كولىكتىڭ الدىنا ءتۇسىپ 36 كيلومەتر جۇگىرگەن قۇتقارۋشى: بۇگىنگى ماراپاتتىڭ ورنى بولەك

Ақтөбе облыстық ТЖД
Фото: Ақтөбе облыстық ТЖД

اقتوبە. KAZINFORM - مۇعالجار اۋداندىق 8-ءورت ءسوندىرۋ ءبولىمىنىڭ بولىمشە كومانديرى نۇربولات ءتاجىعۇلوۆ بۇگىن راقىمجان قوشقاربايەۆ اتىنداعى Ⅲ دارەجەلى «ايبىن» وردەنىمەن ماراپاتتالدى. ول - بيىل قىستا كولىك الدىنا ءتۇسىپ 36 شاقىرىم جۇگىرگەن 8 قۇتقارۋشىنىڭ ءبىرى.

نۇربولات ءتاجىعۇلوۆ اقتوبە وبلىسى مۇعالجار اۋدانى قاندىاعاش قالاسىنىڭ تۋماسى. ول 5-ورتا مەكتەپتە وقىپ، 2013-جىلى اسكەر قاتارىنا شاقىرىلادى. 2014-جىلى وتان الدىنداعى بورىشىن ءوتىپ كەلىپ، 2016-جىلى 8-ءورت ءسوندىرۋ بولىمىندە ءورت ءسوندىرۋشى بولىپ جۇمىس ىستەدى. قازىر بولىمشە كومانديرى.

«ءاربىر مەزگىلدىڭ ءوز قيىن كەزى بولادى. اسىرەسە، قىستاعى بوراندا ادام جوعالىپ، كولىكپەن جولدا قالىپ قوياتىن جاعدايلار كەزىگىپ تۇرادى. مەديتسينالىق كومەك جەتە الماعان كەزدە اۆاريالىق-قۇتقارۋ جۇمىستارىنا شىعامىز. ال كوكتەمدە سۋ كوتەرىلىپ، جەكە تۇرعىن ۇيلەردى ساقتاۋ جۇمىسىنا قاتىسامىز. جاز ايلارىندا دالا ورتتەرىن ءسوندىرۋ جۇمىستارىن جۇرگىزەمىز. ودان بولەك تۇرعىن ۇيلەردە ءورت بولادى. وندا باسقا ەسىكتىڭ قۇلىپتالىپ قالۋى، ۇيدە بالالاردىڭ قالىپ قويۋ دەرەگى كەزدەسەدى»، - دەدى نۇربولات ءتاجىعۇلوۆ.

ول ءتورت اعايىندى. اپاسى، اعاسى جانە ءىنىسى بار. ءورت ءسوندىرۋ-قۇتقارۋ جۇمىستارى سالاسىن تاڭداپ، ماقساتتى تۇردە جۇمىسقا تۇرعان مامان قازىر تاجىريبەلى، بىلىكتى قىزمەتكەر. بيىل وسى سالانى تاڭداعانىنا 8 جىلدان استى. ول وزىنەن كەيىنگى زامانداستارىنا دا ويلانباستان وسى سالانى تاڭداۋعا كەڭەس بەرەدى.

«بۇل سالا وتە جاۋاپتى، ابىرويلى، مارتەبەلى جۇمىستىڭ ءبىرى. مەن قۇتقارۋشى بولۋعا شاقىرامىن. بۇگىنگى ماراپاتتىڭ ورنى بولەك. جۇمىس ىستەۋگە، العا قاراي قادام باسۋعا ۇلكەن جىگەر بەردى. اركىمنىڭ باسىنا بەرمەيتىن باق دەر ەدىم. ەڭبەك باعالانىپ، مارتەبەگە، ماراپاتقا يە بولۋ ۇلكەن قۋانىش. بۇعان دەيىن ەكى رەت تجم العىس زاتىن الدىم. بۇل - مەنىڭ ءبىرىنشى مەملەكەتتىك ناگرادام»، - دەدى ول.

ەسكە سالساق، بيىل اقپان ايىندا اقتوبەدە قاتتى بوران بولدى. سول كەزدە توتەنشە جاعدايلار قىزمەتىنىڭ ءبىر توپ قىزمەتكەرى كولىك الدىندا 36 شاقىرىم جاياۋ ءجۇرىپ، قاريانى اۋدان ورتالىعىنداعى اۋرۋحاناعا جەتكىزدى. كوپ ۇزاماي بوراندى كۇنى شاقىرتۋعا جاياۋ بارعان توتەنشە جاعدايلار ءبولىمى قىزمەتكەرلەرىنىڭ اتى- ءجونى تۇگەل بەلگىلى بولدى: مۇعالجار اۋدانى 8-ءورت ءسوندىرۋ ولىمشە كومانديرى ن. ءتاجىعۇلوۆ، بولىمشە كومانديرى د. شاماكوۆ، قاراۋىل باستىعى ا. ءالي، ءورت سوندىرۋشىلەر ە. مارات، ا. قۇسايىنوۆ جانە ج. سۇلتامۇراتوۆ، ا. ساعىندىق، ا. جالعاسوۆ. ولار قاندىاعاش قالاسىنان باسشيلى اۋىلىنا جاياۋ باردى.

سوڭعى جاڭالىقتار