كولىك مينيسترلىگى سۋ العان جولدار تۋرالى: سۋ كولەمى ءبىز ويلاعاننان جوعارى بولىپ كەتتى
استانا. KAZINFORM - كولىك مينيسترلىگى اۆتوموبيل جولدارى كوميتەتىنىڭ باسقارماسى باسشىسى جاندوس يگەمبايەۆ اقتوبە وبلىسىنداعى جولدار نەگە كوكتەمگى تاسقىندارعا دايىن بولماي شىققانىن ايتتى.
ادىلەت مينيسترلىگى زاڭ جوبالاۋ جونىندەگى ۆەدومستۆوارالىق كوميسسياسىنىڭ وتىرىسى كەزىندە ب ا ق وكىلدەرى كولىك مينيسترلىگىنىڭ وكىلدەرىنەن اقتوبە وبلىسىنداعى جولداردىڭ نەگە كوكتەمگى تاسقىنعا دايىن بولماي شىققانىن سۇرادى.
«قازىرگى تاڭدا رەسپۋبليكالىق ماڭىزداعى جولداردان بولەك جەرگىلىكتى دەڭگەيدەگى جولداردى دا تاسقىن شايىپ جاتىر. ءبىراق ولاردىڭ مالىمەتى اكىمدىكتەر بەرەدى. كولىك مينيسترلىگىنە قاراستى رەسپۋبليكالىق ماڭىزداعى جولدار تۋرالى ايتساق، اقتوبە وبلىسى بويىنشا عانا شەكتەۋلەر بار. ناقتى ايتساق، اقتوبە ەمبى، ىرعىز جولدارىندا شەكتەۋ بەردىك. وسى جولداردا ۋاقىتشا توقتاتىپ وتىرمىز»، - دەدى ول.
مينيسترلىك وكىلى كەلەسى جىلى وسىنداي جاعداي قايتالانباۋ ءۇشىن قاۋىپتى ۋچاسكەلەردىڭ تىزبەسى وزەكتەندىرىلەتىنىن ايتادى.
«سۋ الۋدىڭ سەبەبىن فورس- ماجور جاعداي دەپ باعالاپ وتىرمىز. سۋدىڭ كولەمى ءبىز ويلاعاننان كوپ جوعارى بولىپ كەتتى. بۇل شەكتەۋ ەرتەڭگە دەيىن قويىلدى. كەلەسى جولى ءدال وسىنداي فورس- ماجور جاعداي قايتالانباۋ ءۇشىن توتەنشە جاعدايلار مينيسترلىگىمەن بىرگە جۇمىس ىستەپ جاتىرمىز. ولار بىزگە سۋ الۋ ءقاۋپى بار ۋچاسكەلەردىڭ وزەكتەندىرىلگەن تىزبەسىن بەرەدى. سول تۇستاردىڭ قورعانىسىن كۇشەيتەمىز»، - دەدى جاندوس يگەمبايەۆ.
