كولەمى 3,6 ميلليون تەڭگەدەن اساتىن نەسيە الۋشىلار جۇبايىنىڭ كەلىسىمىن قالاي راسىمدەيدى

кредит несие
فوتو: Pexels

استانا. KAZINFORM - قارجى نارىعىن رەتتەۋ جانە دامىتۋ اگەنتتىگى جەكە تۇلعالارعا بانكتەن قارىز بەن شاعىن نەسيە بەرۋ كەزىندە جۇبايلاردىڭ كەلىسىمىن تالاپ ەتەتىن شارتتاردى ناقتىلايتىن قاۋلى جوباسىن جاريالادى.

«رەسپۋبليكالىق بيۋدجەت تۋرالى زاڭمەن ءتيىستى قارجى جىلعا بەلگىلەنگەن مىڭ ەسەلەنگەن ايلىق ەسەپتىك كورسەتكىش مولشەرىندە بانكتىك قارىز نەمەسە ميكروكرەديت الۋعا جۇبايىنىڭ (زايىبىنىڭ) كەلىسىمى قاجەت بولاتىن تۇتىنۋشىلىق بانكتىك قارىزدىڭ نەمەسە تۇتىنۋشىلىق ميكروكرەديتتىڭ ەڭ تومەنگى مولشەرى بەكىتىلسىن»، - دەپ جازىلعان قاۋلى جوباسىندا.

قاراپايىم تىلمەن ايتساق، قاتارداعى قازاقستاندىقتار بانكتەن نەسيە نەمەسە قارجى ۇيىمدارىنان شاعىن نەسيە العان كەزدە سۇراپ وتىرعان سوما 1000 ايلىق ەسەپتىك كورسەتكىشتەن اسسا، جۇبايىنىڭ كەلىسىمىن الۋى كەرەك.

2024 -جىلعى ءبىر ايلىق ەسەپتىك كورسەتكىش 3692 تەڭگە ەكەنىن ەسكەرسەك، شەكتى سوما 3 ميلليون 692 مىڭ تەڭگە دەگەن ءسوز.

«كرەديت بەرۋشى جەكە تۇلعاعا كرەديت بەرۋ تۋرالى شەشىم قابىلداعاننان كەيىن ازاماتتىق حال اكتىلەرىنىڭ اقپاراتتىق جۇيەسى (ا ح ا ج) ارقىلى ونىڭ جۇبايى تۋرالى اقپاراتتى تەكسەرەدى نە كرەديتتىك بيۋرودان ا ح ا ج- دا بار اقپاراتتى الادى. جۇبايىنىڭ كەلىسىمى ا ح ا ج-دا كليەنتتىڭ جۇبايى تۋرالى اقپارات بولعان كەزدە تالاپ ەتىلەدى»، - دەلىنگەن قۇجاتتا.

نەسيە الۋشىنىڭ جۇبايى ءوز كەلىسىمىن قاعاز تۇرىندە دە، ونلاين تاسىلمەن دە راستا الادى. كەلىسىم بەرۋ قۇجاتىندا مىنا دەرەكتەر كورىنىس تابۋ كەرەك:

كەلىسىمنىڭ رەسىمدەلگەن كۇنى؛

كليەنت پەن جۇبايىنىڭ تەگى، اتى، اكەسىنىڭ اتى جانە جەكە سايكەستەندىرۋ ءنومىرى؛

راسىمدەلەتىن كرەديتتىڭ سوماسى، مەرزىمى، سىياقى مولشەرلەمەسىنىڭ كولەمى.

قاعاز تۇرىندە بەرىلگەن كەلىسىمدى نوتاريۋس ارقىلى كۋالاندىرۋ قاجەت.

ەلەكتروندى كەلىسىم بەرۋ eGov ۆەب-پورتالى بيومەتريالىق يدەنتيفيكاتتاۋ (ادامنىڭ بەت الپەتىن ۆەب-كامەرا ارقىلى بىرىزدەندىرۋ) ارقىلى راسىمدەلەدى.

مۇنداي كەلىسىمدى نەسيە الۋشىنىڭ جۇبايى ەلەكتروندىق سيفرلىق قولتاڭبا ارقىلى 48 ساعات ىشىندە كۋالاندىرۋى قاجەت.

اۆتور

ەسىمجان ناقتىباي

سوڭعى جاڭالىقتار