كولىكتىڭ الدىڭعى تەرەزەسىن قاراڭعىلاۋعا رۇقسات بەرىلۋى مۇمكىن

көлік
Фото: pexels.com

 استانا. KAZINFORM - ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ كولىكتىڭ الدىڭعى تەرەزەسىن قاراڭعىلاۋعا رۇقسات بەرۋگە قاتىستى پىكىر ءبىلدىردى.

سەناتتىڭ جالپى وتىرىسى اياسىندا ب ا ق وكىلدەرى مارات قوجايەۆتان: «قىتايدا شىعارىلعان كوپتەگەن اۆتوموبيلدىڭ الدىڭعى تەرەزەسى قاراڭعىلانعان. قازاقستاندا مۇنداي قاراڭعىلاۋعا رۇقسات بەرىلۋى مۇمكىن بە؟»، - دەپ سۇراعان ەدى.

ءمينيستردىڭ ءبىرىنشى ورىنباسارى بۇل ماسەلە بۇگىن عانا كوتەرىپ وتىرماعانىن اتاپ ءوتتى.

«قازىرگى ۋاقىتتا ءى ى م الدىڭعى تەرەزەنى قاراڭعىلاۋعا تىيىم سالۋ تاريحىن زەردەلەپ جاتىر. بۇل ماسەلەنى ءماجىلىس دەپۋتاتتارى دا كوتەرىپ ءجۇر. كەدەندىك وداق رەگلامەنتى بار. وندا الدىڭعى تەرەزە قانشالىقتى قاراڭعىلانۋى ءتيىس ەكەندىگى جازىلعان. بۇل جول قوزعالىسى جانە جول ءجۇرىسى ەرەجەسىنىڭ بۇزىلۋى كەزىندە جۇرگىزۋشى مەن جولاۋشىنى سايكەستەندىرۋدە قيىندىقتىڭ بولۋىنا بايلانىستى. قازىر قۇقىق بۇزۋشىلىقتى تىركەيتىن جاڭا تەحنيكالىق قۇرالدار شىعىپ جاتىر. سوندىقتان مۇنىڭ (الدىڭعى تەرەزەنى قاراڭعىلاۋعا رۇقسات بەرۋ) قانشالىق مۇمكىن ەكەندىگىن نەمەسە جول قوزعالىسى، قوعامدىق ءتارتىپ قاۋىپسىزدىگەن زيان تيگىزەتىندىگىن زەردەلەپ جاتىرمىز. ماسەلە زەردەلەنىپ جاتىر، تاياۋ ۋاقىتتا ساراپشىلىق قورىتىندىمىزدى سىزدەرگە جەتكىزەمىز»، - دەدى مارات قوجايەۆ.

سوڭعى جاڭالىقتار