كولىكتىڭ قوزعالتقىشىن ۇزاق قىزدىرعانى ءۇشىن ايىپپۇل نەگە سالىنادى
استانا. KAZINFORM - سەناتور مارات قوجايەۆ قىستا اۆتوكولىكتىڭ قوزعالتقىشىن ۇزاق قىزدىرىپ تۇرعاندارعا ايىپپۇل سالۋعا قاتىستى سۇراققا جاۋاپ بەردى.
دەپۋتات كولىك قوزعالتقىشىن 5 مينۋتتان ارتىق قىزدىرعاندارعا ايىپپۇل سالۋ نورماسى ءبىرازدان بەرى بار ەكەنىن ەسكە سالدى.
- بۇل تالاپ ەكولوگيالىق نورمالاردى ورىنداۋعا باعىتتالعان. بىزدە اۋا قاتتى لاستانعان، ياعني بۇل جاعداي ءىرى قالالاردا ەرەكشە بايقالىپ وتىر. جۇرگىزۋشىلەردى وسى باپ بويىنشا جاۋاپقا تارتۋ ءۇشىن ناقتى دالەلدەر بولۋى كەرەك. وسى ورايدا بەينەجازبا مەن ناقتى ۋاقىتىن تىركەۋ قاجەت. ەگەر وسىنداي دالەلدەر بولسا، بۇل ادامدار اكىمشىلىك جازاعا تارتىلادى. مۇنداي نورمالار دامىعان ەلدەردە دە بار، - دەدى م. قوجايەۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
ايتا كەتەيىك، وسى نورما اياسىندا ايىپپۇل 5 ا ە ك سوماسىندا قاراستىرىلعان. ال وسى تالاپتى قايتادان بۇزعاندارعا 10 ا ە ك ايىپپۇل سالىنادى.
ەسكە سالساق، 2024 -جىلعى قازان ايىنا دەيىن مارات قوجايەۆ ىشكى ىستەر ءمينيسترىنىڭ ءبىرىنشى ورىنباسارى لاۋازىمىن اتقارىپ كەلدى. پرەزيدەنت جارلىعىمەن مارات قوجايەۆ قازاقستان پارلامەنتى سەناتىنىڭ دەپۋتاتى بولىپ تاعايىندالدى.
