كومەك سۇراۋدان قورىقپاڭىزدار: ءى ءى م بالالارعا ۇندەۋ جاسادى

استانا. KAZINFORM - ىشكى ىستەر مينيسترلىگى اتا- انالار مەن بالالارعا ۇندەۋ جاسادى، دەپ حابارلايدى Polisia.kz.

- قۇرمەتتى قازاقستاندىقتار! اتا- انالار مەن بالالار!

بالالىق شاقتى قورعاۋ - مەملەكەتتىك ساياساتتىڭ باسىم باعىتى. بالالار - ءبىزدىڭ تىرەگىمىز، ەلدىڭ بولاشاعى. ولاردىڭ قاۋىپسىزدىگى - قوعامنىڭ ورتاق جاۋاپكەرشىلىگى جانە دە ىشكى ىستەر مينيسترلىگىنىڭ باستى مىندەتى. بۇل باعىتتا ناقتى شارالار قابىلدانۋدا.

يۋۆەنالدى پوليسيانىڭ جۇمىسى كۇشەيتىلدى. پاترۋل ناريادتارى ءبىلىم ۇيىمدارىنا جاقىن قويىلدى. اكىمدىكتەرمەن بىرلەسىپ، مەكتەپ ماڭىنداعى جول ينفراقۇرىلىمىن جاقسارتۋدامىز. زاڭناما جاڭا تالاپتارعا ساي پىسىقتالۋدا. كامەلەتكە تولماعاندارعا قاتىستى قىلمىستار ءۇشىن جاۋاپتىلىق كۇشەيدى. بۋللينگ پەن قۋدالاۋعا قارسى قۇقىقتىق شارالار ەنگىزىلدى. سەنىم تەلەفوندارى ارقىلى بالالار مەن اتا-انالار كەز كەلگەن ۋاقىتتا كومەك الا الادى.

بۇگىندە كوپتەگەن جاس ءوسپىرىم قوعامعا قىزمەت ەتۋ جولىن تاڭداۋدا. مەكتەپتەردە «جاس ساقشى» پوليتسيا سىنىپتارى اشىلىپ جاتىر. وندا بالالار جاستايىنان زاڭدى مەڭگەرىپ، جاۋاپكەرشىلىككە ۇيرەنۋدە. ءبىرقاتارى ەرىكتى تۇردە جوبالارعا قاتىسىپ، ءتارتىپتىڭ ساقتالۋىنا ۇلەس قوسۋدا. بۇل - ناعىز پاتريوتيزمنىڭ بەلگىسى. ءبىز ولاردى ماقتان تۇتامىز.

دەگەنمەن دە اتا- انانىڭ قامقورلىعى مەن ۇستازدىڭ قولداۋىن ەشتەڭە الماستىرا المايدى.

وتباسى مەن مەكتەپ - بالانىڭ العاشقى التىن ۇياسى. سوندىقتان اتا- انالار مەن ۇستازداردىڭ بالالارعا ءاردايىم جاقىن بولىپ، كوڭىل ءبولۋى ماڭىزدى.

ال، بالالار، سىزدەرگە ايتارىم - كومەك سۇراۋدان قورىقپاڭىزدار! پوليسيا - سىزدەردىڭ قورعاندارىڭىز! ءبىز سىزدەر قاۋىپسىز ورتادا ءومىر ءسۇرۋ ءۇشىن قىزمەت ەتەمىز. بالالىق شاقتارىڭىز قۋانىشقا، ال بولاشاقتارىڭىز جارقىن ساتتەر مەن مۇمكىندىكتەرگە تولى بولسىن! - دەدى ءى ءى م اكىمشىلىك پوليسيا كوميتەتىنىڭ ءتوراعاسى قايسار سۇلتانبايەۆ.

ايتا كەتەيىك، بيىل بالالار مەن جاسوسپىرىمدەر قوزعالىسىن دامىتۋدىڭ جاڭا تاسىلدەرى قابىلدانادى.