كولىك تۇراقتا ورتەنىپ كەتسە، شىعىندى كىم وتەيدى - زاڭگەر ءتۇسىندىردى

الدىمەن نە ىستەۋ قاجەت جانە قانداي جاعدايدا ساقتاندىرۋ تولەمىن الۋعا بولادى - بۇل تۋرالى زاڭگەر ارىس داناعاتوۆتان سۇراعان ەدىك.

6-قازاندا استانا قالاسىنداعى تۇرعىن ءۇي كەشەندەرىنىڭ ءبىرىنىڭ اۆتوتۇراعىندا بەس كولىك ورتەندى. الدىن الا مالىمەت بويىنشا، قاتتى جەلدىڭ سالدارىنان ءورت ءبىر كولىكتەن ەكىنشىسىنە جايىلعان.

وسى وقيعاعا بايلانىستى زاڭگەر ارىس داناعاتوۆپەن سۇحباتتاسقان ەدىك. ول كولىك يەلەرى كەلتىرىلگەن شىعىننىڭ وتەمىن الۋ ءۇشىن قانداي ارەكەتتەر جاساۋى كەرەكتىگىن ءتۇسىندىردى.

پوليتسياعا، ت ج م- گە، ساقتاندىرۋ كومپانياسىنا جانە باعالاۋشىعا جۇگىنۋ قاجەت

زاڭگەر ارىس داناعاتوۆتىڭ ايتۋىنشا، ەڭ الدىمەن كولىك يەلەرى پوليتسياعا ارىز بەرىپ، ءوتىنىشتىڭ تىركەلگەنىن راستايتىن تالون-حابارلاما الۋى ءتيىس. سونداي-اق، توتەنشە جاعدايلار مينيسترلىگىنەن ءورت تۋرالى انىقتاما سۇراتىپ، ءتىلسىز جاۋدىڭ تۇتانۋ سەبەبىن انىقتاۋ ءۇشىن ساراپتاما جۇرگىزىلىپ جاتقان-جاتپاعانىن ناقتىلاعان ءجون.

ودان بولەك، ساقتاندىرۋ كومپانياسىنا وقيعا تۋرالى كاسكو شارتىنىڭ تالاپتارىندا كورسەتىلگەن مەرزىمدە حابارلاۋ قاجەت. ادەتتە، بۇل ءۇشىن بىرنەشە كۇن بەرىلەدى. ەگەر كولىك يەسى بەلگىلەنگەن مەرزىمدى وتكىزىپ السا، ساقتاندىرۋ كومپانياسى تولەم جاساۋدان باس تارتۋى مۇمكىن.

تاۋەلسىز باعالاۋشىنى شاقىرۋ دا ماڭىزدى ءىس. ول كولىكتى جوندەۋگە كەتەتىن شىعىندى نەمەسە جوندەۋ ءتيىمسىز بولعان جاعدايدا ونىڭ نارىقتىق قۇنىن انىقتاۋى ءتيىس.

- تاۋەلسىز باعالاۋ جۇرگىزىلگەنگە دەيىن كولىكتى جوندەۋگە نەمەسە كادەگە جاراتۋعا (ۋتيليزاتسيا) بولمايدى. ايتپەسە، كەيىن كەلتىرىلگەن شىعىننىڭ مولشەرىن دالەلدەۋ قيىنعا سوعادى، - دەپ ەسكەرتتى ساراپشى.

كولىكتەر ەۆاكۋاتسيالانىپ، اۋماق تازارتىلعانعا دەيىن وقيعادان كەيىنگى بارلىق ماڭىزدى جايتتى سۋرەتكە ءتۇسىرىپ العان ابزال.

سونداي-اق، زاڭگەر بەينەباقىلاۋ كامەرالارىنداعى جازبالاردى مۇمكىندىگىنشە تەزىرەك سۇراتۋعا كەڭەس بەرەدى.

- كولىكتى، كورشىلەس ماشينالاردى جانە اۆتوتۇراقتى ەۆاكۋاتسيالاۋ مەن تازالاۋ جۇمىستارى باستالعانعا دەيىن سۋرەتكە جانە ۆيدەوعا ءتۇسىرۋ كەرەك. جالپى كورىنىستى، كولىكتەردىڭ مەملەكەتتىك نومىرلەرىن جانە زاقىمدانعان جەرلەرىن تۇسىرگەن ءجون. تۇرعىن ءۇي كەشەنى مەن كورشىلەس عيماراتتارداعى بەينەباقىلاۋ كامەرالارىنىڭ جازبالارىن سۇراتۋ قاجەت. ولار ۇزاق ساقتالمايدى، سوندىقتان جازبالاردى الۋ تۋرالى ءوتىنىشتى جازباشا تۇردە ءارى بىردەن بەرگەن دۇرىس، - دەپ ءتۇسىندىردى داناعاتوۆ.

