەت. جالپى، مەملەكەت باسشىسىنىڭ پارلامەنتكە ارتقان جوعارى سەنىمىن اقتاپ، ەلدىك مۇددە جولىندا ايانباي ەڭبەك ەتۋمىز كەرەك. وسى جولدا ءبارىمىز بىرلەسىپ، ناتيجەلى جۇمىس ىستەيمىز دەپ سەنەمىن جانە الداعى قىزمەتتەرىڭىزگە ساتتىلىك پەن تابىس تىلەيمىن!»، - دەدى ماۋلەن اشىمبايەۆ سەناتورلارعا قاراتا ايتقان سوزىندە.
ەسكە سالساق، 2025 -جىلدىڭ 3- قاڭتار كۇنى «انا ءتىلى» گازەتىندە مەملەكەت باسشىسى قاسىم- جومارت توقايەۆتىڭ كەڭ كولەمدى سۇحباتى جارىق كورەدى.
