كولىك سالىعى جانارماي باعاسىنا قوسىلا ما – دەپۋتات جاۋاپ بەردى

استانا. KAZINFORM - كولىك سالىعىن بەنزينگە ارنالعان اكسيزگە اۋىستىرۋ تۋرالى نورما قاراستىرىلىپ وتىرعان جوق. بۇل تۋرالى ءماجىلىس دەپۋتاتى بەرىك بەيسەنعاليەۆ ءمالىم ەتتى.

Берік Бейсенғалиев
Фото: Досбол Атажан/Kazinform

بۇگىن ءماجىلىستىڭ جالپى وتىرىسىنان كەيىن تىلشىلەر «جاڭا سالىق كودەكسىنىڭ جوباسىندا اۆتوكولىك سالىعىنان بوساتىپ، ونى جانارماي باعاسىنا قوسۋ مۇمكىندىگى قاراستىرىلىپ جاتىر ما؟» دەگەن سۇراق قويدى.

ءوز كەزەگىندە ب. بەيسەنعاليەۆ مۇنداي تاجىريبە الەمنىڭ ءبىرقاتار ەلىندە بار ەكەنىن ەسكە سالدى. كولىك سالىعىن بەنزينگە ارنالعان اكسيزگە اۋىستىرعان جاعدايدا جانارماي باعاسى قىمباتتايدى.

- كولىك سالىعىنان بوساتىپ، ونى جانارماي قۇنىنا قوسىپ جاتقان مەملەكەتتەر بار. ءبىراق ونىڭ ۇلكەن كەمشىلىگى بار. بۇل سالىق جانارمايعا قوسىلسا، تابىسى تومەن تۇرعىندارعا اۋىر بولۋى مۇمكىن. ويتكەنى قوزعالتقىش كولەمى ۇلكەن اۆتوكولىكتى تىزگىندەگەن ادامدار مەن كولىگى شاعىن جۇرگىزۋشىلەر بىردەي سومادا بەنزين ساتىپ الادى. ماسەلەن، قازىر تاكسيدە ءجۇرىپ، وتباسىن اسىراپ جۇرگەندەر ءۇشىن قيىن بولادى، - دەدى دەپۋتات.

ونىڭ ايتۋىنشا، بۇعان دەيىن وسى باعىتتا ءتيىستى ەسەپتەۋلەر جاسالعان.

- مىڭداعان تاكسيستەر كولىك سالىعىنا قاراعاندا، جانارمايعا قوسىلعان سالىقتان ەداۋىر ۇتىلادى. سوندىقتان قازىر بۇل ۇسىنىس بىزگە جارامايدى. جاڭا سالىق كودەكسىنىڭ جوباسىندا مۇنداي نورمانى قاراستىرىپ وتىرعان جوقپىز، - دەدى بەرىك بەيسەنعاليەۆ.

بۇعان دەيىن ەلىمىزدە بەنزين مەن ديزەل باعاسىن مەملەكەت رەتتەمەۋى مۇمكىن ەكەنىن جازعان ەدىك.

جاقىندا ەنەرگەتيكا ءمينيسترى الماسادام ساتقاليەۆ بەنزين باعىسىنىڭ وسۋىنە قاتىستى تۇسىنىك بەردى.

سوڭعى جاڭالىقتار