كوللەدجدەردە 1 ستۋدەنتكە بولىنەتىن قارجى ەكى ەسە ارتادى
استانا. KAZINFORM - وقۋ-اعارتۋ ءمينيسترى عاني بەيسەمبايەۆ ۇكىمەت وتىرىسىندا جۇمىسشى ماماندىقتار جىلى اياسىندا كاسىپتىك- تەحنيكالىق ءبىلىم بەرۋ ۇيىمدارىن قارجىلاندىرۋ كولەمى ارتاتىنىن جەتكىزدى.
- تەحنيكالىق جانە كاسىپتىك ءبىلىم بەرۋ ۇيىمدارىنىڭ كوپتەن كۇتكەن جاڭالىعى - 2025 -جىلعى 1-قىركۇيەكتەن باستاپ جان باسىنا شاققانداعى قارجىلاندىرۋ مولشەرى ۇلعاياتىن بولادى. قولدانىستاعى جان باسىنا شاققانداعى نورماتيۆتىك قارجىلاندىرۋ ادىستەمەسىنە سايكەس 1 ستۋدەنتتى دايارلاۋ ءۇشىن بولىنەتىن قارجىنىڭ ورتاشا مولشەرى 437 مىڭ تەڭگەنى قۇراسا، ول ەندى ورتاشا ەسەپپەن 912 مىڭ تەڭگەنى قۇرايتىن بولادى، - دەدى ۆەدومستۆو باسشىسى.
ونىڭ ايتۋىنشا، جاڭا قارجىلاندىرۋ نورماتيۆى نەگىزگى جانە ىنتالاندىرۋ بولىكتەرىنەن تۇرادى.
- بۇل رەتتە ىنتالاندىرۋشى تولەمدەر ناقتى كورسەتكىشتەرگە قول جەتكىزگەن كوللەدجدەرگە بەرىلەدى. جاڭا قارجىلاندىرۋ جۇيەسى - باسەكەگە قابىلەتتى ماماندار دايارلاۋعا، ءبىلىم ۇيىمدارىن زاماناۋي ماتەريال-تەحنيكالىق قۇرالدارمەن جابدىقتاۋعا جانە پەداگوگتەردىڭ بىلىكتىلىگىن ارتتىرۋ كۋرستارىن ۇيىمداستىرۋعا مۇمكىندىك بەرەدى، - دەدى عاني بەيسەمبايەۆ.
