كولىك ءورتىنىڭ الدىن الۋ جولدارى قانداي؟

  كولىكتىڭ ورتەنۋى پاتەرلەر مەن جەكە ۇيلەردەن شىعاتىن ورتتەن كەيىن ءجيى تۋىنداپ جاتادى. بۇگىندە اۆتوكولىك تەز تۇتانىپ، يەسىنىڭ كوز الدىندا ورتەنىپ كەتەتىن جاعدايلار ءجيى كەزدەسەدى.

ۇزاق ۋاقىت بويى مەحانيزمدەر مەن ەلەكتر جابدىقتارىنىڭ اقاۋلارى بار اۆتوكولىك قۇرالدارىن پايدالانۋ، سونداي- اق ءتۇرلى قوسىمشا ەلەكتر جابدىقتارىن رۇقساتسىز پايدالانۋ ەلەكتر جابدىقتارىنىڭ قىزىپ كەتۋىنە، تۇيىقتالۋىنا اكەلەدى. مۇنىڭ سوڭى ءورتتىڭ شىعۋىنا اپارىپ سوعادى دەپ ەسكەرتەدى قۇتقارۋشىلار.

نەگىزگى سەبەپ - ەلەكتر سىمدارىنىڭ قىسقا تۇيىقتالۋى. جۇرگىزىلگەن تالداۋعا سايكەس، شىققانىنا 10 جانە ودان دا كوپ جىل بولعان كولىك قۇرالدارىنىڭ ورتكە ۇشىراۋ قاۋپى جوعارى.

كولىكتىڭ ورتەنۋى بىردەن بايقالمايدى. ونى ءتۇتىننىڭ ءيىسى شىققان كەزدە عانا بايقاۋعا بولادى.

اۆتوكولىكتى ورتتەن قورعاۋ ءۇشىن كولىك يەلەرى مەن جۇرگىزۋشىلەرگە مىناداي كەڭەس بەرىلەدى:

- تەحنيكالىق بايقاۋدان ۋاقىتىندا ءوتۋ؛

- ماگنيتولانى، دابىل جۇيەسىن، قوزعالتقىشتى ىسكە قوسۋ الدىنداعى جىلىتقىشىن تەك مامانداندىرىلعان ورتالىقتاردا ورناتۋ؛

- كولىك سالونىندا ءارقاشان ءورت سوندىرگىش بولۋى كەرەك؛

- بارلىق ەلەكتر جابدىقتارىنىڭ جارامدىلىعىن باقىلاۋ قاجەت؛

- قوزعالتقىشتىڭ گەرمەتيكالىعىن، سونداي- اق جارامدىلىعىن باقىلاۋ؛

- قوزعالتقىش بولىگىندە بوگدە، تەز تۇتاناتىن زاتتاردى ۇستاماڭىز؛

- جانار- جاعارماي ماتەريالدارىن تەك اعىپ كەتپەيتىن گەرمەتيكالىق ىدىستاردا تاسىمالداۋ.

ەگەر گاز وتىن رەتىندە پايدالانىلسا، وندا گاز جابدىقتارىن ۇنەمى تەكسەرىپ وتىرۋ قاجەت.

ەگەر ءسىز بەنزيننىڭ، جانىپ تۇرعان ءيىستى سەزسەڭىز، سورعىشتىڭ استىنداعى ءتۇتىندى كورسەڭىز، كولىكتى دەرەۋ توقتاتىپ، قوزعالتقىشىن ءوشىرىڭىز. سالونداعى جولاۋشىلاردى بىردەن سىرتقا شىعارىڭىز، كاپوت استىنداعى كەڭىستىككە اۋانىڭ كوپ كىرمەۋى ءۇشىن ونى تولىعىمەن اشپاڭىز، قوزعالتقىش بولىگىن ءسوندىرۋ قوزعالتقىش بولىگىنىڭ استىنان، سونداي- اق ءسال اشىق كاپوت استىنداعى كەڭىستىكتەن جاسالادى، دەرەۋ «101» نومىرىنە قوڭىراۋ شالىڭىز.

ءورت سوندىرۋشىلەر كەلگەنگە دەيىن قاۋىپسىز بولعان جاعدايدا عانا ءوز بەتىڭىزشە، ياعني يمپروۆيزاتسيالانعان قۇرالدارمەن - ءورت سوندىرگىشپەن نەمەسە تىعىز شۇبەرەكپەن سوندىرۋگە تىرىسىپ كورۋىڭىزگە بولادى. ءورت سوندىرگىشتى قولدانۋ قاجەت. قوزعالتقىشتى سۋمەن سوندىرۋگە بولمايدى!

سۋ سىمداردىڭ قىسقا تۇيىقتالۋىنا نەمەسە جانىپ جاتقان بەنزيننىڭ تارالۋىنا اكەلۋى مۇمكىن. ءورت سوندىرگىشتى اۆتوموبيلدىڭ سالونىندا ساقتاۋ كەرەك، سوندا ول ءارقاشان قولجەتىمدى بولادى جانە جىلدام پايدالانا الاسىز.