ەكولوگيا مينيسترلىگى كيىك اتۋدان باس تارتپاقشى

استانا. KAZINFORM - ەكولوگيا جانە تابيعي رەسۋرستار مينيسترلىگى Kazinform ساۋالىنا جولداعان جاۋاپتا كيىك سانىن رەتتەۋدىڭ نەگىزگى قاعيداتتارى ايقىندالعانىن ءمالىم ەتتى.

- ەكولوگيا جانە تابيعي رەسۋرستار مينيسترلىگى مەملەكەت باسشىسىنىڭ تاپسىرماسىنا سايكەس كيىك پوپۋلياتسياسىن باسقارۋ ماسەلەسىن كەشەندى تۇردە قايتا قاراستىرىپ جاتىر. مينيسترلىك ءۇشىن باستى قاعيدات - بيوالۋانتۇرلىلىكتى ساقتاۋ مەن اۋىل شارۋاشىلىعى سالاسىنىڭ مۇددەلەرىن تەڭ ۇيلەستىرۋ. قازىرگى تاڭدا كيىك سانىن رەتتەۋ ماقساتىندا تىكەلەي ىزگىلىككە قايشى ادىستەردەن باس تارتىلىپ وتىر، - دەپ جازىلعان جاۋاپتا.

ۆەدومستۆو ماماندارىنىڭ مالىمەتىنە سۇيەنسەك ىزگىلىككە قايشى ادىستەر ءۇش باعىتقا قۇرىلعان. ولار:

- سپۋتنيك ارقىلى باقىلاۋ جولىمەن كيىك ميگراتسياسى مەن شوعىرلانۋىن مونيتورينگىلەۋ جانە بولجاۋ؛

- كيىك سانىن بيولوگيالىق شەكتەردە (ارنايى قاۋمالداردا) ۇستاۋ ءۇشىن ۇزاق مەرزىمدى عىلىمي نەگىزدەلگەن جوسپار ازىرلەۋ؛

- فەرمەرلەرگە قولداۋ تەتىكتەرى - قورشاۋ قۇرالدارىنا سۋبسيديالار، زالالدى وتەۋ ادىستەمەسىن ازىرلەۋ؛

- ءتيىستى زاڭنامالىق وزگەرىستەر - كيىك قوزعالىس دالىزدەرىمەن ۇيلەستىرىپ، جايىلىمداردى باسقارۋ.

- مينيسترلىك «تابيعاتتى قورعاۋ - ادامدى قورعاۋ» قاعيداتىنا سۇيەنە وتىرىپ، حالىقارالىق تاجىريبە مەن عىلىمي ۇسىنىستار نەگىزىندە ەكوجۇيەلىك تەپە-تەڭدىكتى ساقتايتىن ۇتىمدى شەشىمدەردى قاراستىرۋدا، - دەلىنگەن رەسمي جاۋاپتا.

ال بۇعان دەيىن ەكولوگيا جانە تابيعي رەسۋرستار ءمينيسترى ەرلان نىسانبايەۆ ب ا ق وكىلدەرىنىڭ سۇراعىنا بەرگەن جاۋابىندا كيىك سانىن رەتتەۋ ارنايى قاۋمالدا ۇستاۋ نەمەسە اتۋ ارقىلى ۇيىمداستىرىلۋى مۇمكىن ەكەنىن ايتقان ەدى.