كولىك جولدا بۇزىلسا، كىم كومەكتەسەدى؟ قازاۆتوجول جاڭا سەرۆيستى ىسكە قوستى
استانا. KAZINFORM - رەسپۋبليكالىق تراسسالاردا «قازاۆتوجولدىڭ» تەحنيكالىق كومەك پيكاپتارى جۇمىسىن باستادى، دەپ حابارلايدى كومپانيانىڭ باسپا ءسوز قىزمەتى.
«قازاۆتوجول» رەسپۋبليكالىق ماڭىزى بار اۆتوموبيل جولدارىندا جۇرگىزۋشىلەرگە تەحنيكالىق كومەك كورسەتەتىن جاڭا سەرۆيستى ىسكە قوستى.
- پيلوتتىق رەجيمدە ارنايى قىزعىلت سارى پيكاپتار استانا - ارشالى جانە استانا - تەمىرتاۋ باعىتتارىندا جۇمىسىن باستادى. كومەك شاقىرۋ ءۇشىن 1403 ءبىرىڭعاي بايلانىس ورتالىعىنا حابارلاسۋ جەتكىلىكتى. قىزمەت تەگىن كورسەتىلەدى، - دەلىنگەن حابارلامادا.
كولىك جولدا ءوشىپ قالدى، دوڭگەلەك جارىلدى نەمەسە جەلى شىقتى، سۇيرەپ اكەتۋ قاجەت بولدى نە باسقا دا كۇتپەگەن جاعداي تۋىندادى دەلىك. ەندى جۇرگىزۋشى «قازاۆتوجولدىڭ» بايلانىس ورتالىعىنا قوڭىراۋ شالىپ، ءوزىنىڭ ورنالاسقان جەرى مەن تۋىنداعان ماسەلەنى وپەراتورعا حابارلاي الادى. ءوتىنىش قابىلدانعاننان كەيىن وقيعا ورنىنا تەحنيكالىق قىزمەت ەكيپاجى جىبەرىلەدى. ارنايى پيكاپتار جول بويىندا العاشقى تەحنيكالىق كومەك كورسەتۋگە قاجەتتى قۇرال-سايماندارمەن جانە جابدىقتارمەن قامتىلعان. كولىكتەر اشىق قىزعىلت سارى تۇسكە بويالعان جانە ارنايى جارىق سيگنالدارىمەن جابدىقتالعان. سوندىقتان ولار جول قوزعالىسىنىڭ باسقا قاتىسۋشىلارىنا الىستان انىق كورىنەدى. ەكيپاجدار دوڭگەلەك زاقىمدانعان نەمەسە جەلى شىققان جاعدايدا، كولىكتە تەحنيكالىق اقاۋ پايدا بولعاندا، سۇيرەپ اكەتۋ قاجەت بولعاندا جانە جۇرگىزۋشى وزدىگىنەن قوزعالىسىن جالعاستىرا المايتىن وزگە دە جاعدايلاردا كومەك كورسەتە الادى.
- كولىكتىڭ تراسسادا امالسىز توقتاپ قالۋى، اسىرەسە جوعارى جىلدامدىقتى ۋچاسكەلەردە، تۇنگى ۋاقىتتا نەمەسە قولايسىز اۋا رايىندا بارلىق جول قوزعالىسىنا قاتىسۋشىلار ءۇشىن قوسىمشا قاۋىپ تۋدىرادى. سوندىقتان توقتاعان كولىكتىڭ ورنىن دەر كەزىندە بەلگىلەۋ، جۇرگىزۋشىگە قاجەتتى كومەك كورسەتۋ جانە قاجەت بولعان جاعدايدا كولىكتى قاۋىپسىز جەرگە شىعارۋ ماڭىزدى، - دەيدى ماماندار.
پيلوتتىق جوبا جاڭا قىزمەتكە دەگەن سۇرانىستى، ەكيپاجداردىڭ ارەكەت ەتۋ ۋاقىتىن جانە جۇرگىزۋشىلەر جيى كەزدەسەتىن ماسەلەلەردى انىقتاۋعا مۇمكىندىك بەرەدى. جيناقتالعان تاجىريبە رەسپۋبليكالىق اۆتوجولدارداعى تەحنيكالىق كومەك جۇيەسىن ودان ءارى دامىتۋ كەزىندە ەسكەرىلەدى.
كومەكتى قالاي شاقىرۋعا بولادى؟
رەسپۋبليكالىق تراسسادا كولىك بۇزىلىپ نەمەسە باسقا دا كۇتپەگەن جاعداي تۋىنداسا، 1403 قىسقا نومىرىنە حابارلاسىپ، وپەراتورعا تۇرعان جەرىڭىزدى، قوزعالىس باعىتىن جانە ماسەلەنىڭ سيپاتىن ايتۋ قاجەت.
- تەحنيكالىق قىزمەت كەلگەنگە دەيىن مۇمكىندىگىنشە كولىكتى جولدىڭ ءجۇرۋ بولىگىنەن قاۋىپسىز جەرگە شىعارىپ، اۆاريالىق جارىق سيگنالىن قوسىپ، قاۋىپسىزدىك شارالارىن ساقتاۋ ۇسىنىلادى. «قازاۆتوجولدىڭ» جاڭا سەرۆيسىنىڭ باستى ماقساتى - رەسپۋبليكالىق تراسسادا قيىن جاعدايعا تاپ بولعان جۇرگىزۋشىگە جەدەل كومەك كورسەتۋ جانە جول قوزعالىسىنىڭ قاۋىپسىزدىگىن قامتاماسىز ەتۋ، - دەلىنگەن حابارلامادا.
وسىدان بۇرىن قازاۆتوجول اۋىر جۇك كولىگى جۇرگىزۋشىلەرىنە ماڭىزدى ەسكەرتۋ جاسادى.
