كولىگىنە جالعان ءنومىر تاققاندارعا جازا كۇشەيەدى

دەپۋتاتتىڭ ايتۋىنشا، قازىرگى تاڭدا قىلمىستىق كودەكستىڭ 386-بابى تەك مەملەكەتتىك نومىرلەردى قولدان جاساۋ مەن ساتۋعا قاتىستى جاۋاپكەرشىلىكتى قاراستىرادى. ال جالعان ءنومىردى پايدالانۋ فاكتىلەرى اكىمشىلىك قۇقىق بۇزۋشىلىق رەتىندە عانا باعالانادى.

اكىمشىلىك قۇقىق بۇزۋشىلىق تۋرالى كودەكستىڭ 590-بابىنا سايكەس، جالعان ءنومىر قولدانعان تۇلعا 15 ا ە ك كولەمىندە ايىپپۇل تولەيدى. قايتالانعان جاعدايدا 20 ا ە ك ايىپپۇل سالىنادى نەمەسە ءبىر جىلعا جۇرگىزۋشى كۋالىگىنەن ايىرۋ كوزدەلگەن. ءبىراق مۇنداي قۇقىق بۇزۋشىلىقتاردىڭ سالدارىنان ادام ولىمىنە اكەلگەن جاعدايلار دا تىركەلىپ جاتىر، - دەدى دەپۋتات.

باقىتجان بازاربەكتىڭ سوزىنشە، جالعان مەملەكەتتىك ءنومىر قولدانۋ سوڭعى ۋاقىتتا جاپپاي سيپات الىپ، اسىرەسە جول-كولىك وقيعالارىندا جيى انىقتالىپ وتىر. ول مۇنداي ارەكەتتەردىڭ كەسىرىنەن قاراپايىم ازاماتتار زارداپ شەگىپ، مەملەكەت بيۋجەتى دە شىعىنعا ۇشىراپ جاتقانىن ايتتى.

ىشكى ىستەر ۆيتسە-ءمينيسترى سانجار ءادىلوۆ ماسەلەنىڭ وزەكتى ەكەنىن جاسىرمادى. ونىڭ ايتۋىنشا، جالعان نومىرلەر كوبىنە پايداكۇنەمدىك ماقساتتاعى قۇقىق بۇزۋشىلىقتار مەن جول-كولىك وقيعالارى كەزىندە قولدانىلادى. ۆيتسە-مينيستر ۇسىنىس قىلمىستىق زاڭنامانى قايتا قاراۋ اياسىندا جان-جاقتى پىسىقتالاتىنىن جەتكىزدى. ۆەدومستۆو ۇسىنىستى قىلمىستىق زاڭنامانى قايتا قاراۋ اياسىندا پىسىقتايتىن بولادى.

مەملەكەتتىك ءنومىرى كورىنبەيتىن كولىك جۇرگىزۋشىلەرىنە قانشا ايىپپۇل سالىنادى

ءنومىردى ادەيى جاسىرۋ ءۇشىن پلەنكا سەكىلدى زاتتاردى قولدانعاندار، جالعان ءنومىر ورناتقاندار دا جاۋاپقا تارتىلادى.

اكىمشىلىك قۇقىق بۇزۋشىلىق تۋرالى كودەكستىڭ 590-بابىندا مىنانداي جاۋاپكەرشىلىك قاراستىرىلعان:

مەملەكەتتىك ءنومىرى وقىلمايتىن نەمەسە بەلگىلەنگەن جەرگە ورناتىلماعان ءنومىر ءۇشىن 5 ا ە ك (21625 تەڭگە) ايىپپۇل؛

مەملەكەتتىك ءنومىر بەلگىسى جوق كولىكتى جۇرگىزۋ - 10 ا ە ك (43250 تەڭگە)؛

بۇل ارەكەتتى ءبىر جىل ىشىندە قايتالاسا 20 ا ە ك (86500 تەڭگە) ايىپپۇل سالىنادى نەمەسە ءبىر جىلعا كولىك باسقارۋ قۇقىعىنان ايىرىلادى (سوت شەشىمى قاجەت)؛

قولدان جاسالعان ءنومىردى ءىلۋ - 15 ا ە ك (64875 تەڭگە)؛

قولدان جاسالعان ءنومىردى ءىلۋ، ءنومىردى كورۋگە كەدەرگى كەلتىرەتىن ماتەريالدى پايدالانۋ 5 تاۋلىككە دەيىن اكىمشىلىك قاماققا الۋعا جانە ءبىر جىلعا كولىك باسقارۋ قۇقىعىنان ايىرۋعا اكەلەدى.