كولۋمبيادا 1400 توننا ەسىرتكى تاركىلەندى
بوگوتا. KAZINFORM - كولۋمبيا بيلىگى ونداعان باسقا ەلدەرمەن بىرلەسە وتىرىپ، التى اپتا ىشىندە 225 توننا كوكاين تاركىلەدى، بۇل ەسىرتكىگە قارسى وپەراتسيالار اراسىندا الەمدىك رەكورد بولدى. بۇل تۋرالى The Guardian حابارلادى.
كولۋمبيا مەن 62 مەملەكەت قاتىسقان التى اپتاعا سوزىلعان «وريون» وپەراتسياسى بارىسىندا كوكاين تاسىمالداعان 6 تەڭىز كەمەسى توقتاتىلىپ، بارلىعى 1400 توننا ەسىرتكى، ونىڭ ىشىندە 1000 توننادان استام ماريحۋانا جانە 225 توننا كوكاين تاركىلەندى. كونتراباندانىڭ ءبىر بولىگى اۆسترالياعا ەسىرتكى تاسىمالداۋدىڭ جاڭا باعىتىنا بارا جاتقان سۋاستى قايىعىنان تابىلدى.
سونداي-اق، ەسىرتكىگە قارسى وپەراتسيا بارىسىندا زاڭسىز قارۋ-جاراق ساتۋشىلار مەن يمميگرانتتار كونترابانداسىمەن اينالىسقان 400 دەن استام ادام ۇستالدى.
بۇل وپەراتسيا لاتىن امەريكاسىنداعى كارتەلدەر ءۇشىن اۋىر سوققى بولدى. بىرىككەن ۇلتتار ۇيىمىنىڭ باعالاۋى بويىنشا الەمدە جىل سايىن 2700 توننا كوكاين وندىرىلەدى. كولۋمبيا بيلىگى 2022-جىلى 671 توننا كوكاين تاركىلەدى.
- بۇل كوكاين ساۋداسىنىڭ ماڭىزدى بولىگى. بۇل مىڭداعان دوزالانعان ءولىمنىڭ الدىن الادى جانە 8,5 ميلليارد دوللاردىڭ كارتەلدەرگە تۇسۋىنە جول بەرمەيدى، بۇل وسى قىلمىستىق ۇيىمداردىڭ پايداسىنا كەلەرگى جاسايدى، - دەدى كولۋمبيا اسكەري-تەڭىز كۇشتەرىنىڭ ەسىرتكىگە قارسى بولىمشەسىنىڭ ديرەكتورى، كاپيتان مانۋەل رودريگەس.
رودريگەستىڭ ايتۋىنشا، زاڭسىز جەتكىزىلىمدەردى توقتاتۋ ءۇشىن سەرىكتەس ەلدەر ۇشاقتاردى، تىكۇشاقتاردى جانە فرەگاتتاردى بىرىكتىرگەن، ءبىراق بارلاۋ مالىمەتتەرىمەن ءبولىسۋ ەڭ باستى ۇتىمدىلىق بولعان.
ايتا كەتەيىك، قازاقستاندا ەسىرتكى وندىرۋشىلەرىنە جازانى كۇشەيتۋگە باعىتتالعان ماڭىزدى زاڭ جوباسى تالقىلانۋدا. جازانى ءومىر بويىنا باس بوستاندىعىنان ايىرۋعا دەيىن قاتايتۋ ۇسىنىلدى.
