ەكولوگيا مينيسترلىگى قانشا مىڭ كيىك اۋلاناتىنىن ايتتى

киік
Фото: Фото: Kazinform

ەلىمىزدە كيىك سانى 2 ميلليون 600 مىڭعا جەتتى. بۇل تۋرالى ەكولوگيا جانە تابيعي رەسۋرستار ءمينيسترى ەرلان نىسانبايەۆ ايتتى، دەپ حابارلايدى Kazinform.

«بۇگىندە كيىكتەردىڭ سانى تاريحي كورسەتكىشتەن اسىپ كەتتى. سول سەبەپتى كيىك سانىن رەتتەۋ قولعا الىنىپ وتىر. 2003-جىلى كيىك سانى بار-جوعى 21 مىڭ بولدى. ال 1993-جىلى 1 ميلليون 200 مىڭ باس بار ەدى. مەملەكەتتىڭ قامقورلىعىنىڭ ارقاسىندا كيىك سانى 1 ميلليون 900 باسقا جەتتى. مۇنىڭ ىشىنە بيىلعى كوكتەمگى ءتولىن قوسپادىق. جالپى، كيىك ءوسىمتال مال. كەلەسى كوكتەمدە ساناق وتەدى. ءبىراق، قازىردىڭ وزىندە ەڭ تومەنگى 30 پايىزدىق بولجامدى العاننىڭ وزىندە بۇگىندە 600 مىڭ باس كيىك قوسىلىپ وتىر. بۇگىندە كيىك سانى 2 ميلليون 600 مىڭنىڭ ۇستىندە بولادى»، - دەدى مينيستر ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

ونىڭ دەرەگىنشە، باتىس قازاقستان وبلىسىندا ورال پوپۋلياتسياسىنىڭ 300 مىڭى عانا تىرشىلىك ەتە الادى. جالپى تاريحي تۇرعىدا ورال پوپۋلياتسياسى وتە از بولعان. ال بۇگىندە 1 ميلليون 130 مىڭ باسقا جەتىپ وتىر. بەتپاقدالا پوپۋلياتسياسى 800 مىڭنان اسادى.

«سول سەبەپتى بيولوگيالىق نەگىزدەمەگە سايكەس 337 مىڭ باس كيىكتى رەتتەۋىمىز كەرەك»، - دەدى ەرلان نىسانبايەۆ.

سوڭعى جاڭالىقتار