كولىككە ارنالعان «ادەمى» نومىرلەر قانشا تۇرادى؟

استانا. KAZINFORM - كوپتەگەن قازاقستاندىقتار كولىگىندەگى مەملەكەتتىك نومىردە اتى-ءجونىنىڭ باس ارىپتەرى نەمەسە «ەرەكشە» ساندار بولعانىن جاقسى كورەدى. ءبىراق جۇرگىزۋشىلەر ءۇشىن ماڭىزدى بولىپ سانالاتىن ساندار اركەز VIP ساناتىنا جاتپايدى. VIP ءنومىر مەن جاي عانا «ادەمى» ءنومىردىڭ ايىرماشىلىعى قانداي؟

Tengri Auto VIP نومىرلەردىڭ قانشا تۇراتىنىن ۇسىندى.

VIP نومىرلەردىڭ باسقالاردان ايىرماشىلىعى قانداي؟

VIP نەمەسە جوعارى سۇرانىستاعى نومىرلەر قاراپايىم نومىرلەردەن ارىپتەر مەن ساندىق كومبيناتسيالاردىڭ ارنايى جيىنتىعىمەن جانە باعاسىمەن ەرەكشەلەنەدى. ىشكى ىستەر مينيسترلىگىنىڭ مالىمەتىنشە، سۇرانىستاعى مەملەكەتتىك تىركەۋ نومىرلەرىنىڭ (VIP- نومىرلەرى) اراسىندا ەڭ ارزانىنا مىنا بىردەي ارىپتىك بەلگىلەرى بار نومىرلەر جانە ساندىق تاڭبا نومىرلەرى جاتادى: 010، 020، 030، 040، 050، 060، 070، 077، 080، 090، 707. ولاردىڭ قۇنى - 57 ا ە ك (210330 تەڭگە).

ەڭ قىمبات VIP-نومىرلەر - بىردەي ارىپتىك بەلگىلەرى بار 001، 002، 003، 004، 005، 006، 007، 008، 009، 777 ساندىق بەلگىلەرى. ولار 285 ا ە ك نەمەسە 1051650 تەڭگە تۇرادى.

VIP تىزىمىنە كىرمەيتىن «ادەمى» مەملەكەتتىك ءنومىردى ساتىپ الۋعا بولا ما؟

ءى ءى م باسپا ءسوز قىزمەتى بۇل مۇمكىن ەمەس ەكەنىن ايتتى. نورماتيۆتىك-قۇقىقتىق اكتىلەردە بەلگىلەنگەن تالاپتارعا سايكەس جوعارى سۇرانىسقا جاتپايتىن مەملەكەتتىك تىركەۋ نومىرلىك بەلگىلەرى اۆتوماتتاندىرىلعان اقپاراتتىق جۇيەدە ايقىندالعان كەزەك تارتىبىمەن بەرىلەدى.

الايدا، مەملەكەتتىك نومىرلەردى ەركىن تاڭداۋ ءالى دە بار. اۆتوكولىكتى تىركەۋ كەزىندە ارنايى ح ق ك و- لار سىزگە ەركىن نومىرلەردىڭ ءتىزىمىن ۇسىنادى، ولاردىڭ ىشىنەن ءسىز وزىڭىزگە ۇنايتىنىن تاڭداي الاسىز. ەڭ باستىسى، ح ق ك و- عا ەرتەرەك بارۋ، ويتكەنى ءتىزىم ءبىر تاۋلىككە بەرىلەدى، سوندىقتان ءسىز نەعۇرلىم ەرتە كەلسەڭىز، سوعۇرلىم ەركىن مەملەكەتتىك نومىرلەرگە تاڭداۋ بولادى.