ەكولوگيالىق تازا كولىك: ماڭعىستاۋدا مەتانمەن جۇرەتىن جاڭا اۆتوبۋستار پايدا بولدى

ماڭعىستاۋ وبلىسىندا ءوڭىر ەكولوگياسىنا وڭ ىقپال ەتەتىن اۆتوبۋستاردىڭ جاڭا بۋىنى پايدا بولدى.

اقتاۋدا قالالىق باعىت بويىنشا جولاۋشىلاردى تاسىمالدايتىن 30 جاڭا اۆتوبۋس ءوز جۇمىسىن باستادى، دەپ حابارلايدى Kazinform.

سونىمەن قاتار جاڭا اۆتوبۋستار «اقتاۋ - اۋەجاي» باعىتىندا قاتىنايدى. جاقىن ارادا مەتانمەن جۇرەتىن تاعى 90 اۆتوبۋستى پايدالانۋعا بەرۋ جوسپارلانىپ وتىر. بۇل تۋرالى و ك ق بريفينگىندە نۇرلان نوعايەۆ حابارلادى.

جاڭا كولىك (اۆتوبۋستار) جەرگىلىكتى بيۋجەتتەن جانە ونەركاسىپتى دامىتۋ قورى ا ق قاراجاتى ەسەبىنەن ساتىپ الىندى. جەرگىلىكتى بيۋجەت ەسەبىنەن -1.1 ميلليارد تەڭگە، قالعان سومانى ونەركاسىپتى دامىتۋ قورى ا ق قارجىلاندىردى. بارلىق اۆتوبۋس اۋانى باپتاۋ جۇيەسىمەن، بەينەباقىلاۋ كامەرالارىمەن جانە مۇمكىندىگى شەكتەۋلى جاندارعا ارنالعان پاندۋسپەن جابدىقتالعان. جالپى جوبا 9,2 ميلليارد تەڭگەگە باعالانادى.

جاڭا اۆتوبۋس ينفراقۇرىلىمىنىڭ ماڭىزدى بولىكتەرى - ارنايى ديسپەتچەرلىك جۇيە قوعامدىق كولىك باعىتتارىنىڭ قوزعالىسىن، ال كامەرالار اۆتوبۋس سالونىن باقىلاۋعا مۇمكىندىك بەرەدى. سونداي-اق اۆتوبۋستاردى وتىنمەن قامتاماسىز ەتۋ ءۇشىن وبلىستا العاشقى رەت ەرەكشە گاز قۇيۋ ستانتسياسى - مەتان ستانتسياسى پايدالانۋعا بەرىلدى.

«جاڭا اۆتوبۋستاردا گاز موتورلى قوزعالتقىشتاردى پايدالانۋ اۋاعا تارايتىن زياندى قالدىقتار كولەمىن ازايتۋعا جانە سۋبسيديالاۋ سالاسىندا بيۋدجەت قاراجاتىن ۇتىمدى پايدالانۋعا ىقپال ەتەدى»، - دەدى نۇرلان نوعايەۆ.

ءوڭىر باسشىسى نەگىزگى ماقسات ماڭعىستاۋ وبلىسىندا جولاۋشىلار كولىگىنىڭ قاۋىپسىز، جايلى جانە ساپالى قىزمەتتەرىن قامتاماسىز ەتۋ ەكەنىن اتاپ ءوتتى. ول سونداي-اق ايماقتاعى سۇيىتىلعان گازدى تۇتىنۋدىڭ جوعارى كورسەتكىشتەرىن اتاپ ءوتىپ، مەتاندى پايدالانۋ سۇيىتىلعان گازعا جۇكتەمەنى تومەندەتەتىنىنە سەنىم ءبىلدىردى.

«ءبىزدىڭ ماقساتىمىز - ماڭعىستاۋ وبلىسىندا جولاۋشىلار كولىگىنىڭ قاۋىپسىز، جايلى جانە ساپالى قىزمەتتەرىن قامتاماسىز ەتۋ، اۆتوبۋستاردى كۇتۋ ۋاقىتىن قىسقارتۋ جانە جولاۋشىلار تاسىمالى نارىعىنا جاڭا ساپالى اۆتوبۋستار ۇسىنۋ»، - دەدى ماڭعىستاۋ وبلىسىنىڭ اكىمى.