قانداي قۇجاتتاردى جيناۋ كەرەك

سونىمەن قاتار، كولىك يەلەرى مىناداي قۇجاتتاردى جيناۋى قاجەت:

· كولىكتىڭ تەحنيكالىق پاسپورتى؛

· جۇرگىزۋشى كۋالىگى؛

· ساقتاندىرۋ ءپوليسى نەمەسە كاسكو شارتى؛

· اۆتوتۇراق ورنىنا قاتىستى قۇجاتتار؛

· م ءۇ ب (مۇلىك يەلەرىنىڭ بىرلەستىگى) نەمەسە پ ي ك- پەن (پاتەر يەلەرىنىڭ كووپەراتيۆى) جاسالعان شارت.

سونداي-اق، زاڭگەردىڭ سوزىنشە، تۇرعىن ءۇي كەشەنىنە قىزمەت كورسەتەتىن ۇيىمعا جازباشا ءوتىنىش بەرىپ، اۆتوتۇراقتىڭ ءورت قاۋىپسىزدىگى جاعدايىنا قاتىستى تۇسىنىكتەمەلەر مەن قۇجاتتاردى سۇراتۋ ارتىق ەتپەيدى.

ساقتاندىرۋ ورتتەن كەلگەن شىعىندى وتەي مە

ارىس داناعاتوۆ تۇسىندىرگەندەي، ساقتاندىرۋ تولەمىن الۋ مۇمكىندىگى ەڭ الدىمەن ساقتاندىرۋ تۇرىنە بايلانىستى. ەگەر كولىك يەسىنىڭ كاسكو ساقتاندىرۋى بولسا، ورتتەن كەلگەن شىعىن، ادەتتە، ساقتاندىرۋ ارقىلى وتەلەدى.

- ءورت كوبىنە ساقتاندىرۋ جاعدايلارىنىڭ تىزىمىندە بار. الايدا ءبارى شارتتىڭ ناقتى تالاپتارى مەن ونداعى ەرەكشەلىكتەرگە بايلانىستى. مىسالى، ءورت كولىكتى پايدالانۋ ەرەجەلەرىن بۇزۋ نەمەسە قاساقانا ارەكەت سالدارىنان شىقسا، ساقتاندىرۋشى تولەم جاساۋدان باس تارتا الادى، - دەدى زاڭگەر.

سونىمەن بىرگە، ورتكە كىنالى ادام انىقتالماعان جاعدايدا دا كاسكو بويىنشا تولەم الۋعا بولادى.

- كىنالى ادام بەلگىسىز بولعان كەزدە دە ساقتاندىرۋ تولەمى جاسالۋى مۇمكىن. تولەمدى جۇزەگە اسىرعاننان كەيىن ساقتاندىرۋ كومپانياسى شىعىندى كىنالى ادامنان ءوندىرىپ الۋعا قۇقىلى، - دەپ اتاپ ءوتتى ساراپشى.

ال ەگەر كولىك يەسىندە تەك كولىك قۇرالدارى يەلەرىنىڭ ازاماتتىق-قۇقىقتىق جاۋاپكەرشىلىگىن مىندەتتى ساقتاندىرۋ (ك ق ي ا ق ج م س) ءپوليسى بولسا، وتەماقى الۋ الدەقايدا قيىن.

- بۇل پوليس كولىك قۇرالىن پايدالانۋ كەزىندە كەلتىرىلگەن زياندى، ەڭ الدىمەن جول- كولىك وقيعالارىنا بايلانىستى زالالدى وتەيدى. ال تۇراقتا تۇرعان كولىكتىڭ ورتەنۋى، ادەتتە، مۇنداي جاعدايعا جاتقىزىلمايدى. ەگەر ساقتاندىرۋ كومپانياسى تولەم جاساۋدان باس تارتسا، ونىڭ شەشىمىنە شاعىمدانۋعا بولادى. دەگەنمەن، ساقتاندىرۋ تولەمىن الاسىز دەگەن كەپىلدىك جوق، - دەپ قورىتىندىلادى مامان.

ايتا كەتەيىك، بۇعان دەيىن ەلوردادا 5 كولىكتىڭ ورتەنۋى سالدارىنان 1 ادام جانساقتاۋ بولىمىنە تۇسكەنىن جازعانبىز.